মুন্নী বেগম/গুৱাহাটী
যুগ যুগ ধৰি পালন কৰি অহা ৰঙৰ উৎসৱ হোলী হৈছে এক পৰম্পৰা। যিয়ে আনন্দ, একতা আৰু নতুনত্বৰে একত্ৰিত হৈ নিজৰ সাৰমৰ্ম অক্ষুন্ন ৰাখি প্ৰতিটো প্ৰজন্মৰ সৈতে বিকশিত হৈ আহিছে। পূৰ্বে গাওঁসমূহত আন্তৰিকতাৰে উদযাপন কৰাৰ পৰা আৰম্ভ কৰি বৰ্তমানৰ বিশ্বব্যাপী চহৰসমূহত অনুষ্ঠিত হোৱা বিশাল সংগীতেৰে পৰিপূৰ্ণ অনুষ্ঠানলৈকে সময়ৰ সৈতে হোলী যথেষ্ট পৰিৱৰ্তন হৈছে।
হোলীৰ পৰম্পৰাগত মিঠাই তথা পানীয়
পৰম্পৰাগত হোলী
প্ৰাচীনকালত হোলী মূলতঃ সৰু সৰু গাওঁ আৰু চহৰবোৰত উদযাপন কৰা এক সম্প্ৰদায়কেন্দ্ৰিক উৎসৱ আছিল। হোলী উদযাপনৰ বাবে প্ৰস্তুতিবোৰ কেইবাসপ্তাহৰ পূৰ্বৰ পৰা আৰম্ভ কৰা হৈছিল আৰু পৰিয়ালসমূহে নাৰ্জি ফুল আৰু শিমলু ফুল আৰু হালধি আৰু চন্দন আদি দৰে বনৌষধি ফুলৰ পৰা ঘৰতে প্ৰাকৃতিক ৰং প্ৰস্তুত কৰিছিল। হোলীৰ এক শক্তিশালী ধৰ্মীয় আৰু সাংস্কৃতিক দিশ আছে, য'ত জ্যেষ্ঠসকলে হোলিকা আৰু প্ৰহ্লাদৰ কাহিনী বৰ্ণনা কৰিছিল, য'ত বেয়াৰ ওপৰত ভালৰ জয় হোৱা বুলি লোকবিশ্বাস আছিল।
হোলীৰ আগদিনা নিশা হোলিকা দহন কৰা হৈছিল, য’ত ৰাইজে একত্ৰিত হৈ খৰিৰে সাজি উলিওৱা মেজিৰ চাৰিওফালে গোট খাই ভগৱানৰ ওচৰত প্ৰাৰ্থনা কৰি নেতিবাচকতাক অগ্নিত দাহ কৰিছিল। পিছদিনা ৰাতিপুৱা সৰলভাৱে আৰু উৎসাহেৰে হোলী উদযাপন কৰা হৈছিল। পৰিয়ালৰ লগতে ওচৰ-চুবুৰীয়াই ইজনে-সিজনক ৰং সানি, লোকগীত গাই, গুজিয়া, মালপুৱা, থাণ্ডাই আদি পৰম্পৰাগত মিঠাই তথা পানীয়ৰ সোৱাদ লৈছিল। হোলী উৎসৱটো বেছিভাগেই শুকানভাৱে পালন কৰা হৈছিল যদিও কেতিয়াবা সৰু মাটিৰ পাত্ৰ বা সৰু পিচকাৰীৰে অলপ পানীহে ব্যৱহাৰ কৰা হৈছিল।
প্ৰাকৃতিক আবিৰ
আধুনিক হোলী
নগৰায়নৰ লগে লগে হোলী উদযাপন অধিক বিশাল আৰু অধিক বাণিজ্যিকীকৰণ হৈ পৰিছে। পূৰ্বৰ প্ৰাকৃতিক ৰঙৰ ঠাইত চৌদিশে ৰাসায়ন মিহলি ৰঙৰ ব্যৱহাৰ বৃদ্ধি পাইছে। পানীৰ বেলুন আৰু উচ্চ চাপৰ পিচকাৰীৰ জনপ্ৰিয় হৈ পৰিছে, যাৰ ফলত এই ৰঙৰ উৎসৱ এক খেল-ধেমালিৰ যুদ্ধ ক্ষেত্ৰলৈ ৰূপান্তৰিত হৈছে।
