নতুন দিল্লী
জ্বৰ, বিষ, চৰ্দি আৰু এলাৰ্জীৰ চিকিৎসাৰ বাবে ব্যৱহাৰ কৰা ১৫৬টা বহুলভাৱে বিক্ৰী হোৱা ফিক্সড ড’জ কম্বিনেচন (এফডিচি) ঔষধ নিষিদ্ধ কৰি কেন্দ্ৰই কয় যে, এই ঔষধে মানুহৰ বাবে বিপদ কঢ়িওৱাৰ সম্ভাৱনা আছে। এফ ডি চি ঔষধ হ'ল সেইবোৰ যিবোৰত দুটা বা তাতকৈ অধিক সক্ৰিয় ঔষধ উপাদানৰ সংমিশ্ৰণ নিৰ্দিষ্ট অনুপাতত থাকে আৰু ইয়াক "ককটেল" ঔষধ বুলিও কোৱা হয়।
বিশেষজ্ঞ সমিতি আৰু শীৰ্ষ পেনেল ড্ৰাগছ টেকনিকেল এডভাইজাৰী ব'ৰ্ডে (ডিটিএবি) এন্টিবেক্টেৰিয়েল ঔষধকে ধৰি এই সংমিশ্ৰণসমূহৰ চিকিৎসামূলক ন্যায্যতা নাই আৰু মানৱ স্বাস্থ্যৰ প্ৰতি বিপদৰ সৃষ্টি কৰা বুলি ধৰা পৰাৰ পিছতে এই সিদ্ধান্ত গ্ৰহণ কৰিছে।
কেন্দ্ৰীয় স্বাস্থ্য মন্ত্ৰালয়ে ১২ আগষ্টত জাৰি কৰা চৰকাৰী অধিসূচনা অনুসৰি নিষিদ্ধ ঔষধসমূহৰ ভিতৰত আছে জনপ্ৰিয় সংমিশ্ৰণ যেনে 'এচিক্ল’ফেনক ৫০মিলিগ্ৰাম + পেৰাচিটামল ১২৫মিলিগ্ৰাম টেবলেট', মেফেনামিক এচিড + পেৰাচিটামল ইনজেকচন, চেটিৰিজিন এইচ চি এল + পেৰাচিটামল + ফেনিলেফ্ৰিন এইচ চি এল, লেভ’চেটিৰিজিন + ফেনাইলফ্ৰিন এইচ চি এল + পেৰাচিটামল, পেৰাচিটামল + ক্ল’ৰফেনিৰামাইন মেলেট + ফেনাইল প্ৰ’পেন’লামাইন, আৰু কেমাইলফিন ডাইহাইড্ৰ’ক্লৰাইড ২৫ মিলিগ্ৰাম + পেৰাচিটামল ৩০০মিলিগ্ৰাম। ইয়াৰ উপৰিও পেৰাচিটামল, ট্ৰেমাডল, ট’ৰিন আৰু কেফেইনৰ সংমিশ্ৰণো নিষিদ্ধ কৰা হৈছিল, কিয়নো ট্ৰেমাডল অপিঅ’ইড ভিত্তিক বিষনাশক।
ড্ৰাগছ এণ্ড প্ৰসাধন সামগ্ৰী আইন, ১৯৪০ৰ ২৬এ ধাৰাত চৰকাৰে ক্ষতিকাৰক বা অপ্ৰয়োজনীয় বুলি গণ্য কৰা ঔষধ নিৰ্মাণ, বিক্ৰী আৰু বিতৰণত নিষেধাজ্ঞা জাৰি কৰিছিল। ডিটিএবিয়ে জোৰ দি কয় যে কোনো ধৰণৰ নিয়ন্ত্ৰণ বা নিষেধাজ্ঞাই ৰোগীৰ ক্ষেত্ৰত এই এফডিচিসমূহ ব্যৱহাৰ কৰাটো ন্যায্যতা প্ৰদান কৰিব নোৱাৰে, যাৰ ফলত জনস্বাস্থ্যৰ স্বাৰ্থত সম্পূৰ্ণ নিষেধাজ্ঞাৰ সিদ্ধান্ত লোৱা হয়।
