গুৱাহাটী
বিগত ২৪ ঘন্টাত বানপানীত ডুবি ৩ জন লোকৰ মৃত্যু হোৱাৰ বিপৰীতে অসমত এতিয়ালৈকে ৩৮ জন লোকৰ প্ৰাণহানি হৈছে। অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ বান প্ৰতিবেদন অনুসৰি যোৱা ২ জুলাইত তিনিচুকীয়া জিলাত দুজন লোকৰ মৃত্যু হোৱাৰ বিপৰীতে ধেমাজি জিলাত এজন লোকৰ মৃত্যু হোৱাৰ লগতে মুঠ মৃত্যুৰ সংখ্যা ৩৮লৈ বৃদ্ধি পাইছে।
মঙলবাৰে ৰাজ্যৰ বান পৰিস্থিতি অধিক সংকটজনক হৈ পৰিছে কাৰণ ২৮খন জিলাৰ ১১.৩৪ লাখৰো অধিক লোক ক্ষতিগ্ৰস্ত হৈছে। বানাক্ৰান্ত জিলা কেইখন হৈছে কামৰূপ, তামুলপুৰ, চিৰাং, মৰিগাঁও, লখিমপুৰ, বিশ্বনাথ, ডিব্ৰুগড়, কৰিমগঞ্জ, উদালগুৰি, নগাঁও, বঙাইগাঁও, শোণিতপুৰ, গোলাঘাট, হোজাই, দৰং, চৰাইদেউ, নলবাৰী, যোৰহাট, শিৱসাগৰ, কাৰ্বি আংলং, গোৱালপাৰা, ধেমাজি, মাজুলী , তিনিচুকীয়া, কোকৰাঝাৰ, বৰপেটা, কাছাৰ, কামৰূপ (মেট্ৰো)।
কেৱল লখিমপুৰ জিলাতে মুঠ ১৬৫৩১৯ জন লোক আক্ৰান্ত হোৱাৰ বিপৰীতে দৰং জিলাত ১৪৭১৪৩ জন লোক আক্ৰান্ত হৈছে, গোলাঘাট জিলাত ১০৬৪৮০ জন লোক, ধেমাজি জিলাত ১০১৮৮৮ জন লোক, তিনিচুকীয়াত ৭৪৮৪৮ জন লোক, বিশ্বনাথত ৭৩০৭৪ জন লোক, কাছাৰত ৬৯৫৬৭ জন লোক, মাজুলীত ৬৬১৬৭ জন লোক, শোণিতপুৰত ৬৫০৬১ জন লোক আৰু মৰিগাঁও জিলাত ৪৮৪৫২ জন লোক আক্ৰান্ত হৈছে।
বানপানীৰ পানীত ডুব গৈছে ৪২৪৭৬.১৮ হেক্টৰ শস্য এলেকা। ৮৪ টা ৰাজহ চক্ৰৰ অন্তৰ্গত ২২০৮ খন গাঁও বানপানীৰ দ্বিতীয় ঢৌত ক্ষতিগ্ৰস্ত হৈছে। ব্ৰহ্মপুত্ৰ নদীৰ জলপৃষ্ঠ নিয়ামতীঘাট, তেজপুৰ, গুৱাহাটী আৰু ধুবুৰীত বিপদসীমাৰ চিহ্নৰ ওপৰেৰে বৈ আহিছে।
প্ৰায় ২.৮৭ লাখ লোকে আশ্ৰয় লৈ থকা বানাক্ৰান্ত জিলাসমূহত ৪৮৯টা সাহায্য শিবিৰ আৰু বিতৰণ কেন্দ্ৰ স্থাপন কৰিছে প্ৰশাসনে। বানপীড়িত বহু লোকে নিজৰ ঘৰত পানী সোমোৱাৰ পাছতে সুৰক্ষিত স্থান, ওখ ভূমি, স্কুল ভৱন, পথ, দলং আদিত আশ্ৰয় লৈছে।
স্থানীয় প্ৰশাসন, সেনা, অৰ্ধসামৰিক বাহিনী, এছ ডি আৰ এফ আৰু চক্ৰ কাৰ্যালয়ৰ উদ্ধাৰকাৰী দলে বহু ঠাইত উদ্ধাৰ অভিযানত নিয়োজিত হৈ আছে আৰু মঙলবাৰে বিভিন্ন বানাক্ৰান্ত অঞ্চলৰ পৰা প্ৰায় ২৯০০ লোকক উদ্ধাৰ কৰে।
মঙলবাৰে প্ৰশাসনে বানাক্ৰান্ত লোকসকলৰ মাজত ১০৭৫৪.৯৮ কুইণ্টল চাউল, ১৯৫৮.৮৯ কুইণ্টল দালি, ৫৫৪.৯১ কুইণ্টল নিমখ, আৰু ২৩০৬১.৪৪ লিটাৰ সৰিয়হ তেল বিতৰণ কৰাৰ লগতে গৰু-ম’হৰ খাদ্যও যোগান ধৰে।
এ এছ ডি এম এৰ বান প্ৰতিবেদনত উল্লেখ কৰা হৈছে যে ৮৩২০৯৯ টা জীৱ-জন্তু বানপানীৰ ফলত ক্ষতিগ্ৰস্ত হৈছে। মঙলবাৰে বানপানীৰ পানীয়ে ৭৪টা পথ, ৬টা দলং, আৰু ১৪টা মথাউৰিৰ ক্ষতিসাধন কৰে আৰু ৫টা মথাউৰি ভাঙি পেলায়।
