নতুন দিল্লী
জৱাহৰলাল নেহৰু বিশ্ববিদ্যালয়ৰ চৌহদত সংঘটিত হোৱা হিংসাত্মক ঘটনাৰ পৰিপ্ৰেক্ষিতত শুকুৰবাৰে বিশ্ববিদ্যালয় ছাত্ৰ সন্থাৰ নিৰ্বাচন অনিৰ্দিষ্টকাললৈ পিছুৱাই দিয়া হয়।
যোৱা দুদিনত মনোনয়ন প্ৰত্যাহাৰৰ অন্তিম তাৰিখ একাধিকবাৰ বৃদ্ধি কৰাৰ ফলত নিৰ্বাচনী সমিতিৰ কাৰ্যালয় লণ্ডভণ্ড কৰাৰ দৰে হিংসাত্মক ঘটনা সংঘটিত হয়। এই পৰিস্থিতিৰ পৰিপ্ৰেক্ষিতত তাৎক্ষণিকভাৱে কাৰ্যকৰী হোৱাকৈ নিৰ্বাচনী প্ৰক্ৰিয়া বন্ধ কৰি দিয়া হৈছে।
নিৰ্বাচনী সমিতিয়ে আনুষ্ঠানিক বিবৃতিত কয় যে, " নিৰ্বাচনী সমিতিৰ সদস্য আৰু কাৰ্যালয়ৰ বিৰুদ্ধে হোৱা হিংসা আৰু লণ্ডভণ্ড কৰা কাণ্ডই নিৰ্বাচনী প্ৰক্ৰিয়াত গুৰুতৰ প্ৰভাৱ পেলাইছে। বিশ্ববিদ্যালয় প্ৰশাসন আৰু ছাত্ৰ সংগঠনসমূহে যৌথভাৱে সমিতিৰ সদস্যসকলৰ সুৰক্ষাৰ নিশ্চয়তা নিদিয়ালৈকে প্ৰাৰ্থীৰ চূড়ান্ত তালিকা প্ৰকাশকে ধৰি সমগ্ৰ নিৰ্বাচনী প্ৰক্ৰিয়াটো পিছুৱাই দিয়া হয়।"
নিৰ্বাচন স্থগিত ৰখাৰ মূল কাৰণ হিচাপে বিশ্ববিদ্যালয়ৰ চৌহদত বিৰাজ কৰা উত্তেজনা আৰু অসুৰক্ষিত পৰিবেশৰ কথা উল্লেখ কৰিছে নিৰ্বাচনী সমিতিয়ে।
