জয়পুৰ
ৰাজস্থানৰ বেয়াৱাৰত এচিড ফেক্টৰীৰ গুদামৰ ভিতৰত মজুত টেংকাৰৰ পৰা নাইট্ৰ’জেন গেছ নিৰ্গত হোৱাত এজন লোকৰ মৃত্যু হোৱাৰ লগতে ৪০ জন লোক ক্ষতিগ্ৰস্ত হয়। মৃত্যু হোৱা ব্যক্তিজন আছিল কাৰখানাৰ মালিক সুনীল সিংঘাল, যিয়ে গোটেই নিশাটো নিৰ্গত হোৱা গেছ নিয়ন্ত্ৰণ কৰিবলৈ চেষ্টা কৰি আছিল, যদিও ইয়াৰ প্ৰভাৱত হাৰ মানিছিল। পিছত তেওঁৰ স্বাস্থ্যৰ অৱনতি ঘটিছিল, আৰু তেওঁক আজমেৰৰ এখন চিকিৎসালয়লৈ প্ৰেৰণ কৰা হৈছিল, আৰু পিছত তেওঁৰ মৃত্যু হয়।
সোমবাৰে নিশা প্ৰায় ১০ বজাত বেয়াৱাৰ থানাৰ অন্তৰ্গত বদিয়া অঞ্চলৰ সুনীল ট্ৰেডিং কোম্পানীত সংঘটিত হোৱা এই ঘটনাত কেইবাটাও পোহনীয়া জন্তু আৰু পদপথৰ জন্তুৰ মৃত্যুও হয়।
সূত্ৰ অনুসৰি কোম্পানীটোৰ গুদামত মজুত থকা টেংকাৰৰ পৰা নাইট্ৰ’জেন গেছ নিৰ্গত হয়। লিকটো ইমানেই ভয়াৱহ আছিল যে কেইছেকেণ্ডমানৰ ভিতৰতে গেছটো ওচৰৰ আৱাসিক অঞ্চললৈ বিয়পি পৰাৰ ফলত ঘৰৰ ভিতৰৰ লোকসকলো যথেষ্ট প্ৰভাৱিত হয়। বহু বাসিন্দাই শ্বাসৰুদ্ধ আৰু চকুৰ বিষ অনুভৱ কৰাৰ ফলত ৬০ জনতকৈ অধিক লোকক চিকিৎসাৰ বাবে বেৱাৰৰ চৰকাৰী আৰু ব্যক্তিগত চিকিৎসালয়লৈ লৈ যোৱা হয়।
এই তথ্য লাভ কৰাৰ লগে লগে আৰক্ষী, ডি এম, এছ পি, অগ্নিনিৰ্বাপক বাহিনীৰ দলকে ধৰি প্ৰশাসনিক বিষয়াই নিশা প্ৰায় ১১ বজাৰ ভিতৰতনিৰ্গত হোৱা গেছ নিয়ন্ত্ৰণ কৰিবলৈ সক্ষম হয়। সতৰ্কতামূলক ব্যৱস্থা হিচাপে কৰ্তৃপক্ষই অধিক হতাহতি ৰোধ কৰিবলৈ চাৰিওফালৰ অঞ্চল খালী কৰে। প্ৰশাসনে পৰিস্থিতিৰ ওপৰত তীক্ষ্ণ দৃষ্টি নিৰীক্ষণ অব্যাহত ৰাখিছে। গেছৰ প্ৰভাৱ কমি আহিছে যদিও বাসিন্দাসকলৰ মাজত আতংকৰ ভাৱ অব্যাহত আছে।
জিলা উপায়ুক্ত ডাঃ মহেন্দ্ৰ খাদগাৱাটে কাৰখানাটো ছীল কৰাৰ নিৰ্দেশ দি আৰক্ষীক তৎকালীনভাৱে গোচৰ ৰুজু কৰিবলৈ নিৰ্দেশ দিছে। কৰ্তৃপক্ষই লিক হোৱাৰ কাৰণৰ তদন্ত কৰি ভৱিষ্যতেও এনেধৰণৰ ঘটনা ৰোধ কৰিবলৈ অধিক সুৰক্ষা ব্যৱস্থাৰ মূল্যায়ন কৰি আছে।
ৱাৰ্ড কাউন্সিলাৰ হন্সৰাজ শৰ্মাই উল্লেখ কৰে যে, স্থানীয় এচিড কাৰখানাৰ পৰা গেছ নিৰ্গত হোৱাৰ বিষয়ে বাসিন্দাসকলে তেওঁক অৱগত কৰে। তেওঁ তৎক্ষণাত অগ্নিনিৰ্বাপক বাহিনী আৰু প্ৰশাসনক সতৰ্ক কৰি দিয়ে। ঘটনাস্থলীত উপস্থিত হৈ অগ্নিনিৰ্বাপক বাহিনীৰ দলটোৱে নিশা ১১ বজাৰ ভিতৰত লিকেজ নিয়ন্ত্ৰণ কৰিবলৈ সক্ষম হয়। স্থানত উপস্থিত থকা এছডিএম দিব্যাংশ সিঙে নিশ্চিত কৰে যে লিক হোৱা গেছটো নাইট্ৰ’জেন আছিল।
প্ৰশাসনে ওচৰৰ বাসিন্দাসকলক পৰিস্থিতি নিয়ন্ত্ৰণত থকা বুলি আশ্বাস দিয়ে। ভৱিষ্যতে কোনো ধৰণৰ ঘটনা ৰোধ কৰিবলৈ কৰ্তৃপক্ষই এচিড কাৰখানাটোৰ সুৰক্ষা পৰিদৰ্শনৰো নিৰ্দেশ দিছে।
গেছ নিৰ্গত হোৱাৰ বাবে ৰাসায়নিক কাৰখানাটোৰ আশে-পাশে বাস কৰা লোকসকলে উশাহ লোৱাত অসুবিধা পাইছিল। গেছৰ প্ৰভাৱ কমোৱাৰ বাবে সেই স্থানত উপস্থিত হোৱা স্থানীয় প্ৰশাসন আৰু অগ্নিনিৰ্বাপক বাহিনীৰ কৰ্মচাৰীয়ে টেংকাৰখনৰ ওপৰত পানী ঢালি ঢাকনিখন বন্ধ কৰি দিয়ে, তাৰ পিছত পৰিস্থিতি নিয়ন্ত্ৰণ কৰা হয়।
এই ঘটনাই সমগ্ৰ অঞ্চলটোত আতংক বিয়পাইছে। প্ৰশাসনে ৰাইজক সতৰ্ক হৈ থাকিবলৈ আৰু প্ৰয়োজনীয় সুৰক্ষা ব্যৱস্থা গ্ৰহণ কৰিবলৈ নিৰ্দেশ দিছে যাতে আৰু কোনো দুৰ্ঘটনা সংঘটিত নহয়। গেছ আক্ৰান্ত লোকসকলৰ চিকিৎসা চলি আছিল। একে সময়তে প্ৰশাসনৰ দলটোৱে দুৰ্ঘটনাটোৰ তদন্ত আৰম্ভ কৰিছে।
