কলকাতা
আৰ জি কৰ মেডিকেল কলেজ এণ্ড হস্পিতালৰ ধৰ্ষণ আৰু হত্যাৰ বিৰুদ্ধে প্ৰতিবাদৰ প্ৰকৃত লক্ষ্য তেওঁৰ চৰকাৰ উৎখাত কৰা বুলি ইংগিত দি, পশ্চিম বংগৰ মুখ্যমন্ত্ৰী মমতা বেনাৰ্জীয়ে বৃহস্পতিবাৰে ন্যায়ৰ স্বাৰ্থত “নিজৰ চকী এৰিবলৈ সাজু” বুলি কয়।
এক বিবৃতিযোগে মমতা বেনাৰ্জীয়ে কয় যে কলকাতাৰ আৰ জি কৰ মেডিকেল কলেজ এণ্ড হস্পিতালত এগৰাকী প্ৰশিক্ষাৰ্থী চিকিৎসকক ধৰ্ষণ আৰু হত্যাৰ প্ৰতিবাদ সাব্যস্ত কৰা চিকিৎসকৰ সৈতে আলোচনাত মিলিত হ’বলৈ তেওঁৰ চৰকাৰ প্ৰতিশ্ৰুতিবদ্ধ। উচ্চতম ন্যায়ালয়ে ১০ ছেপ্টেম্বৰৰ সন্ধিয়াৰ ভিতৰত কৰ্মক্ষেত্ৰলৈ ঘূৰি যাবলৈ নিৰ্দেশ দিয়াৰ পিছতো চিকিৎসকসকলে ধৰ্মঘট অব্যাহত ৰাখিছে।
"মই জানো যে বেছিভাগ চিকিৎসকে এই বৈঠকত আগ্ৰহী আছিল। কিন্তু আমি জানিব পাৰিছো যে মুষ্টিমেয় মানুহ আছে যিয়ে অচলাৱস্থাৰ সৃষ্টি কৰিব বিচাৰিছে।"
বিশদ বিৱৰণ নোলোৱাকৈ মুখ্যমন্ত্ৰীগৰাকীয়ে ইংগিত দিয়ে যে এই প্ৰতিবাদসমূহ ৰাজনৈতিক উদ্দেশ্যপ্ৰণোদিত আৰু বাওঁপন্থীৰ সমৰ্থনত হৈ আছে।
"সাধাৰণ ৰাইজৰ ন্যায়ৰ স্বাৰ্থত মই আনকি চকী এৰিবলৈও সাজু। কিন্তু তেওঁলোকে ন্যায় নিবিচাৰে। তেওঁলোকে কেৱল চকীখন বিচাৰে।"
আন্দোলনকাৰী চিকিৎসক আৰু তৃণমূল কংগ্ৰেছ চৰকাৰৰ মাজত স্থবিৰতা অব্যাহত থকাৰ সময়তে একেৰাহে তৃতীয় দিন কোনো আলোচনা নহোৱাৰ পিছত মুখ্যমন্ত্ৰীৰ এই মন্তব্য।
মমতা বেনাৰ্জীয়ে দাবী কৰে যে তেওঁ প্ৰতিবাদকাৰী চিকিৎসকসকলক সাক্ষাৎ কৰিবলৈ ৰাজ্য সচিবালয়ত দুঘণ্টা অপেক্ষা কৰি আছিল যদিও তেওঁলোকৰ কোনো সঁহাৰি নাপালে।
চিকিৎসকসকলে ৰাজ্য সচিবালয়ত উপস্থিত হয় যদিও মুখ্যমন্ত্ৰীক সাক্ষাৎ কৰিবলৈ অস্বীকাৰ কৰে, আৰু বৈঠক লাইভ ষ্ট্ৰীমিং কৰিবলৈ দাবী জনায়।
এই সন্দৰ্ভত মমতা বেনাৰ্জীয়ে কয় যে তেওঁৰ চৰকাৰৰ লাইভ টেলিকাষ্টৰ দাবীৰ প্ৰতি কোনো আপত্তি নাই, কিন্তু বিষয়টো আদালতত থকাৰ বাবে কিছু আইনী বাধ্যবাধকতা আছে।
"স্বচ্ছতা আৰু প্ৰক্ৰিয়াটোৰ সঠিক নথিপত্ৰৰ বাবে বৈঠকখন ৰেকৰ্ডিং কৰাৰ বাবে আমাৰ সম্পূৰ্ণ ব্যৱস্থা আছে। আনকি যদি উচ্চতম ন্যায়ালয়ৰ অনুমতি দিয়ে ৰেকৰ্ডিংটো শ্বেয়াৰ কৰিবলৈও আমি সাজু আছো।"
"যিহেতু গোচৰটো বিচাৰাধীন, আমি ইয়াক এনেদৰে আলোচনা কৰিব নোৱাৰো। সেইবাবেই আমাৰ কাৰ্য্যবিধি ৰেকৰ্ড কৰাৰ সুবিধা আছিল।" - তেওঁ লগতে কয়।
"আমি ডাক্তৰ আৰু ৰোগীৰ স্বাৰ্থত মুকলি আলোচনাৰ আশাবাদী আছিলো... আমি ১৫ জন চিকিৎসকৰ প্ৰতিনিধি দল বিচাৰিছিলোঁ যদিও তেওঁলোক ৩৪ জন লৈ আহিছিল আৰু তথাপিও আমি এখন বৈঠক অনুষ্ঠিত কৰাৰ সিদ্ধান্ত লৈছিলো। কিন্তু তথাপিও তেওঁলোকে সভাত প্ৰৱেশ কৰিবলৈ অস্বীকাৰ কৰিছিল।" তেওঁ আৰু কয়।
মুখ্যমন্ত্ৰীগৰাকীয়ে কয় যে চিকিৎসকৰ ধৰ্মঘটৰ বাবে যোৱা এমাহত চৰকাৰী চিকিৎসালয়ত চিকিৎসা সেৱাৰ অভাৱত ২৭ জন ৰোগীৰ মৃত্যু হৈছে।
"চিকিৎসা অবিহনে আৰ জি কাৰ হাস্পতালত শেহতীয়াকৈ এজন দুৰ্ঘটনাগ্ৰস্ত ৰোগীৰ মৃত্যু হৈছে... তেওঁৰ মাক আৰু পৰিয়ালৰ কথা কি ক'ব?" তেওঁ সুধিলে।