আশা খোছা/নতুন দিল্লী
জম্মু-কাশ্মীৰৰ আগন্তুক নিৰ্বাচনত পাঁচ বছৰীয়া কাৰ্যকালৰ বাবে বিধানসভা গঠন কৰা হ’ব। এইটো এটা ডাঙৰ পৰিৱৰ্তন হিচাপে চিহ্নিত হৈছে, কিয়নো জম্মু-কাশ্মীৰ হৈছে ভাৰতৰ একমাত্ৰ ৰাজ্য য’ত বিধানসভাই ৪৯ বছৰ ধৰি ছবছৰীয়া কাৰ্যকাল সম্পূৰ্ণ কৰিছিল। এই অদ্ভুত নিয়মৰ কাৰণ আছিল ভাৰতীয় সংবিধানৰ ৩৭০ অনুচ্ছেদৰ অধীনত জম্মু আৰু কাশ্মীৰে লাভ কৰা বিশেষাধিকাৰ আৰু একাংশ ন্যস্ত স্বাৰ্থজড়িত লোক আৰু ৰাজনৈতিক নেতাৰ ক্ষমতাৰ অপব্যৱহাৰ।
১৯৭৫ চনত ইন্দিৰা গান্ধীয়ে ঘোষণা কৰা জৰুৰীকালীন অৱস্থাত লোকসভাৰ কাৰ্যকাল পাঁচ বছৰৰ পৰা ছয় বছৰলৈ সলনি কৰা হৈছিল। জম্মু-কাশ্মীৰকে ধৰি সকলো ৰাজ্যই এই নিয়ম তাত্ক্ষণিকভাৱে অনুসৰণ কৰিছিল। কিন্তু ১৯৭৭ চনত ইন্দিৰা গান্ধীয়ে নিৰ্বাচনত পৰাস্ত হোৱাৰ লগে লগে জৰুৰীকালীন অৱস্থাৰ অন্ত পৰে আৰু লোকসভা আৰু বিধানসভাৰ কাৰ্যকাল পাঁচ বছৰলৈ ঘূৰাই অনা হয়। কিন্তু জম্মু-কাশ্মীৰৰ বিধায়কসকলে ৰাজকোষৰ মূল্যত অতিৰিক্ত এবছৰ বিশেষ সুবিধাপ্ৰাপ্ত জীৱন লাভ কৰিবলৈ ছবছৰৰ কাৰ্যকালৰ নিয়ম অব্যাহত ৰাখিছিল।
এইদৰে, কাশ্মীৰৰ ৰাজনৈতিক দলসমূহে ২০১৪ চনৰ নিৰ্বাচনৰ তুলনাত ১৮ ছেপ্টেম্বৰৰ পৰা আৰম্ভ হ’বলগীয়া আগন্তুক নিৰ্বাচনত আৰু বহু পৰিৱৰ্তনৰ সৈতে মোকাবিলা কৰিব লাগিব। আটাইতকৈ স্পষ্ট পৰিৱৰ্তন হৈছে অঞ্চলটোলৈ অহা ব্যাপক শান্তি, আৰু কাশ্মীৰ অঞ্চলত পাকিস্তানৰ পৃষ্ঠপোষকতাত হোৱা সন্ত্ৰাসবাদৰ ফলত হোৱা হিংসাৰ ঘটনা দ্ৰুতগতিত হ্ৰাস পোৱাৰ ঘটনা।
নিজ দলৰ সদস্যসকলৰ সৈতে ৰাষ্ট্ৰীয় সন্মিলনৰ নেতা ফাৰুক আব্দুল্লা
১৮, ২৫ ছেপ্টেম্বৰ আৰু ১ অক্টোবৰত অনুষ্ঠিত হ'বলগীয়া নিৰ্বাচনত তলত উল্লেখ কৰা ধৰণৰ কিছুমান ডাঙৰ পৰিৱৰ্তন দেখিবলৈ পোৱা যাবঃ
