নতুন দিল্লী
পৰীক্ষাৰ এদিন পূৰ্বে পেপাৰ ফাদিল হোৱা ঘটনাৰ তদন্ত চলি থকাৰ পিছতো চৰকাৰে চিকিৎসা প্ৰৱেশ পৰীক্ষা নীট বাতিল নকৰাৰ সিদ্ধান্ত লৈছে। চৰকাৰৰ স্থিতি স্পষ্ট কৰি শিক্ষামন্ত্ৰী ধৰ্মেন্দ্ৰ প্ৰধানে কৈছে যে প্ৰশ্নকাকত ফাদিলে সীমিত সংখ্যক ছাত্ৰ-ছাত্ৰীকহে প্ৰভাৱিত কৰিছিল, যিটো ২০০৪ আৰু ২০১৫ চনৰ ঘটনাৰ সম্পূৰ্ণ বিপৰীত। তেতিয়া ব্যাপক হাৰত প্ৰশ্ন কাকত ফাদিল হোৱাৰ ফলত পৰীক্ষা বাতিল কৰা হৈছিল। তেওঁ কয় যে পৰীক্ষা বাতিল কৰিলে সঠিকভাৱে পৰীক্ষাত উত্তীৰ্ণ হোৱা লাখ লাখ ছাত্ৰ-ছাত্ৰীৰ ওপৰত প্ৰভাৱ পৰিব।
লগতে তেওঁ কয় যে এই গোচৰৰ শুনানি উচ্চতম ন্যায়ালয়ত চলি আছে, আৰু আদালতে লোৱা যিকোনো সিদ্ধান্তই চূড়ান্ত সিদ্ধান্ত হ’ব। NEET-UG পৰীক্ষাত ৬৭ গৰাকী ছাত্ৰ-ছাত্ৰীয়ে নিখুঁত ৭২০ নম্বৰ লাভ কৰাৰ পিছত বিবাদৰ সৃষ্টি হয়, আৰু ৰাষ্ট্ৰীয় পৰীক্ষা সংস্থাই স্পষ্ট কৰি দিয়ে যে তেওঁলোকে ভুল প্ৰশ্ন আৰু পৰীক্ষাৰ্থীয়ে প্ৰশ্নকাকত পোৱাত পলম হোৱাৰ বাবে একাংশ ছাত্ৰ-ছাত্ৰীক গ্ৰেচ মাৰ্ক দিছে।
উল্লেখ্য যে, যোৱা ৫ মে’ত অনুষ্ঠিত এনটিএৰ দ্বাৰা পৰিচালিত স্নাতক চিকিৎসা পাঠ্যক্ৰমৰ বাবে NEET-UG ২০২৪ পৰীক্ষাত প্ৰায় ২৪ লাখ ছাত্ৰ-ছাত্ৰীয়ে অৱতীৰ্ণ হৈছিল আৰু ৪ জুনত নিৰ্ধাৰিত সময়ৰ পূৰ্বেই ইয়াৰ ফলাফল ঘোষণা কৰা হৈছিল।
কিন্তু প্ৰশ্নকাকত ফাদিল হোৱাৰ দাবী আৰু ১৫০০ৰো অধিক ছাত্ৰ-ছাত্ৰীক গ্ৰেচ মাৰ্ক প্ৰদানৰ দাবীত বিতৰ্কৰ সৃষ্টি হয়, যাৰ ফলত বিভিন্ন আদালতত দাখিল কৰা গোচৰকে ধৰি ব্যাপক প্ৰতিবাদ আৰু আইনী ব্যৱস্থা গ্ৰহণ কৰা হয়। উচ্চতম ন্যায়ালয়েও এন টি এৰ ভূমিকাক তীব্ৰ সমালোচনা কৰিছে।
প্ৰশ্নকাকত ফাদিল স্থানীয় পৰ্যায়ত হোৱা বুলি ধৰা পৰাত কেন্দ্ৰই পৰীক্ষা বাতিল কৰিবলৈ অস্বীকাৰ কৰিছে আৰু বিহাৰৰ পৰা মাত্ৰ দুজনমান ছাত্ৰ-ছাত্ৰীহে ফাদিল হোৱা প্ৰশ্নকাকতৰ পৰা উপকৃত হৈছিল। বিহাৰত এজন ছাত্ৰৰ লগতে আন তিনিজন অভিযুক্তক গ্ৰেপ্তাৰ কৰি জেৰা অব্যাহত ৰাখিছে।