নতুন দিল্লী
কেৱল ইংৰাজী বা হিন্দী ভাষাতহে ব’ৰ্ড পৰীক্ষা লিখিবলৈ কেন্দ্ৰীয় মাধ্যমিক শিক্ষা ব’ৰ্ডে (CBSE) দিয়া নিৰ্দেশৰ ফলত উৰ্দু মাধ্যমৰ বিদ্যালয়সমূহ বিভ্ৰান্ত আৰু অনিশ্চিত হৈ পৰিছে। দ্য টেলিগ্ৰাফ ইণ্ডিয়াত প্ৰকাশিত এক প্ৰতিবেদন অনুসৰি ইংৰাজী আৰু হিন্দীৰ বাহিৰে আন ভাষাত পৰীক্ষা লিখিবলৈ ব’ৰ্ডৰ পৰা অনুমতি ল’ব পাৰি যদিও এই বিকল্প কেৱল দিল্লীস্থিত বিদ্যালয়ৰ বাবেহে উপলব্ধ।
যদিও ২০২১ চনত ব’ৰ্ডে উৰ্দু ভাষাত প্ৰশ্নকাকত প্ৰদান কৰা বন্ধ কৰি দিছিল, তথাপিও ছাত্ৰ-ছাত্ৰীসকলক উৰ্দু ভাষাত উত্তৰ লিখিবলৈ অনুমতি দিয়া হৈছিল। যোৱা তিনি বছৰ ধৰি ছাত্ৰ-ছাত্ৰীসকলে ইংৰাজী বা হিন্দী ভাষাত প্ৰশ্নকাকত লাভ কৰিছিল যদিও উৰ্দু ভাষাত উত্তৰ লিখি থাকিল।
কিন্তু চিবিএছইৰ শেহতীয়া আদেশত স্পষ্ট কৰি দিয়া হৈছে যে ব’ৰ্ডৰ পৰা অনুমতি নোলোৱাকৈ ছাত্ৰ-ছাত্ৰীয়ে আৰু উৰ্দু ভাষাত উত্তৰ লিখিব নোৱাৰিব, যিটো বিকল্প কেৱল দিল্লীস্থিত বিদ্যালয়সমূহৰ বাবেহে উপলব্ধ।
তেলেংগানা, হায়দৰাবাদ, হাৰিয়ানা আৰু বিহাৰৰ MANUU মডেল স্কুলৰ ছাত্ৰ-ছাত্ৰীসকল এই সিদ্ধান্তত বিভ্ৰান্ত হৈ পৰিছে। কিয়নো, অনুমতি অবিহনে ইংৰাজী বা হিন্দীৰ বাহিৰে আন কোনো ভাষাত লিখা ছাত্ৰ-ছাত্ৰীৰ উত্তৰৰ মূল্যায়ন কৰা নহ’ব, আৰু কোনো নম্বৰ নিদিয়াকৈ তেওঁলোকৰ ফলাফল ঘোষণা কৰা হ’ব বুলিও ব’ৰ্ডে উল্লেখ কৰিছে।
উৰ্দু মাধ্যমৰ বিদ্যালয়ৰ ছাত্ৰ-ছাত্ৰীসকলে সন্মুখীন হোৱা প্ৰত্যাহ্বানসমূহ চিবিএছইয়ে কেনেদৰে মোকাবিলা কৰিব সেয়া লক্ষ্যণীয় হ’ব।
