নতুন দিল্লী
চিবিএছইয়ে তেওঁলোকৰ ৱেবছাইট cbse.gov.inত দশম আৰু দ্বাদশ শ্ৰেণীৰ ব'ৰ্ড পৰীক্ষা ২০২৫ৰ বাবে আনুষ্ঠানিকভাৱে দিনাংক ঘোষণা কৰিছে। অনুসূচী অনুসৰি পৰীক্ষাসমূহ ১৫ ফেব্ৰুৱাৰীত আৰম্ভ হ'ব। দশম শ্ৰেণীৰ বাবে পৰীক্ষাসমূহ ১৮ মাৰ্চত সমাপ্ত হ'ব আনহাতে দ্বাদশ শ্ৰেণীৰ বাবে সেইবোৰ ৪ এপ্ৰিললৈকে চলিব। শিক্ষাৰ্থীসকলে এতিয়া অনলাইনযোগে বিতং সময়সূচীৰ পৰ্যালোচনা কৰিব পাৰিব।
প্ৰকাশ কৰা সূচী অনুসৰি ১৫ ফেব্ৰুৱাৰীৰ পৰা চিবিএছইৰ দশম শ্ৰেণীৰ ব’ৰ্ড পৰীক্ষা ২০২৫ আৰম্ভ হ’ব আৰু প্ৰথম পৰীক্ষা ইংৰাজী বিষয়টোৰ হ’ব। দ্বাদশ শ্ৰেণীৰ কথা ক’বলৈ গ’লে ১৭ ফেব্ৰুৱাৰীত প্ৰথম পৰীক্ষা শাৰীৰিক শিক্ষাৰ বিষয়ৰটোৰ অনুষ্ঠিত হব।
চিবিএছইয়ে বিষয়-নিৰ্দিষ্ট নিৰ্দেশনা জাৰি কৰিছে, য’ত মূল তথ্য যেনে বিষয়ৰ ক’ড, শ্ৰেণী নিৰ্দিষ্টকৰণ, তত্ত্ব আৰু ব্যৱহাৰিক উপাদানৰ বাবে সৰ্বোচ্চ নম্বৰ, প্ৰকল্পৰ কাম, আভ্যন্তৰীণ মূল্যায়ন আৰু উত্তৰ পুস্তিকাৰ বিন্যাসৰ ৰূপৰেখা দাঙি ধৰা হৈছে। পৰীক্ষাসমূহ সুচাৰুৰূপে পৰিচালিত হোৱাৰ বাবে বিদ্যালয়সমূহক এই নিৰ্দেশনাসমূহ কঠোৰভাৱে পালন কৰিবলৈ নিৰ্দেশ দিয়া হৈছে।
ছাত্ৰ-ছাত্ৰীসকলে চিবিএছইৰ অফিচিয়েল একাডেমিক ৱেবছাইট cbseacademic.nic.in ত দশম আৰু দ্বাদশ শ্ৰেণীৰ নমুনা প্ৰশ্নকাকত লাভ কৰিব পাৰিব। এই সম্পদসমূহ ছাত্ৰ-ছাত্ৰীসকলক শেহতীয়া প্ৰশ্নৰ বিন্যাস, নম্বৰ দিয়াৰ আঁচনি আৰু পৰীক্ষাৰ আৰ্হিৰ সৈতে পৰিচিত কৰিবলৈ ডিজাইন কৰা হৈছে, যাৰ ফলত তেওঁলোকে তেওঁলোকৰ ব’ৰ্ড পৰীক্ষাৰ বাবে ফলপ্ৰসূভাৱে প্ৰস্তুতি চলাব পাৰে।
