গুৱাহাটী
সকলো অভিলেখ ভংগ কৰি চলিত পর্যটন বৰ্ষত কাজিৰঙা ৰাষ্ট্ৰীয় উদ্যান দর্শন কৰিছে চাৰি লক্ষাধিক পর্যটকে। আনহাতে চলিত ২০২৪-২৫ পর্যটন বৰ্ষৰ বিগত ৬ টা মাহত ১০ কোটি ৯০ লাখ ৮৯ হেজাৰ ৩৮৯ টকা ৰাজহ সংগ্ৰহ কৰি নতুন অভিলেখ গঢ়িছে কাজিৰঙা ৰাষ্ট্ৰীয় উদ্যানে।
আজি কাজিৰঙা ৰাষ্ট্ৰীয় উদ্যান কর্তৃপক্ষৰ তৰফৰ পৰা প্ৰকাশ কৰামতে জীৱ-বৈচিত্র্যৰে চহকী কাজিৰঙা ৰাষ্ট্ৰীয় উদ্যানৰ এক খৰ্গৰ গঁড়ৰ লগতে নৈসর্গিক শোভাই ভ্রমণকাৰী তথা বন্যপ্রাণী অনুৰাগীসকলক বাৰম্বাৰ আকৰ্ষণ কৰি আহিছে। যাৰ বাবেই গঁড়ৰ লগতে ঢেঁকীয়াপতীয়া বাঘ, হাতী, ম'হ, দল হৰিণসহ 'বিগ ফাইভ'ৰ বিচৰণথলী কাজিৰঙাত বিগত ছটা মাহত ১৭ হেজাৰ ৬৯৩ গৰাকী বিদেশী পর্যটকসহ মুঠ ৪ লাখ ৬ হেজাৰ ৫৬৪ গৰাকী পর্যটকে দর্শন কৰে কাজিৰঙা ৰাষ্ট্ৰীয় উদ্যান তথা ব্যাঘ্র সংৰক্ষিত বনাঞ্চল।
উল্লেখযোগ্য যে, বিগত দুবছৰত ভুটানৰ ৰজা জিগমে খেছাৰ নামগিয়েল বাংচুকৰ উপৰি ভাৰতৰ প্ৰধানমন্ত্ৰী নৰেন্দ্ৰ মোডীয়ে কাজিৰঙা ৰাষ্ট্ৰীয় উদ্যান দর্শন কৰে। ইয়াৰ পিচতে শেহতীয়াকৈ এডভান্টেজ অসম ২.০ৰ অংশ হিচাপে দেশৰ বৈদেশিক পৰিক্ৰমা মন্ত্রী এছ জয়শংকৰে বিভিন্ন দেশৰ অর্ধশতাধিক গৰাকী ৰাষ্ট্রদূত, উচ্চাযুক্ত, প্রতিনিধিসহ দর্শন কৰে কাজিৰঙা ৰাষ্ট্ৰীয় উদ্যান। আনহাতে নিউয়র্ক টাইমছৰ এক সমীক্ষাত কাজিৰঙাই 'মাষ্ট ছী' পর্যটন গন্তব্যস্থানৰ অন্যতম শীর্ষস্থান দখল কৰে।
এনেবোৰ সুবাদতে বিশ্ব পর্যটকৰ দৃষ্টি আকর্ষণ কৰিবলৈ সক্ষম হোৱা কাজিৰঙাই বিগত ১১ টা বছৰত ৪ গুণ পর্যটক বৃদ্ধি পোৱা বুলি সদৰী কৰিছে উদ্যান কর্তৃপক্ষই। উল্লেখ্য, কাজিৰঙা ৰাষ্ট্ৰীয় উদ্যান তথা বাঘ সংৰক্ষিত বনাঞ্চলক পূব অসম বন্যপ্রাণী সংমণ্ডল, বোকাখাত, বিশ্বনাথ বন্যপ্রাণী সংমণ্ডল, বিশ্বনাথ চাৰিআলি আৰু নগাঁও বন্যপ্রাণী সংমণ্ডল, নগাঁও অনুসৰি তিনি ভাগত বিভক্ত।
এই এলেকাসমূহত বিভিন্ন পর্যটন কাৰ্যকলাপৰ সংযোজনে কাজিৰঙাৰ পৰ্যটনৰ ক্ষেত্ৰত উল্লেখযোগ্য মাত্রা প্ৰদান কৰাৰ কথা উল্লেখ কৰি উদ্যান কর্তৃপক্ষই সদৰী কৰে যে কাজিৰঙাসংলগ্ন পূব অসম বন্যপ্রাণী সংমণ্ডলৰ পাণবাৰীত পক্ষী ছাফাৰী, কঁহৰাত পৰ্যটকৰ বাবে চাইক্লিং, বিশ্বনাথ বন্যপ্রাণী সংমণ্ডলৰ পাণপুত জীপ ছাফাৰী আৰু নাও ছাফাৰী আদিৰ দৰে উদ্ভাৱনী পদক্ষেপৰ লগতে স্থানীয় সংস্কৃতি আৰু ঐতিহ্যৰ প্ৰসাৰৰ লক্ষ্যৰে লোৱা পর্যটন সম্বন্ধীয় পদক্ষেপসমূহেও স্থানীয় বাসিন্দা আৰু দর্শনার্থী উভয়ৰে হৃদয় আকৰ্ষণ কৰি কাজিৰঙাক ভ্রমণযোগ্য গন্তব্যস্থানলৈ ৰূপান্তৰিত কৰিছে।
কাজিৰঙা ষ্টাফ বেলফেয়াৰ ছ'চাইটিৰ দ্বাৰা পৰিচালিত ইক' শ্বপসমূহৰ দ্বাৰা পৰ্যটকে কাজিৰঙা সম্পৰ্কীয় স্মৃতিচিহ্নৰ লগতে দাঁতিকাষৰীয়া শিল্পী-শিপিনীৰ দ্বাৰা প্ৰস্তুত কৰা সামগ্ৰী কাজিৰঙালৈ আগমন ঘটা পর্যটকে ক্রয় কৰাত স্থানীয় লোকে অর্থনৈতিকভাবে কিছু স্বাবলম্বিতা লাভ কৰিবলৈ সক্ষম হৈছে। ইফালে কাজিৰঙালৈ দিনক দিনে পর্যটকৰ আগমন বৃদ্ধি হোৱাত পর্যটন নিবাস, অতিথিগৃহ আদিৰ সংখ্যাও বৃদ্ধি পাব ধৰিছে।
