ইম্ফল
মণিপুৰত ৰাষ্ট্ৰপতিৰ শাসন চলি থকা স্বত্ত্বেও পৰিস্থিতি শান্ত হোৱা নাই। ইম্ফল, চুৰাচান্দপুৰকে ধৰি কেইবাখনো জিলা শেহতীয়াকৈ পুনৰ অস্থিৰ হৈ পৰিছে। এনে পৰিস্থিতি নিয়ন্ত্ৰণৰ বাবে মণিপুৰত সশস্ত্ৰ বাহিনীৰ বিশেষ ক্ষমতা আইন (AFSPA) সম্প্ৰসাৰণ কৰা হৈছে। দেওবাৰে গৃহ মন্ত্ৰালয়ে এই কথা ঘোষণা কৰে।
গৃহ মন্ত্ৰালয়ে জাৰি কৰা এক অধিসূচনাত উল্লেখ কৰা হৈছে যে মণিপুৰৰ ৫খন জিলাৰ ১৩টা থানা এলেকাৰ বাহিৰে সমগ্ৰ ৰাজ্যতে আফস্পাৰ সময়সীমা বৃদ্ধি কৰা হৈছে। কোনো কোনো ঠাইত নতুন ধৰণেও আইন বলবৎ কৰা হৈছে। মন কৰিবলগীয়া যে যোৱা বছৰৰ শেষৰ ফালে মণিপুৰত আফস্পাৰ বৈধতা ছমাহৰ বাবে বৃদ্ধি কৰা হৈছিল।
ইম্ফল, বিষ্ণুপুৰ, জিৰিবামকে ধৰি ১৯টা থানা এলেকা বাদ দি ৰাজ্যৰ বাকী অংশত এই আইনৰ বৈধতা পুনৰ বৃদ্ধি কৰা হয়। এইবাৰ ১৩টা থানা বাদ দি সমগ্ৰ ৰাজ্যত সশস্ত্ৰ বাহিনীৰ বিশেষ ক্ষমতা আইন কাৰ্যকৰী কৰাটো গুৰুত্বপূৰ্ণ বিবেচিত হৈছে, কিয়নো সম্প্ৰতি মণিপুৰত ৰাষ্ট্ৰপতিৰ শাসন চলি আছে।
আফস্পা আইনৰ ম্যাদ বৃদ্ধিৰে গৃহ পৰিক্ৰমা মন্ত্ৰালয়ে আগন্তুক ছমাহৰ বাবে সমগ্ৰ মণিপুৰ ৰাজ্যক ‘অশান্ত এলেকা’ হিচাপে ঘোষণা কৰিছে। ২০২৫ চনৰ ১ এপ্ৰিলৰ পৰা কাৰ্যকৰী হ’ব এই নতুন নিৰ্দেশনা। ৰাজ্যখনৰ নিৰাপত্তা বজাই ৰখা আৰু বিদ্ৰোহী সংগঠনৰ কাৰ্যকলাপ নিয়ন্ত্ৰণৰ বাবে এই পদক্ষেপ লোৱা বুলি অধিসূচনাত উল্লেখ কৰা হৈছে।
মণিপুৰৰ উপৰিও টিৰাপ, চাংলাং আৰু লংডিং জিলাৰ লগতে অৰুণাচল প্ৰদেশৰ তিনিখন থানাতো আফস্পাৰ সময়সীমা ছমাহৰ বাবে বৃদ্ধি কৰা হৈছে। তদুপৰি নাগালেণ্ডৰ ৮খন জিলা আৰু আন পাঁচখন জিলাৰ ২১টা থানা এলেকাকো আফস্পাৰ অধীনলৈ অনা হৈছে। অসমৰ তিনিচুকীয়া, চৰাইদেউ, আৰু শিৱসাগৰ জিলাত ১ এপ্ৰিল, ২০২৪ৰ পৰা কাৰ্যকৰী হোৱাকৈ সশস্ত্ৰ বাহিনীৰ বিশেষ ক্ষমতা আইনখন আৰু ছমাহৰ বাবে বৃদ্ধি কৰা হৈছে। ইফালে, কেন্দ্রীয় গৃহ মন্ত্র্যালয়ে ডিব্রুগড় জিলাত এই আইন বাতিল কৰিছে।
