মুম্বাই
বলীউডৰ ছুপাৰষ্টাৰ শ্বাহৰুখ খানে যোৱা ৫ নৱেম্বৰত মৃত্যুৰ ভাবুকি আৰু ৫০ লাখ টকাৰ দাবী লাভ কৰিছিল। ভাবুকিটো মুম্বাইৰ বান্দ্ৰা আৰক্ষী থানালৈ ফোনযোগে দিয়া হৈছিল। ফোন নম্বৰটো অধিবক্তা ফৈজান খানৰ বুলি বিচাৰি উলিওৱা হৈছে। অৱশ্যে অধিবক্তাজনে দাবী কৰিছে যে তেওঁক প্ৰৱন্ধিত কৰা হৈছে কিয়নো তেওঁ শ্বাহৰুখ খানৰ বিৰুদ্ধে ১৯৯৪ চনৰ 'আনজাম' চলচ্চিত্ৰত হৰিণ চিকাৰ সংলাপৰ বিৰুদ্ধে গোচৰ ৰুজু কৰিছিল।
ছত্তীশগড়ৰ ৰায়পুৰৰ অধিবক্তা ফৈজান খানে ২ নৱেম্বৰত তেওঁৰ ফোনটো চুৰি হোৱা বুলি দাবী কৰে আৰু ইতিমধ্যে তেওঁ চুৰি সন্দৰ্ভত এজাহাৰ দাখিল কৰিছিল। তেওঁৰ ফোনটোৰ অপব্যৱহাৰ কৰি কোনোবাই মৃত্যুৰ ভাবুকি দিছিল বুলি অভিযোগ উত্থাপন কৰিছে।
সোধ-পোছৰ সময়ত ফৈজান খানে নিজৰ নিৰ্দোষতাৰ ওপৰত জোৰ দি কয় যে ভাবুকি দিয়া ফোনটোৰ সৈতে তেওঁৰ কোনো সম্পৰ্ক নাই, আৰু কোনোবাই হয়তো তেওঁক প্ৰৱন্ধিত কৰিবলৈ চেষ্টা কৰিছে।
তেওঁ আৰু প্ৰকাশ কৰে যে তেওঁ শ্বাহৰুখ খানৰ বিৰুদ্ধে পূৰ্বতে ধৰ্মীয় গোটৰ মাজত শত্ৰুতা প্ৰচাৰ কৰা বুলি অভিযোগ কৰিছিল। বান্দ্ৰা থানাত দাখিল কৰা এই এজাহাৰত ১৯৯৪ চনৰ 'অঞ্জাম' ছবিখনৰ এটা দৃশ্যৰ উল্লেখ কৰা হৈছে, য’ত শ্বাহৰুখ খানৰ চৰিত্ৰটোৱে তেওঁৰ বাহনত থকা হৰিণাৰ মৃতদেহৰ বিষয়ে তেওঁৰ চাকৰক অৱগত কৰা দেখা গৈছে।
ফৈজান খানে আৰু অভিযোগ কৰে যে শ্বাহৰুখ খানৰ সন্দেহজনক উপাদানৰ সৈতে সম্পৰ্ক থাকিব পাৰে যদিও এই দাবীক প্ৰমাণ কৰিবলৈ কোনো নিৰ্দিষ্ট প্ৰমাণ দাখিল কৰা হোৱা নাই।
এটা ব্যক্তিগত নিউজ চেনেলৰ সৈতে হোৱা কথা-বতৰাত ফৈজান খানে কয়, "মোৰ ফোনটো হেৰাইছে, মই ইতিমধ্যে এজাহাৰ দাখিল কৰিছোঁ। আজি মুম্বাই আৰক্ষী মোৰ ঘৰলৈ আহিছিল আৰু তেওঁলোকে ফোনটোৰ বিষয়ে সুধিছিল। মই তেওঁলোকক ক'লোঁ যে মই এজন অধিবক্তা, মোৰ ফোনটো হেৰাইছে, আৰু কোনে ফোন কৰিছে নাজানো।"
তেওঁ কয় যে তেওঁক আৰক্ষীয়ে দুঘণ্টাৰো অধিক সময় সোধা-পোছা কৰিছিল, আৰু তেওঁক জাননী দিয়া হৈছে। তেওঁ আৰু দাবী কৰে যে তেওঁৰ ফোন নম্বৰৰ সৈতে লিংক কৰা হোৱাটছএপটো চুৰি হোৱা মোবাইল ফোনটো নহয়, বেলেগ এটা ফোনতহে পোৱা গৈছে। তেওঁ কয় যে চুৰি হোৱা ফোনটোত বেলেগ চিম কাৰ্ড ব্যৱহাৰ কৰি কল কৰা হৈছিল আৰু হোৱাটছএপৰ জৰিয়তে নহয়।
"মই আৰক্ষীক কৈছোঁ যে তেওঁলোকে কল কৰিবলৈ ব্যৱহাৰ কৰা ফোনটো ট্ৰেক কৰিব লাগে," ফাইজান খানে কয়। তেওঁ লগতে কয় যে যেতিয়া ভাবুকিৰ ফোন কৰা হৈছিল, তেতিয়া তেওঁ আদালতত আছিল।
'অঞ্জাম' চিনেমাৰ সংলাপত আপত্তি কৰা সন্দৰ্ভত ফৈজান খানে কয়, "মোৰ বহু বিষ্ণয় সম্প্ৰদায়ৰ বন্ধু আছে। তেওঁলোকৰ ২৯টা নীতি আছে, য'ত হৰিণ হত্যা নিষিদ্ধ কৰা নীতিও আছে। সেয়েহে, যদি এজন মুছলমান ব্যক্তিয়ে এনে মন্তব্য কৰে, ই দুটা সম্প্ৰদায়ৰ মাজত বিভেদ সৃষ্টি কৰিব পাৰে। সেইকাৰণে মই এটা অভিযোগ দাখিল কৰিছিলো আৰু ছবিখনৰ ওপৰত নিষেধাজ্ঞা আৰু এখন এজাহাৰ পঞ্জীয়ন কৰাটো বিচাৰিছিলো।"
তেওঁ আৰু দাবী কৰে যে অভিযোগ দাখিল কৰাৰ মাত্ৰ কেইদিনমানৰ পিছতে তেওঁৰ ফোনটো চুৰি হৈছিল।
ইফালে মুম্বাই আৰক্ষীয়ে বলীউডৰ ছুপাৰষ্টাৰগৰাকীক মৃত্যুৰ ভাবুকি দিয়াৰ তদন্ত অব্যাহত ৰাখিছে। আৰক্ষীৰ সূত্ৰই ইংগিত দিছে যে ভাবুকিমূলক ফোনটোৰ সময়ত ফোন কৰাজনে কেৱল “হিন্দুস্তানী” বুলি চিনাক্ত কৰিবলৈ অনুৰোধ জনাইছিল।
অভিনেতা ছলমান খানৰ বিৰুদ্ধে ক’লা হৰিণ চোৰাং চিকাৰৰ গোচৰত জড়িত থকাৰ বাতৰিৰ বাবে লৰেন্স বিষ্ণয় গেঙে অভিনেতাজনৰ বিৰুদ্ধে একেধৰণৰ ভাবুকি দিয়াৰ কিছুদিনমাৰ পাছতে এই কাণ্ড সংঘটিত হৈছে।