এই আধুনিক হোলী গঢ় দিয়াৰ ক্ষেত্ৰত বলীউডে মুখ্য ভূমিকা পালন কৰিছে বুলি ক'লেও ভুল নহব। পৰম্পৰাগত হোলী গীতৰ পৰিৱৰ্তে বৰ্তমান 'ৰং বৰছে' আৰু 'বালাম পিচকাৰী' আদি গীত হোলী উৎসৱৰ গীত হৈ পৰিছে আৰু ৰাজহুৱা হোলী অনুষ্ঠানত ডিজে, নৃত্য মঞ্চ আৰু লাইভ প্ৰদৰ্শন আৰম্ভ হৈছে। ডাঙৰ চহৰবোৰত এতিয়া মানুহে চেলিব্ৰিটিৰ উপস্থিতি, খাদ্যৰ বিপণি, ৰেইন ডান্সৰ চেটআপৰ সৈতে টিকটযুক্ত হোলী পাৰ্টিত অংশগ্ৰহণ কৰে, যাৰ ফলত এই উৎসৱটো আধ্যাত্মিকতাৰ সলনি বৃহৎ পৰিসৰৰ মনোৰঞ্জনৰ অনুষ্ঠানলৈহে পৰিণত হৈছে।
হোলীৰ আগদিনা নিশা পালন কৰা হোলিকা দহন পৰম্পৰা
পৰিৱেশ অনুকূল আৰু ডিজিটেল হোলী যুগ
শেহতীয়া বছৰবোৰত পানীৰ অপচয় আৰু ৰাসায়ন মিহলি ৰঙৰ উদ্বেগৰ বাবে মানুহক পৰিৱেশ অনুকূল হোলী উদযাপনৰ দিশত ধাৱমান হোৱা দেখা গৈছে। বহু সম্প্ৰদায়ে এতিয়া বনৌষধি, জৈৱিক ৰং আৰু শুকান হোলী উদযাপন কৰাৰ বাবে প্ৰচাৰ কৰি পৰিৱেশৰ ওপৰত পৰা প্ৰভাৱ হ্ৰাস কৰা চেষ্টা কৰি আহিছে। বিদ্যালয় আৰু সংগঠনসমূহে 'দায়িত্বশীলভাৱে হোলী' উদযাপনক উৎসাহিত কৰি সজাগতা অভিযানো চলাই আহিছে।
আন এক বৃহৎ পৰিৱৰ্তন হৈছে ডিজিটেল হোলী উদযাপনৰ উত্থান। বৰ্তমান সময়ত ছ'চিয়েল মিডিয়া আৰু মেছেজিং এপৰ জৰিয়তে মানুহে ভাৰ্চুৱেল হোলীৰ শুভেচ্ছা প্ৰেৰণ কৰে, আৰু ব্যক্তিগতভাৱে লগ হ’ব নোৱাৰা বহুতেই ভিডিঅ' কল আৰু অনলাইন ইভেণ্টৰ জৰিয়তে হোলী উদযাপন কৰে। ক'ভিড-১৯ মহামাৰীয়ে এই ধাৰাক আৰু অধিক ত্বৰান্বিত কৰি তুলিছে।
কানাডাত বিশালভাৱে অনুষ্ঠিত হোলী অনুষ্ঠান
হোলীৰ গোলকীকৰণ
এসময়ত মূলতঃ ভাৰত আৰু নেপালত উদযাপন কৰা উৎসৱ হোলীয়ে এতিয়া আন্তঃৰাষ্ট্ৰীয় স্বীকৃতি লাভ কৰিছে। আমেৰিকা, যুক্তৰাজ্য, অষ্ট্ৰেলিয়া, কানাডাৰ দৰে দেশত আজিৰ সময়ত বিশালভাৱে হোলী অনুষ্ঠান অনুষ্ঠিত কৰা হয়, যিবোৰ প্ৰায়ে ভাৰতীয় প্ৰব্ৰজনকাৰী সম্প্ৰদায়ে আয়োজন কৰে। 'ৰঙৰ উৎসৱ' নামেৰে জনাজাত এই বিশ্বব্যাপী উদযাপনসমূহে বিভিন্ন জাতি-জনগোষ্ঠীৰ লোকক আকৰ্ষিত কৰে, আৰু সাংস্কৃতিক বিনিময় আৰু ঐক্যক প্ৰসাৰিত কৰে।
হোলী উদযাপনৰ পদ্ধতিৰ বিকাশ ঘটিছে যদিও হোলীয়ে মানুহক একত্ৰিত কৰা এক উৎসৱ হিচাপে অব্যাহত আছে। জৈৱিক ৰং আৰু লোকগীতৰ সৈতে সৰু গাঁৱতেই হওঁক বা ডিজে আৰু পিচকাৰীৰে চহৰৰ বিশাল বিশাল অনুষ্ঠানতেই হওঁক, হোলীৰ মনোভাৱত নিহিত হৈ আহে আনন্দ, একত্ৰিত হৈ থকা আৰু নতুন আৰম্ভণি। যুগ যুগ ধৰি পালন কৰি অহা ৰঙৰ উৎসৱ হোলীৰ ক্ৰমবিকাশে প্ৰজন্মৰ মাজত সমন্বয়ৰ সেতু গঢ়ি আমাক সোঁৱৰাই দিয়ে যে, ইয়াৰ প্ৰকৃত সত্তা কেতিয়াও ম্লান নপৰে।
