নতুন দিল্লী
এক সূত্ৰই জনোৱা মতে, শেহতীয়াকৈ জম্মু-কাশ্মীৰত সন্ত্ৰাসবাদী আক্ৰমণ বৃদ্ধি পোৱাৰ পৰিপ্ৰেক্ষিতত দেশৰ সন্ত্ৰাসবাদ বিৰোধী ইউনিট নেশ্যনেল ছিকিউৰিটি গাৰ্ডৰ এটা বিশেষ টাস্ক ফ’ৰ্চ জম্মুত নিয়োজিত কৰা হ’ব। গৃহ পৰিক্ৰমা মন্ত্ৰালয়ৰ নিৰ্দেশৰ ভিত্তিত সন্ত্ৰাসবাদ বিৰোধী ইউনিট বাহিনী মহানগৰীখনত নিয়োজিত হ’ব বুলি সুত্ৰটোৱে প্ৰকাশ কৰিছে।
সূত্ৰসমূহে লগতে জনাইছে যে, এন এছ জিৰ বিশেষ টাস্ক ফ’ৰ্চ জম্মু চহৰত স্থায়ীভাৱে স্থাপন কৰা হ’ব, যাতে জৰুৰীকালীন বা সন্ত্ৰাসবাদী আক্ৰমণৰ ক্ষেত্ৰত যিকোনো স্থানত উপস্থিত হ’ব পাৰে। জম্মু অঞ্চলত জম্মু, ডোডা, কাঠুৱা, ৰামবন, ৰিয়াছি, কিষ্টৱাৰ, পুঞ্চ, ৰাজৌৰী, উধামপুৰ আৰু চাম্বা জিলাক সামৰি লোৱা হৈছে।
চলিত বৰ্ষত জম্মু অঞ্চলত সন্ত্ৰাসবাদী আক্ৰমণৰ যথেষ্ট উত্থান ঘটিছে, যাৰ ফলত ১০খন জিলাৰ ভিতৰত ৮খন জিলাই ক্ষতিগ্ৰস্ত হৈছে আৰু এনে ঘটনাত ১৮ জন নিৰাপত্তাৰক্ষী, ১৪ জন সাধাৰণ নাগৰিক আৰু ১৩ জন সন্ত্ৰাসবাদীকে ধৰি ৪৪ জন লোকৰ মৃত্যু হৈছে।
বিগত দশকত সন্ত্ৰাসবাদী কাৰ্যকলাপ যথেষ্ট হ্ৰাস পোৱা ৰাজৌৰী-পুঞ্চ বেল্ট পুনৰ সন্ত্ৰাসবাদী আক্ৰমণৰ কেন্দ্ৰবিন্দু হৈ পৰিছে। ২০২১ চনৰ অক্টোবৰৰ পৰা এই অঞ্চলত সেনাবাহিনীৰ বাহনসমূহক লক্ষ্য কৰি মাৰাত্মক আক্ৰমণৰ সাক্ষী হৈ আহিছে, যাৰ ফলত ৪৭ জন নিৰাপত্তাৰক্ষী, ৪৮ জন সন্ত্ৰাসবাদী আৰু ৭ জন সাধাৰণ নাগৰিককে ধৰি ১০০ জনতকৈ অধিক লোকৰ মৃত্যু হৈছে।
বৰ্ধিত সন্ত্ৰাসবাদী ভাবুকিৰ প্ৰতিহত কৰিবলৈ সেনা, আৰক্ষী, কেন্দ্ৰীয় সশস্ত্ৰ আৰক্ষী বাহিনীয়ে নিজৰ অভিযান তীব্ৰতৰ কৰি তুলিছে। ইয়াৰ ভিতৰত আছে দুৰ্বল অঞ্চলত বিশেষকৈ ঘন বনাঞ্চলত অদম্য সন্ত্ৰাসবাদ বিৰোধী অভিযান আৰু সীমান্তৰ সিপাৰৰ পৰা অনুপ্ৰৱেশ ৰোধ কৰিবলৈ সীমান্তৰ গাঁওসমূহত নিশাৰ টহল বৃদ্ধি কৰা।
