শ্ৰীনগৰ
জম্মু-কাশ্মীৰৰ কঠুৱা জিলাত নিৰাপত্তাৰক্ষী, আৰক্ষী আৰু সন্ত্ৰাসবাদীৰ মাজত সংঘটিত হৈছে ভয়ংকৰ সংঘৰ্ষ। বৃহস্পতিবাৰে নিৰাপত্তাৰক্ষী-আৰক্ষী আৰু সন্ত্ৰাসবাদী গোটৰ সদস্যৰে হোৱা এই গুলীয়াগুলীত ৪ জন আৰক্ষী জোৱানৰ লগতে সন্ত্ৰাসবাদী গোটৰ ৩জন সদস্য নিহত হোৱা বুলি ৰাষ্ট্ৰীয় সংবাদ সংস্থাই প্ৰকাশ কৰিছে। অৱশ্যে এতিয়াও নিহতৰ সংখ্যা সন্দৰ্ভত স্পষ্ট তথ্য জানিব পৰা হোৱা নাই।
ইয়াৰোপৰি এই সংঘৰ্ষত এজন উপ আৰক্ষী অধীক্ষকে ধৰি ৫ জন নিৰাপত্তাৰক্ষী জোৱান গুৰুতৰভাৱে আঘাতপ্ৰাপ্ত হৈছে। আহত আটাইকেইগৰাকীকে ইতিমধ্যে চিকিৎসালয়ত ভৰ্তি কৰোৱা হৈছে। ইফালে ঘটনা সন্দৰ্ভত আৰক্ষী আৰু নিৰাপত্তাৰক্ষীয়ে ক্ষীপ্ৰ তদন্ত প্ৰক্ৰিয়া আৰম্ভ কৰাৰ উপৰি ঘটনা সংঘটিত হোৱা বৃহত্তৰ এলেকাটোত সন্ত্ৰাসবাদীৰ বিৰুদ্ধে কঠোৰ অভিযান অৱ্যাহত ৰাখিছে।
পাকিস্তান ভিত্তিক জৈশ-ই-মহম্মদ (জে ই এম) সংগঠনৰ সদস্য বুলি অনুমান কৰা শেহতীয়াভাৱে অনুপ্ৰৱেশ কৰা সন্ত্ৰাসবাদী গোট এটাৰ বিৰুদ্ধে জম্মু-কাশ্মীৰ আৰক্ষীৰ নেতৃত্বত তীব্ৰ অভিযানৰ মাজতে পুৱা প্ৰায় ৮ বজাত এনকাউণ্টাৰ আৰম্ভ হয় বুলি বিষয়াসকলে জনায়।
অৱশ্যে এইটো তৎক্ষণিকভাৱে স্পষ্ট হোৱা নাই যে, কাথুৱা অঞ্চলৰ সান্যাল অৰণ্যত পূৰ্বতে অভিযানৰ সময়ত পলায়ন কৰা দলটোৱে এইটো নে নতুনকৈ অনুপ্ৰৱেশ কৰা সন্ত্ৰাসবাদীৰ আন এটা দল। বিষয়াসকলে কয় যে, গুলীচালনাৰ ফলত তীব্ৰ গোলাবৰ্ষণ আৰু বিস্ফোৰণো সংঘটিত হয়। কিয়নো বহু স্থানীয় যুৱক-যুৱতীক এটা খাদৰ ভিতৰত গধুৰ অস্ত্ৰ-শস্ত্ৰ আৰু গোলাবাৰুদ কঢ়িয়াই নিয়াত নিৰাপত্তা বাহিনীক সহায় কৰা দেখা গৈছিল।
ৰাজবাগৰ ঘাটি জুথানা অঞ্চলৰ জাখোল গাঁৱৰ ওচৰত সংঘটিত এই সংঘৰ্ষত প্ৰায় পাঁচজনীয়া সন্ত্ৰাসবাদীৰ এটা দল জড়িত আছিল। প্ৰাৰম্ভিক গুলীবৰ্ষণৰ ফলত উপ-সংমণ্ডলীয় আৰক্ষী বিষয়াসহ (এছ ডি পি অ') ৬ জন আৰক্ষী আহত হয়। বিষয়াসকলে কয় যে, সেনা আৰু চি আৰ পি এফৰ সহায়ত জম্মু-কাশ্মীৰ আৰক্ষীৰ বিশেষ অভিযান গোটৰ (এছ অ' জি) নেতৃত্বত সংঘটিত আক্ৰমণত ৩ টা সন্ত্ৰাসবাদী নিহত হয়।