অধিসুচনাত উল্লেখ কৰা হৈছে যে, কেন্দ্ৰই নিযুক্তি দিয়া বিশেষজ্ঞ সমিতিখনে বিষয়টো পৰীক্ষা কৰিছিল, যিয়ে এই এফডিচিসমূহক 'অযুক্তিকৰ' বুলি গণ্য কৰিছে। লগতে উল্লেখ কৰা হৈছে যে, ডিটিএবিয়ে এই এফডিচিসমূহো পৰীক্ষা কৰিছিল আৰু পৰামৰ্শ দিছিল যে 'এই এফডিচিসমূহত থকা উপাদানসমূহৰ কোনো চিকিৎসামূলক ন্যায্যতা নাই'।
অধিসূচনাখনত কোৱা হৈছে যে, "এফ ডি চিৰ সৈতে মানুহৰ বাবে বিপদ জড়িত হ'ব পাৰে। সেয়েহে বৃহত্তৰ জনস্বাৰ্থৰ বাবে ১৯৪০ চনৰ ড্ৰাগছ এণ্ড প্ৰসাধন সামগ্ৰী আইন ২৬ এৰ অধীনত এই এফ ডি চিৰ নিৰ্মাণ, বিক্ৰী বা বিতৰণ নিষিদ্ধ কৰাটো প্ৰয়োজনীয়। ওপৰৰ কথাবোৰৰ প্ৰতি লক্ষ্য ৰাখি ৰোগীৰ ক্ষেত্ৰত যিকোনো ব্যৱহাৰৰ অনুমতি দিবলৈ যিকোনো ধৰণৰ নিয়ন্ত্ৰণ বা নিষেধাজ্ঞা ন্যায্য নহয়। গতিকে ২৬এ ধাৰাত কেৱল নিষেধাজ্ঞাৰ পৰামৰ্শ দিয়া হৈছে।"
ডিটিএবিৰ পৰামৰ্শৰ পিছতে অধিসূচনাখনত উল্লেখ কৰা হৈছে যে, "কেন্দ্ৰীয় চৰকাৰ সন্তুষ্ট যে, দেশত উক্ত ঔষধৰ উৎপাদন, বিক্ৰী আৰু মানৱ ব্যৱহাৰৰ বাবে বিতৰণত নিষেধাজ্ঞা আৰোপ কৰাটো জনস্বাৰ্থত প্ৰয়োজনীয় আৰু সুবিধাজনক।"
এই তালিকাত কিছুমান বিশেষ সামগ্ৰী অন্তৰ্ভুক্ত কৰা হৈছে, যিবোৰ ইতিমধ্যে বহু ঔষধ নিৰ্মাতাই বন্ধ কৰি দিছিল। যোৱা বছৰৰ জুন মাহত মূল তালিকাৰ ১৪টা এফ ডি চি নিষিদ্ধ কৰা হৈছিল আৰু শেহতীয়াকৈ নিষিদ্ধ কৰা বহু ঔষধো মূল তালিকাৰ অংশ আছিল।
২০১৬ চনত বিশেষজ্ঞৰ পেনেলে বৈজ্ঞানিক তথ্য অবিহনে বিক্ৰী কৰা বুলি ধৰা পৰাৰ পিছত কেন্দ্ৰই ৩৪৪টা ঔষধৰ সংমিশ্ৰণ নিষিদ্ধ কৰিছিল। এই নিষেধাজ্ঞাক নিৰ্মাতাসকলে আদালতত প্ৰত্যাহ্বান জনাইছিল যদিও পিছত ডিটিএবিয়ে পৰামৰ্শ দিছিল যে, সেই সংমিশ্ৰণসমূহৰ ৩২৮টা 'অযুক্তিকৰ' আৰু ইয়াক নিষিদ্ধ কৰা উচিত।