জম্মু-কাশ্মীৰ এতিয়া স্বায়ত্তশাসিত ক্ষমতা থকা ৰাজ্য নহয়। ইয়াৰ ক্ষমতা আন ভাৰতীয় ৰাজ্যসমূহৰ দৰেই। পাঁচ বছৰ পূৰ্বে ভাৰতীয় সংবিধানৰ ৩৭০ নং অনুচ্ছেদ প্ৰত্যাহ্বাৰ কৰাৰ লগে লগে ইয়াৰ পৃথক সংবিধান আৰু ৰাজ্যিক পতাকা নাইকীয়া হৈ যায়।
ৰাজ্যখন দুখন কেন্দ্ৰীয় শাসিত অঞ্চলত বিভক্ত হোৱাৰ পিছত এতিয়া লাডাখ জম্মু-কাশ্মীৰৰ অংশ নহয়। ৩৭০ অনুচ্ছেদ আঁতৰি যোৱাৰ ফলত পূৰ্বে এই অধিকাৰৰ পৰা বঞ্চিত হোৱা ভাৰতীয় নাগৰিকৰ গোটক ভোটাধিকাৰ দিয়া হৈছে। এই ভোটাৰৰ ভিতৰত আছে পশ্চিম পাকিস্তানৰ শৰণাৰ্থীসকল, যিসকলে কমেও সাত দশক ধৰি নাগৰিক অধিকাৰ অবিহনে জম্মু-কাশ্মীৰত বসবাস কৰি আহিছে।
আমোদজনক কথাটো হ’ল যিসকল লোকে লোকসভা নিৰ্বাচনত ভোটদান কৰিব পাৰিছিল, তেওঁলোকক জম্মু-কাশ্মীৰৰ স্থায়ী বাসিন্দা হিচাপে গণ্য কৰা হোৱা নাছিল আৰু এইদৰে নাগৰিক আৰু বিধানসভা নিৰ্বাচনত তেওঁলোকক ভোটাধিকাৰৰ পৰা বঞ্চিত কৰা হৈছিল।
নতুন ভোটাৰৰ গোটসমূহৰ ভিতৰত আছে যুদ্ধ আৰু বিভাজনৰ শৰণাৰ্থী, পঞ্জাৱৰ পৰা বিশেষভাৱে নিমন্ত্ৰিত অনুসূচিত জাতিৰ লোকসকল আৰু নেপালৰ গোৰ্খাসকল। পাঞ্জাবী ছাফাই কৰ্মচাৰী আৰু গোৰ্খাসকলক চৰকাৰে নিমন্ত্ৰণ কৰি এটা মান্য জীৱনৰ প্ৰতিশ্ৰুতি দিছিল যদিও তেওঁলোকক মৌলিক অধিকাৰ দিয়া হোৱা নাছিল।
লোকসভা নিৰ্বাচনৰ প্ৰচাৰৰ সময়ত কেন্দ্ৰীয় মন্ত্ৰী ড° জিতেন্দ্ৰ সিঙ
প্ৰায় ১৫০ বছৰ পূৰ্বে গোৰ্খাসকল ডোগ্ৰা সেনাৰ জোৱান হিচাপে ৰাজ্যখনলৈ আহিছিল। তেওঁলোকে জম্মু-কাশ্মীৰত শ্ৰদ্ধা-সন্মান লাভ কৰিছিল আৰু আনকি তেওঁলোকৰ সন্মানাৰ্থে ডোগ্ৰা সেনাৰ বংশ মগৰ আৰু মলৰ নামেৰে শ্ৰীনগৰত মগৰমল বাগ নামৰ এটা কলনীও স্থাপন কৰা হৈছিল। তথাপিও তেওঁলোকক বাসস্থান, চাকৰি আদিৰ অধিকাৰৰ পৰা বঞ্চিত কৰা হৈছিল। ইয়াৰে কিছুমানে ভাৰতীয় সশস্ত্ৰ বাহিনীত যোগদানৰ যোগ্যতা অৰ্জন কৰিছিল যদিও জম্মু-কাশ্মীৰ কৰ্তৃপক্ষই ডমিচাইল চাৰ্টিফিকেট প্ৰদান নকৰাত সমস্যাৰ সন্মুখীন হৈছিল।
