নতুন দিল্লী
ৰাষ্ট্ৰীয় পৰীক্ষণ সংস্থাই দেওবাৰে চাৰিখন ৰাজ্য আৰু এখন কেন্দ্ৰীয় শাসিত অঞ্চলৰ ছটা কেন্দ্ৰত ১৫৬৩ গৰাকী পৰীক্ষাৰ্থীৰ বাবে NEET-UG পৰীক্ষা পুনৰ অনুষ্ঠিত কৰে। টেষ্টিং পেনেলৰ তথ্য অনুসৰি আজি পুনৰ পৰীক্ষাৰ বাবে ১,৫৬৩ গৰাকী পৰীক্ষাৰ্থীৰ ভিতৰত ৮১৩ গৰাকীয়ে অৱতীৰ্ণ হোৱাৰ বিপৰীতে ৭৫০ গৰাকী পৰীক্ষাৰ্থীয়ে পৰীক্ষাত বহাৰ পৰা বিৰত থাকে।
মেঘালয়, হাৰিয়ানা, ছত্তীশগড়, গুজৰাট আৰু চণ্ডীগড়ৰ ছটা কেন্দ্ৰত পৰীক্ষা আৰম্ভ হোৱাত পলম হোৱাৰ বাবে সময় হেৰুৱাৰ ক্ষতিপূৰণ হিচাপে ছাত্ৰ-ছাত্ৰীক প্ৰদান কৰা গ্ৰেচ মাৰ্ক ৰাষ্ট্ৰীয় পৰীক্ষণ সংস্থা (এন টি এ)ই প্ৰত্যাহাৰ কৰাৰ পিছতে এই পৰীক্ষা পুনৰ অনুষ্ঠিত হয়।
চণ্ডীগড়ত দুগৰাকী শিক্ষাৰ্থীয়ে NEET-UG পুনৰ পৰীক্ষা দিয়াৰ কথা আছিল যদিও দুয়োজনেই পৰীক্ষা কেন্দ্ৰত উপস্থিত নহ’ল। ছত্তীশগড়ত এই পৰীক্ষা দুটা কেন্দ্ৰত অনুষ্ঠিত হোৱাৰ কথা আছিল, য’ত ৬০২জন পৰীক্ষাৰ্থীয়ে পুনৰ পৰীক্ষাৰ বাবে যোগ্যতা অৰ্জন কৰিছিল। কিন্তু আজি পৰীক্ষাত উপস্থিত হয় ২৯১ গৰাকী প্ৰশিক্ষাৰ্থীয়ে।
হাৰিয়ানাৰ দুটা পৰীক্ষা কেন্দ্ৰত ৪৯৪জন পৰীক্ষাৰ্থীৰ বাবে পুনৰ পৰীক্ষাৰ ব্যৱস্থা কৰা হৈছিল। ইয়াৰে ২৮৭ গৰাকী ছাত্ৰ-ছাত্ৰীয়ে পৰীক্ষাত অৱতীৰ্ণ হয়। ইফালে, মেঘালয়ত ৪৬৪ গৰাকী যোগ্য প্ৰাৰ্থীৰ ভিতৰত ২৩৪ গৰাকীয়ে পৰীক্ষাত অৱতীৰ্ণ হয়। গুজৰাটত এজন প্ৰাৰ্থীৰ বাবে পুনৰ পৰীক্ষা অনুষ্ঠিত কৰা হয়।
উচ্চতম ন্যায়ালয়ৰ নিৰ্দেশৰ পিছতে এন টি এয়ে এই প্ৰাৰ্থীসকলক প্ৰদান কৰা ক্ষতিপূৰণৰ নম্বৰ প্ৰত্যাহাৰ কৰিছিল। এন টি এয়ে গঠন কৰা কমিটীয়ে এই ১৫৬৩ জন প্ৰাৰ্থীৰ স্ক’ৰকাৰ্ড বাতিল কৰাৰ সিদ্ধান্ত লৈ প্ৰতিকাৰ হিচাপে পুনৰ পৰীক্ষাৰ বিকল্প আগবঢ়াইছিল। ২৩ জুনত অনুষ্ঠিত পুনৰ পৰীক্ষাৰ ফলাফল ৩০ জুনৰ পূৰ্বে ঘোষণা কৰা হ’ব।
