তিৰুপতি
বুধবাৰে নিশা তিৰুপতিৰ তিৰুমালা মন্দিৰৰ টিকট বিক্ৰীৰ সময়ত তিনিটা পৃথক স্থানত হুলস্থুলীয়া পৰিৱেশত ৫ গৰাকী মহিলাসহ ৬ গৰাকী ভক্ত নিহত হোৱাৰ লগতে ২৯ গৰাকী লোক আহত হয়। বিশেষ দৰ্শনৰ টিকটৰ বাবে শাৰী পাতিবলৈ বৃহৎ সংখ্যক ভক্তৰ সমাগম হৈছিল, যাৰ ফলত এই ভয়াবহ পৰিস্থিতিৰ সৃষ্টি হয়। এই ঘটনাত নিহত ভক্তসকলৰ ভিতৰত আছিল ৫ গৰাকী মহিলা।
ৰুইয়া আৰু এছভিআইএমএছ চিকিৎসালয়লৈ আহতসকলক স্থানান্তৰ কৰা হয়। মৃত্যুৰ সংখ্যা আৰু বৃদ্ধি পোৱাৰ সম্ভাৱনা আছে। বিখ্যাত তিৰুমালা মন্দিৰৰ কাম-কাজ পৰিচালনা কৰা তিৰুমালা তিৰুপতি দেৱস্থানে (টিটিডি) ঘোষণা কৰিছিল যে বৃহস্পতিবাৰে পুৱা ৫ বজাৰ পৰা তিৰুপতিৰ ৯টা স্থানৰ ৯৪টা কাউণ্টাৰত বিশেষ দৰ্শনৰ টিকট প্ৰদান কৰা হ’ব।
অৱশ্যে বুধবাৰৰ সন্ধিয়াৰ পৰাই বৃহৎ সংখ্যক ভক্তৰ সমাগম আৰম্ভ হয়। কাউণ্টাৰত ভক্তক অনুমতি দিয়াৰ সময়ত বিশৃংখলতাৰ সৃষ্টি হৈছিল। ইজনে সিজনক ঠেলি আগুৱাই যাব বিচৰাত হুলস্থুলৰ সৃষ্টি হয়। ঘটনাস্থলীত আৰক্ষী আৰু টিটিডিৰ বিষয়াই উদ্ধাৰ আৰু সাহায্য অভিযান আৰম্ভ কৰে। অহা ১০, ১১ আৰু ১২ জানুৱাৰীত বৈকুণ্ঠ দ্বাৰা দৰ্শনৰ বাবে বৃহস্পতিবাৰে পুৱা ১.২০ লাখ টোকেন প্ৰদানৰ পৰিকল্পনা কৰিছিল টিটিডিয়ে।
তিৰুপতি জিলা উপায়ুক্ত ভেংকটেশ্বৰ আৰু টিটিডিৰ কাৰ্যবাহী বিষয়া শ্যামলা ৰাও ততাতৈয়াকৈ ৰুইয়া হাস্পতাললৈ যায়। ইফালে, মুখ্যমন্ত্ৰী এন চন্দ্ৰবাবু নাইডু আৰু উপ-মুখ্যমন্ত্ৰী পৱন কল্যানে এই ভয়াবহ ঘটনাত চাৰিজন ভক্তৰ মৃত্যুত গভীৰ শোক প্ৰকাশ কৰিছে।
