অজিত ৰায়
ভাৰতৰ মোহময়ী অভিনেত্ৰী প্ৰিয়ংকা চোপ্ৰা জোনাছে কয় যে ছবি নিৰ্মাণৰ ক্ষেত্ৰত আৰব দেশ আৰু ভাৰতৰ মাজত সহযোগিতাৰ এক বৃহৎ সুযোগ আছে। ছৌদি আৰৱৰ জেদ্দাত অনুষ্ঠিত চতুৰ্থ লোহিত সাগৰীয় আন্তঃৰাষ্ট্ৰীয় চলচ্চিত্ৰ মহোৎসৱত 'Honorary Award' গ্ৰহণ কৰি প্ৰিয়ংকাই এই কথা উল্লেখ কৰে। হলিউডৰ বিখ্যাত অভিনেত্ৰী ছাৰা জেচিকা পাৰ্কাৰে তেওঁক এই বঁটা প্ৰদান কৰে। বঁটা গ্ৰহণৰ সময়ত প্ৰিয়ংকাৰ সৈতে আছিল তেওঁৰ গায়ক স্বামী নিক জ’নাছ। তেওঁলোক উভয়ে এই সন্মানীয় ছবি উৎসৱৰ ৰেড কাৰ্পেটতো খোজ কাঢ়ে।
এই উপলক্ষে প্ৰিয়ংকা চোপ্ৰাৰ চলচ্চিত্ৰ কেৰিয়াৰক লৈ এখন চুটি ছবিও প্ৰদৰ্শিত হয়। প্ৰিয়ংকা চোপ্ৰাই ধন্যবাদ জ্ঞাপন ভাষণত কয় যে ৰেড ছি আন্তঃৰাষ্ট্ৰীয় চলচ্চিত্ৰ মহোৎসৱ চিনেমা জগতৰ বাবে এক নতুন ঘৰত পৰিণত হৈছে। নিজৰ প্ৰডাকচন হাউছৰ হৈ ছবি সহ-প্ৰযোজনা কৰাৰ পৰিকল্পনাৰ কথা প্ৰিয়ংকাই অতি সোনকালে ঘোষণা কৰিব বুলিও জানিবলৈ দিয়ে।
জনপ্ৰিয় অভিনেত্ৰীগৰাকীয়ে প্ৰডাকচন হাউচ খোলাৰ কাৰণ হৈছে তেওঁ কৰিব বিচৰা ভূমিকাবোৰ এতিয়ালৈকে তেওঁ লাভ কৰা নাই। “মই কৰিব বিচৰা ধৰণৰ ছবি পোৱা নাই। মোৰ প্ৰডাকচন হাউচৰ দ্বিতীয় কাৰণটো হ’ল মই দেশৰ বিভিন্ন প্ৰান্তৰ যুৱ প্ৰতিভাক চলচ্চিত্ৰ নিৰ্মাণৰ ক্ষেত্ৰত এক মঞ্চ দিব বিচাৰো। যিহেতু মই চিনেমাৰ কলা জানো।”
আন্তঃৰাষ্ট্ৰীয় চলচ্চিত্ৰ মহোৎসৱত প্ৰিয়ংকা চোপ্ৰাৰ মতবিনিময়
নতুন বছৰত তেওঁৰ তিনিখন একচন ছবি মুক্তি পাব বুলি প্ৰিয়ংকা চোপ্ৰাই জানিবলৈ দিয়ে। "মইয়ো হোৱাইট টাইগাৰ (White Tiger)ত যোগদান কৰিলোঁ, কাৰণ সেই কিতাপখন মোৰ হৃদয়ৰ ওচৰত আছিল। এতিয়াও মোৰ বহুত কাম আছে আৰু লগতে মোৰ পৰিয়ালক সময় দিব লাগিব। এতিয়াও এনে বহু কাহিনী আছে, যিবোৰ উলিয়াই অনাৰ প্ৰয়োজন আছে।" দৰ্শকৰ সৈতে মত বিনিময় কৰি প্ৰিয়ংকা চোপ্ৰাই শৈশৱৰ পৰা হলিউডলৈ যোৱা যাত্ৰাৰ বিষয়ে বিতংভাৱে কয়।
ভাৰতীয় সেনাবাহিনীৰ চিকিৎসক পিতৃ-মাতৃক প্ৰিয়ংকাই তেওঁক সমৰ্থন কৰিবলৈ আহ্বান জনাইছে। তেওঁ কয় যে ২০০০ চনত মিছ ৱৰ্ল্ডৰ খিতাপ জয় কৰাৰ সময়ত তেওঁৰ বয়স আছিল মাত্ৰ ১৮ বছৰ।