এই উত্তেজনাপূৰ্ণ পৰিস্থিতিৰ সময়তে এছ ডি পি অ'কে ধৰি ৫জন আৰক্ষীকৰ্মী গুলীয়াগুলীৰ স্থানৰ ওচৰত আৱদ্ধ হৈ পৰে আৰু তেওঁলোকে ঘনপাতৰ দ্বাৰা আবৃত এটা নদীৰ কাষত লুকাবলৈ চেষ্টা কৰে।
অৱশ্যে, এগৰাকী ডি এছ পি ৰেংকৰ বিষয়া আৰু এছ ডি পি অ'ক সন্ধিয়া সময়ত ঘটনাস্থলীৰ পৰা উদ্ধাৰ কৰা হয়। আনহাতে, তেওঁৰ তিনিজন ব্যক্তিগত নিৰাপত্তা বিষয়াক মৃত অৱস্থাত পোৱা যায়। চৰকাৰী সূত্ৰই প্ৰকাশ কৰা অনুসৰি, আন এজন আৰক্ষী সন্ধানহীন হৈ আছে আৰু তেওঁ জীয়াই থকা-নথকা সন্দৰ্ভত তাৎক্ষণিকভাৱে একো জানিব পৰা হোৱা নাই।
ইফালে শুকুৰবাৰে দিনৰ প্ৰথম পোহৰতে অভিযান পুনৰ আৰম্ভ কৰা হৈছে। কিয়নো অঞ্চলটোত আৰু দুজন সন্ত্ৰাসবাদী আৱদ্ধ হৈ থকা বুলি ধাৰণা কৰা হৈছে। তেওঁলোকক মৃত বুলিও ধাৰণা কৰা হৈছে, যদিও তেওঁলোকৰ মৃতদেহৰ অৱস্থান ড্ৰোনৰ দ্বাৰা স্থিৰ কৰিব পৰা হোৱা নাই বুলি বিষয়াসকলে জানিবলৈ দিয়ে।
এছ ডি পি অ'ৰ উপৰি আৰু দুজন আৰক্ষীক কঠুৱা চিকিৎসালয়ত ভৰ্তি কৰোৱা হৈছে আৰু তেওঁলোকৰ অৱস্থা সুস্থিৰ বুলি কোৱা হৈছে। ইয়াৰ উপৰি দুজন সেনা জোৱানো আহত হৈছে আৰু তেওঁলোকক এখন সামৰিক চিকিৎসালয়লৈ লৈ যোৱা হৈছে। আনহাতে, অঞ্চলটোৰ চাৰিওফালে নিৰাপত্তাৰক্ষীৰ বেষ্টনী অধিক শক্তিশালী কৰাৰ বাবে সন্ধিয়া সংঘৰ্ষস্থলীত সেনাৰ বিশেষ দলক হেলিকপ্টাৰেৰে নমোৱা হয়। বিষয়াসকলে কয় যে, ড্ৰোনে দুজন সন্ত্ৰাসবাদীৰ মৃতদেহৰ লক্ষ্য নিৰ্ধাৰণ কৰিছে আৰু শুকুৰবাৰে উদ্ধাৰ কৰা হ'ব।
ইফালে জৈশ-ই-মহম্মদৰ এক শাখা সংগঠন পিপ'লছ এণ্টি-ফেচিষ্ট ফ্ৰণ্টে আৰক্ষী দলৰ ওপৰত হোৱা গুলীচালনাৰ দায়িত্ব স্বীকাৰ কৰিছে। উল্লেখ্য যে, বিশেষ অভিযানকাৰী দলে দেওবাৰে সন্ধিয়া কঠুৱা জিলাৰ হীৰানগৰ ছেক্টৰত সন্ত্ৰাসবাদীৰ এটা দলক বাধা প্ৰদান কৰিছিল।
দেওবাৰৰ সংঘৰ্ষত নিৰাপত্তাৰক্ষীয়ে সীমান্তৰ সিপাৰৰ পৰা অনুপ্ৰৱেশ কৰাৰ পিছত ঘন নাৰ্চাৰীত লুকাই থকা সন্ত্ৰাসবাদীৰ দলটোৰ মুখামুখি হৈছিল। দুয়োপক্ষৰ মাজত গুলীবৰ্ষণ আধা ঘণ্টাতকৈও অধিক সময় চলি থকাৰ সময়ত সন্ত্ৰাসবাদীসকল পলাই যাবলৈ সক্ষম হয়। যাৰ বাবে সমগ্ৰ বেল্টটোত এক বৃহৎ তালাচী অভিযান আৰম্ভ হয়।