উল্লেখ্য যে, ৭টা নতুন সমষ্টিৰ অন্তৰ্ভুক্তিৰে এইবাৰ জম্মু-কাশ্মীৰত ৯০টা বিধানসভা সমষ্টিত দলসমূহে প্ৰতিদ্বন্দ্বিতা কৰিব। ইয়াৰ কাৰণ হ’ল সীমা নিৰ্ধাৰণ আয়োগে জম্মু অঞ্চলক আৰু ছখন আসন আৰু কাশ্মীৰক এখন আসন প্ৰদান কৰি নিজ নিজ সংখ্যা ক্ৰমে ৪৩ আৰু ৪৭লৈ বৃদ্ধি কৰি।
জম্মু-কাশ্মীৰ বিধানসভাত দুগৰাকী মনোনীত মহিলা সদস্যও থাকিব আৰু লগতে সন্ত্ৰাসবাদৰ বাবে আভ্যন্তৰীণভাৱে স্থানচ্যুত হোৱা লোকৰ পৰা দুজন আৰু পিঅ'জেকে (PoJK) শৰণাৰ্থীৰ এজন ব্যক্তি থাকিব৷ এই সকলো মনোনীত সদস্যৰ ভোটাধিকাৰ থাকিব।
প্ৰতিনিধিত্বমূলক ফটো
এই পাঁচজন মনোনীত সদস্যই জম্মু-কাশ্মীৰত দলসমূহৰ মাজত শক্তি প্ৰদৰ্শনৰ ক্ষেত্ৰত গুৰুকত্বপূৰ্ণ ভূমিকা গ্ৰহণ কৰিব পাৰে। ইয়াৰ ফলত ৰাজ্যখনৰ বিধানসভাৰ কাৰ্যকৰী শক্তি ৯৫ লৈ বৃদ্ধি পায়। জম্মু-কাশ্মীৰ বিধানসভাৰ আন এটা সুকীয়া বৈশিষ্ট্য যিটো অপৰিৱৰ্তিত হৈ আছে সেয়া হ'ল পাকিস্তান অধ্যুষিত ভূখণ্ডত বাস কৰা লোকসকলৰ বাবে আন ২৪খন আসন স্থিৰ কৰি ৰখা হৈছে, যাৰ ফলত জম্মু-কাশ্মীৰ বিধানসভাৰ মুঠ আসনৰ সংখ্যা ১১৪খনলৈ বৃদ্ধি পাইছে।
অন্ততঃ কিছুমান আসন ভংগ কৰি এই অঞ্চলসমূহৰ পৰা অহা প্ৰাক্তন শৰণাৰ্থীসকলক আবণ্টন দিয়াৰ এক দাবী উত্থাপন হৈছে। এই নিৰ্বাচনৰ পৰা অনুসূচিত জনজাতিসকলে জম্মু-কাশ্মীৰত ৰাজনৈতিক সংৰক্ষণ লাভ কৰিব। নিৰ্বাচনত জনগোষ্ঠীটোৰ বাবে ৯খন আসন সংৰক্ষিত কৰা হৈছে। ইয়াৰ উপৰিও অনুসূচিত জাতিৰ বাবে ছখন সংৰক্ষিত আসন আছে।
লগতে প্ৰথমবাৰৰ বাবে জম্মু-কাশ্মীৰৰ কেন্দ্ৰীয় শাসিত অঞ্চলত নাথাকিব বিধান পৰিষদ। কেন্দ্ৰীয় শাসিত অঞ্চলটোৰ স্বাভাৱিক পৰিস্থিতিৰ এটা প্ৰমাণ হৈছে যে সন্ত্ৰাসবাদীৰ কূটাঘাতৰ পিছত সীমান্তৱৰ্তী ৰাজ্যখনৰ বাবে এইটোৱেই হ’ব আটাইতকৈ চুটি নিৰ্বাচন। আটাইতকৈ গুৰুত্বপূৰ্ণ কথাটো হ’ল আগন্তুক নিৰ্বাচনত ভোটাৰৰ বিপুল অংশগ্ৰহণৰ ভৱিষ্যদ্বাণী কৰিছে নিৰ্বাচনী বিশ্লেষক আৰু পৰ্যবেক্ষকসকলে।