পিছলৈ তেওঁ হিন্দী চলচ্চিত্ৰ জগতত দুৰ্দান্ত অভিনয়েৰে দুবাৰকৈ ৰাষ্ট্ৰীয় চলচ্চিত্ৰ বঁটা আৰু পাঁচবাৰ ফিল্মফেয়াৰ বঁটা লাভ কৰে। ২০১৮ চনত প্ৰিয়ংকাই পদ্মশ্ৰী বঁটাও লাভ কৰে। “যেতিয়া মই ছবিত যোগদান কৰিছিলো, তেতিয়া মই ছবি জগতৰ কাকো চিনি পোৱা নাছিলো। ইমান কম বয়সতে অক্ষয় কুমাৰ আৰু ছানী দেওলৰ দৰে অভিজ্ঞ অভিনেতাৰ সৈতে কাম কৰাৰ সৌভাগ্য হৈছিল।” উল্লেখ্য যে, বেৰেলীৰ দৰে সৰু চহৰৰ এগৰাকী ছোৱালীৰ বাবে বলীউডৰ পৰা হলিউডলৈ যোৱাৰ যাত্ৰা সহজ নাছিল।
প্ৰিয়ংকাই কয় যে তেওঁৰ পিতৃ মেজৰ অশোক চোপ্ৰাই দিয়া এটা পৰামৰ্শ তেওঁ জীৱনত সদায় মনত ৰাখে। দেউতাকে তেওঁক কৈছিল যে নিজকে পানীৰ দৰে সৰল কৰি ল’ব লাগে, যাতে যিকোনো স্তৰ আৰু পৃষ্ঠত মিলি যাব পাৰি। তেওঁ সদায় সমস্যাৰ সলনি সমাধানৰ ওপৰত গুৰুত্ব দিয়ে। অভিনেত্ৰীগৰাকীয়ে কয় যে তেওঁ যিকোনো কথা সোনকালে শিকিব পাৰে বুলি বুজি পাইছিল। তেওঁ ভগৱানক বিশ্বাস কৰে, সেয়ে তেওঁ প্ৰতিটো বাধাক সুযোগ হিচাপে লৈছিল।
হলিউডৰ এগৰাকী অভিনেত্ৰীৰ সৈতে প্ৰিয়ংকা চোপ্ৰা
অক্ষয় কুমাৰৰ সৈতে তেওঁৰ প্ৰথম ছবি ‘এতৰাজ’ৰ অভিজ্ঞতাৰ কথা প্ৰকাশ কৰি তেওঁ কয় যে এয়া আছিল এক বেলেগ ধৰণৰ মহিলাৰ চৰিত্ৰ। ‘ছোনিয়াৰ চৰিত্ৰত অভিনয় কৰাটো আছিল এক প্ৰত্যাহ্বান। তদুপৰি, চলচ্চিত্ৰ জগতখনত মোৰ কোনো অভিজ্ঞতা নাছিল। মই ভাবিছিলো যে ছবিখনত মোৰ চৰিত্ৰটো বিচাৰ কৰা উচিত নহয়। 'কৃশ' ছবিখনতো একেই ঘটনা ঘটিছিল। এয়া ভাৰতৰ প্ৰথমটো ডাঙৰ ছুপাৰমেন আছিল। তাৰ পিছত মধুৰ ভাণ্ডাৰকাৰে মোক ‘ফেশ্বন’ত মুখ্য চৰিত্ৰৰ বাবে চুক্তিবদ্ধ কৰিছিল।”-প্ৰিয়ংকাই কয়।
তেওঁ পুনৰ কয়, ‘চলচ্চিত্ৰ জগতত মোৰ কোনো গডফাদাৰ নাছিল। মই কোনো ছবিৰ সৈতে জড়িত শক্তিশালী পৰিয়ালৰ সন্তান নাছিলোঁ। যিখিনি পালোঁ মোৰ কষ্ট, পিতৃ-মাতৃৰ আশীৰ্বাদ আৰু ঈশ্বৰৰ কৃপাৰ বাবে।”
তেওঁ কয়, "অনুৰাগ বসুৱে যেতিয়া মোক ‘বৰফী’ৰ কাহিনীটো ক’লে, প্ৰথমতে মই ভাবিছিলো যে মই এই চৰিত্ৰটো কৰিব নোৱাৰিম, কিন্তু ঢৌৰ বিপৰীতে যোৱাটো মোৰ অভ্যাস হৈ পৰিছে। সেই সময়ত ৰণবীৰ কাপুৰে নিউয়ৰ্কত অঞ্জনা অঞ্জানী ছবিখনৰ শ্বুটিং কৰি আছিল। মই এটা ইভেণ্টলৈ যাবলৈ খৰখেদা কৰিছিলোঁ। অনুৰাগ বসুৱে কৈছিল ঠিক আছে, তেওঁ মোক পিছত লগ কৰিব আৰু এখন ছবিৰ বাবে। মই তেওঁক পাঁচ দিনৰ সময় বিচাৰিছিলো। সেইখিনি সময়ত মই বিশেষভাৱে সক্ষম শিশুৰ স্কুললৈ গৈ সেই ল'ৰা-ছোৱালীবোৰৰ সৈতে সময় কটাও, তেওঁলোকৰ পৰা বহুত কথা শিকো। মই বহুতো ভিডিঅ'ও চাইছিলো। তাৰ পিছত চেটলৈ আহিলোঁ।"
