জামিয়া মিলিয়া ইছলামিয়াৰ নতুন উপাচাৰ্য অধ্যাপক মাজহাৰ আছিফ (সোঁফালৰ পৰা দ্বিতীয়গৰাকী)ক আদৰণি
নতুন দিল্লী
নতুন দিল্লীৰ ঐতিহাসিক জামিয়া মিলিয়া ইছলামিয়াৰ উপাচাৰ্য হিচাপে বৃহস্পতিবাৰে নিযুক্তি পোৱা অধ্যাপক মাজহাৰ আছিফ হৈছে চুফীবাদ আৰু ভাৰতৰ মধ্যযুগীয় ইতিহাসৰ এগৰাকী বিশেষজ্ঞ ব্যক্তি। ২০ বছৰৰো অধিক শৈক্ষিক, গৱেষণা, আৰু প্ৰশাসনিক অভিজ্ঞতাৰে অধ্যাপক আছিফ হ’ব কেন্দ্ৰীয় বিশ্ববিদ্যালয়খনৰ ১৬ সংখ্যক উপাচাৰ্য। ২০২৩ চনৰ নৱেম্বৰ মাহত অধ্যাপক নাজমা আখতাৰৰ অৱসৰৰ পিছত খালী হৈ থকা এটা পদ তেওঁৰ এই নিযুক্তিয়ে পূৰণ কৰিলে।
বিশ্ববিদ্যালয়ৰ পৰা প্ৰকাশিত এক বিবৃতিত কোৱা হৈছে যে, শিক্ষা আৰু নেতৃত্বৰ বিশাল অভিজ্ঞতাৰে অধ্যাপক আছিফে জামিয়া মিলিয়া ইছলামিয়াক শৈক্ষিক উৎকৰ্ষতা, উদ্ভাৱন আৰু বিশ্বব্যাপী সহযোগিতাৰ এক নতুন দিগন্তৰ দিশে লৈ যাবলৈ সাজু হৈছে। ৫৮ বছৰীয়া অধ্যাপক মাজহাৰ আছিফ পাৰ্চী ভাষা আৰু সাহিত্যৰো বিশেষজ্ঞ। তেওঁ জে এন ইউৰ পৰা পাৰ্চী ভাষাত পি এইচ ডি আৰু ইউ জি চিৰ পৰা পোষ্ট ডক্টৰেট ডিগ্ৰী লাভ কৰিছে।
মৌলানা আবুল কালাম আজাদ ৰাষ্ট্ৰীয় উৰ্দু বিশ্ববিদ্যালয় আৰু জৱাহৰলাল নেহৰু বিশ্ববিদ্যালয়ৰ কাৰ্যনিৰ্বাহক পৰিষদৰ সদস্য হিচাপেও কাৰ্যনিৰ্বাহ কৰি আহিছে। এইবোৰৰ লগতে তেওঁ উৰ্দু ভাষাৰ প্ৰচাৰৰ বাবে ৰাষ্ট্ৰীয় পৰিষদ আৰু মুক্ত বিদ্যালয়ৰ ৰাষ্ট্ৰীয় প্ৰতিষ্ঠান (এন আই অ’ এছ)তো কেইটামান প্ৰভাৱশালী পদত অধিষ্ঠিত হৈছিল।
অধ্যাপকগৰাকীয়ে কেইবাখনো ৰাষ্ট্ৰীয় আৰু আন্তঃৰাষ্ট্ৰীয় সন্মিলনত ২০খনতকৈও অধিক গৱেষণা পত্ৰ উপস্থাপন কৰাৰ লগতে পাৰ্চী, ইংৰাজী, অসমীয়া ভাষাতো ৯খন গ্ৰন্থ প্ৰকাশ কৰিছে।
অধ্যাপক আছিফে জে এন ইউৰ স্কুল অৱ লেংগুৱেজ, লিটাৰেচাৰ এণ্ড কালচাৰেল ষ্টাডিজৰ অধীনত চেণ্টাৰ ফৰ পাৰ্চিয়ান এণ্ড চেণ্ট্ৰেল এছিয়ান ষ্টাডিজত অধ্যাপক হিচাপে কাম কৰি আছে। তেওঁ শৈক্ষিক ক্ষেত্ৰখনলৈ মূল্যৱান অৱদান আগবঢ়োৱাৰ লগতে নতুন ৰাষ্ট্ৰীয় শিক্ষা নীতি (এন ই পি) ২০২০ৰ খচৰা প্ৰস্তুত সমিতিৰ সদস্য হিচাপেও গুৰুত্বপূৰ্ণ ভূমিকা পালন কৰিছে।
ইয়াৰ উপৰিও তেওঁ নেচনেল ইনষ্টিটিউট অৱ অ’পেন স্কুলিং (এন আই অ’ এছ) আৰু নেচনেল কাউন্সিল ফৰ দ্য প্ৰমোচন অৱ উৰ্দু লেংগুৱেজ (এন চি পি ইউ এল)তো নেতৃত্বৰ ভূমিকা পালন কৰি আহিছে। জামিয়া মিলিয়া ইছলামিয়াৰ ভৱিষ্যতৰ ক্ষেত্ৰত অধ্যাপক মাজহাৰ আছিফৰ নিযুক্তি এক গুৰুত্বপূৰ্ণ পদক্ষেপ হিচাপে বিবেচিত হৈছে। অধ্যাপক আছিফৰ নেতৃত্বত বিশ্ববিদ্যালয়খনে নতুন উচ্চতা স্পৰ্শ কৰিব বুলি ছাত্ৰ-ছাত্ৰী আৰু শিক্ষকসকলৰ মাজত আশাৰ সঞ্চাৰ হৈছে।
জামিয়াৰ প্ৰাক্তন ছাত্ৰ চৈয়দ আনোৱাৰ কাফীয়ে ছ’চিয়েল মিডিয়াত লিখিছে, “অৱশেষত অপেক্ষাৰ অন্ত পৰিল। জামিয়া মিলিয়া ইছলামিয়াই নতুন উপাচাৰ্য লাভ কৰিছে। আশাকৰোঁ জামিয়াই তেওঁৰ নেতৃত্বত নতুন উচ্চতা স্পৰ্শ কৰিব।” উল্লেখ্য যে, অধ্যাপক মাজহাৰ আছিফৰ শৈক্ষিক প্ৰমাণপত্ৰ আৰু অভিজ্ঞতাই তেওঁৰ সৰ্বোচ্চ শক্তি। পাৰ্চী সাহিত্য, চুফীবাদ, মধ্যযুগীয় ভাৰতীয় ইতিহাস আদি ক্ষেত্ৰত তেওঁ উল্লেখযোগ্য অৱদান আগবঢ়াইছে।
তেওঁ ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ৰ বহুতো বিশিষ্ট শিক্ষা সংস্থা আৰু সমিতিত কাৰ্যনিৰ্বাহ কৰি আহিছে। তেওঁৰ নেতৃত্বত জামিয়া মিলিয়া ইছলামিয়াই শিক্ষা আৰু গৱেষণাৰ ক্ষেত্ৰত আৰু আগবাঢ়িব বুলি আশা কৰা হৈছে। অধ্যাপক মাজহাৰ আছিফৰ নিযুক্তি জামিয়া মিলিয়া ইছলামিয়াৰ বাবে এক টাৰ্নিং পইণ্ট হিচাপে পৰিগণিত হৈছে।
