আৱাজ দ্য ভইচ / শ্ৰীনগৰ
উত্তৰ কাশ্মীৰৰ বাৰামুল্লা জিলাৰ উচ্চতৰ মাধ্যমিক বিদ্যালয়ৰ শিক্ষক তাজামুল নাছিম ল’নে ফুলব্ৰাইট টিচিং এক্সেলেন্স এণ্ড এচিভমেণ্ট প্ৰগ্ৰেম (২০২৪-২০২৫)ৰ বাবে নিৰ্বাচিত হৈছে। এই সন্মানীয় কাৰ্যসূচীৰ অধীনত শিক্ষকজনে ছয় সপ্তাহৰ বাবে আমেৰিকাৰ বিশ্ববিদ্যালয় এখনত পেছাদাৰী শিক্ষকতাৰ অভিজ্ঞতা লাভ কৰিব।
ৰফিয়াবাদৰ ডাংগীৱাচাৰ অঞ্চলৰ শিক্ষকজনে এই সময়ছোৱাত আন্তঃৰাষ্ট্ৰীয় শিক্ষকৰ সৈতে কাম কৰি পাঠদান পদ্ধতি, ছাত্ৰকেন্দ্ৰিক পাঠদান আৰু নিৰ্দেশনামূলক কৌশলৰ গভীৰ জ্ঞান লাভ কৰিব। ডাংগিৱাচা চৰকাৰী উচ্চতৰ মাধ্যমিক বিদ্যালয় (জি এইচ এছ এছ)ৰ পৰা লাভ কৰা সমৰ্থন আৰু ফুলব্ৰাইটৰ প্ৰাক্তন ছাত্ৰ ৰমীজ চুডানৰ সহযোগিতাক তেওঁ নিজৰ সফলতাৰ কৃতিত্ব হিচাপে অভিহিত কৰে।
৩৮ বছৰীয়া ল’ন এইবাৰ কাশ্মীৰৰ পৰা এই কাৰ্যসূচীৰ বাবে নিৰ্বাচিত একমাত্ৰ অংশগ্ৰহণকাৰী আৰু সমগ্ৰ ভাৰতৰ পৰা নিৰ্বাচিত মাত্ৰ সাতজন শিক্ষকৰ ভিতৰত এজন। এই কাৰ্যসূচীত বিশ্বব্যাপী শৈক্ষিক বিনিময়ৰ প্ৰসাৰৰ ওপৰত বিশেষ গুৰুত্ব আৰোপ কৰা হৈছে।
ল'নৰ শৈক্ষিক পটভূমি যথেষ্ট বৈচিত্ৰময়। কাশ্মীৰ বিশ্ববিদ্যালয়ৰ পৰা বিজ্ঞান শাখাত স্নাতক ডিগ্ৰী লাভ কৰা ব্যক্তিজনে ভূপালৰ বৰকাতুল্লা বিশ্ববিদ্যালয়ৰ পৰা প্ৰাণীবিজ্ঞানত স্নাতকোত্তৰ ডিগ্ৰী সম্পূৰ্ণ কৰিছে। ইয়াৰ পিছত তেওঁ বুণ্ডেলখণ্ড বিশ্ববিদ্যালয়ৰ পৰা এম.ফিল কৰে। আৰু কাশ্মীৰ বিশ্ববিদ্যালয়ৰ পৰা শিক্ষাত স্নাতক ডিগ্ৰী লাভ কৰিবলৈ সক্ষম হয়।
বৰ্তমান তেওঁ পৰিৱেশ বিজ্ঞানত স্নাতকোত্তৰ ডিগ্ৰী লাভৰ দিশত কাম কৰি আছে। শিক্ষাৰ ক্ষেত্ৰত তেওঁৰ কেৰিয়াৰ ৯ বছৰ ধৰি চলিছে, য’ত তেওঁ আলোহা প্ৰশাসক আৰু পাঠ্যক্ৰমৰ প্ৰশিক্ষক হিচাপে কাৰ্যনিৰ্বাহ কৰিছে। ৬৫খন দেশৰ ৩২০০ৰো অধিক আবেদনকাৰীৰ মাজৰ পৰা ল'নক নিৰ্বাচিত কৰা হৈছে, যিয়ে তেওঁৰ পাঠদানৰ প্ৰতি নিষ্ঠা আৰু শৈক্ষিক উৎকৃষ্টতাক লালন-পালনৰ দায়বদ্ধতাক প্ৰতিফলিত কৰিছিল।
শিক্ষক বিনিময় শাখাৰ মুৰব্বী জেনিফাৰ গিবছনে এই কৃতিত্বৰ বাবে ল’নক অভিনন্দন জনাই কয় যে, এই বঁটাটোৱে ফুলব্ৰাইট প্ৰগ্ৰেমৰ পাৰস্পৰিক বুজাবুজি আৰু বিশ্ব শিক্ষাৰ প্ৰসাৰৰ অভিযানক সামৰি লৈছে। ল’নৰ এই সফলতাৰ পূৰ্বে বাৰামুল্লাৰ আন এগৰাকী শিক্ষক শইস্তা ছাকীলে ২০২৩ চনত একেটা কাৰ্যসূচীৰ বাবে নিৰ্বাচিত হৈছিল।
