আৱাজ-দ্য ভইচ / নতুন দিল্লী
আজি লোকসভাত কেন্দ্ৰীয় চৰকাৰে ৱাকফ (সংশোধনী) বিধেয়ক, ২০২৪ উত্থাপন কৰিব। চৰকাৰে ৱাকফ সংশোধনী বিধেয়কখন উত্থাপন কৰাৰ বাবে ভাৰতীয় জনতা পাৰ্টীয়ে দলৰ লোকসভাৰ সাংসদসকলক আজি সংসদত উপস্থিত থাকিবলৈ হুইপ জাৰি কৰিছে। লগতে কংগ্ৰেছেও নিজৰ সকলো সাংসদক তিনিদিনৰ বাবে নিম্ন সদনত উপস্থিত থাকিবলৈ তিনি দফীয়া হুইপ জাৰি কৰিছে।
ইফালে অল ইণ্ডিয়া মুছলিম পাৰ্চনেল ল' ব'ৰ্ডকে ধৰি বহু মুছলমান সংগঠনে এই বিধেয়কখনৰ তীব্ৰ বিৰোধিতা কৰি ৱাকফ আইন দুৰ্বল কৰাৰ ষড়যন্ত্ৰ বুলি অভিহিত কৰিছে। বিধেয়কখনক লৈ শাসকীয় ভাৰতীয় জনতা পাৰ্টি আৰু বিৰোধী দলৰ মাজত সংঘাত তীব্ৰতৰ হৈ পৰিছে। বিজেপি আৰু কংগ্ৰেছ দুয়োটা দলে সদনত বাধ্যতামূলক উপস্থিতিৰ বাবে নিজৰ সাংসদক হুইপ জাৰি কৰিছে।
সমাজবাদী পাৰ্টিকে ধৰি আন বিৰোধী দলসমূহেও নিজৰ সাংসদসকলক সদনত উপস্থিত থাকি বিধেয়কখনৰ আলোচনাত অংশগ্ৰহণ কৰিবলৈ নিৰ্দেশ দিছে। বিৰোধী দলসমূহে কয় যে, এই বিধেয়কখন গৃহীত হ’লে দেশৰ মুছলমান সম্প্ৰদায়ৰ ধৰ্মীয় আৰু সামাজিক সম্পত্তিৰ প্ৰতি ভাবুকি কঢ়িয়াই আনিব পাৰে।
প্ৰতিনিধিত্বমূলক ছবি
একে সময়তে চৰকাৰে দাবী কৰিছে যে, ৱাকফৰ সম্পত্তি পৰিচালনাৰ ক্ষেত্ৰত স্বচ্ছতা আনিবলৈ আৰু দুৰ্নীতি ৰোধ কৰিবলৈ এই সংশোধনী প্ৰয়োজনীয়।
ৱাকফ সংশোধনী বিধেয়কখনে কি কয়?
বিধেয়কখনত ৱাকফ আইন, ১৯৯৫ সংশোধন কৰি ৱাকফৰ সম্পত্তিৰ পঞ্জীয়ন প্ৰক্ৰিয়া নবীকৰণ কৰাৰ প্ৰস্তাৱ দিয়া হৈছে আৰু প্ৰযুক্তিৰ ব্যৱহাৰ বৃদ্ধি কৰি ৱাকফৰ তথ্যসমূহ ভালদৰে পৰিচালনা কৰাৰ প্ৰস্তাৱ দিয়া হৈছে।
ব্যৱহাৰকাৰীৰ দ্বাৰা ৱাকফ বন্ধ কৰা – অৰ্থাৎ যিবোৰ সম্পত্তি দীৰ্ঘদিন ধৰি ৱাকফ হিচাপে ব্যৱহাৰ হৈ আহিছে, কিন্তু পঞ্জীয়নত বিবাদ আছে সেইবোৰক ৱাকফৰ সম্পত্তি হিচাপে গণ্য কৰা নহ’ব।
সীমাবদ্ধতা আইনৰ প্ৰভাৱ – বৰ্তমান ৱাকফৰ সম্পত্তি যিকোনো ধৰণৰ সীমাবদ্ধতাৰ পৰা মুক্ত যদিও এই সংশোধনীৰ পিছত চৰকাৰী আৰু ব্যক্তিগত পক্ষই আইনী দাবীৰ জৰিয়তে ৱাকফৰ সম্পত্তিৰ দাবী কৰিব পাৰিব।
ৱাকফ ব’ৰ্ড আৰু কেন্দ্ৰীয় ৱাকফ কাউন্সিলত অমুছলমান সদস্য নিযুক্তি – ইয়াৰ ফলত ৱাকফ ব’ৰ্ডত বাহ্যিক হস্তক্ষেপ বৃদ্ধি পাব আৰু মুছলমান সম্প্ৰদায়ৰ নিয়ন্ত্ৰণ দুৰ্বল হ’ব বুলি মুছলমান সংগঠনসমূহে আশংকা কৰিছে।
ৱাকফ ন্যায়াধিকৰণৰ ক্ষমতা হ্ৰাস – এতিয়া ৱাকফৰ সম্পত্তিৰ সৈতে জড়িত বিবাদসমূহ কালেক্টৰ বা জিলা দণ্ডাধীশ (ডি এম)ৰ জৰিয়তে নিষ্পত্তি কৰা হ’ব, যাৰ ফলত প্ৰশাসনৰ পক্ষপাতদুষ্ট মনোভাৱৰ আশংকা বৃদ্ধি পাব পাৰে।
প্ৰতিনিধিত্বমূলক ছবি
মুছলমান সম্প্ৰদায়ৰ উদ্বেগ আৰু প্ৰতিবাদ অল ইণ্ডিয়া মুছলিম পাৰ্চনেল ল ব’ৰ্ডৰ সভাপতি মৌলানা খালিদ ছাইফুল্লাহ ৰহমানীয়ে এই বিধেয়কখন মুছলমান সম্প্ৰদায়ৰ অধিকাৰৰ বিৰুদ্ধে বুলি অভিহিত কৰি সংসদৰ সদস্যসকলক ইয়াৰ বিৰুদ্ধে ভোট দিবলৈ আহ্বান জনাইছে।
তেওঁ কয়, "এই বিধেয়কৰ জৰিয়তে বিজেপি চৰকাৰে ৱাকফৰ সম্পত্তি দুৰ্বল কৰি দখল কৰাৰ পথ প্ৰশস্ত কৰিছে। উপাসনাস্থলী আইন থকাৰ পিছতো প্ৰতিটো মছজিদক বিতৰ্কিত কৰাৰ ষড়যন্ত্ৰ ৰচনা কৰা হৈছে। যদি এই সংশোধনী গৃহীত হয়, তেন্তে ৱাকফৰ সম্পত্তিৰ ওপৰত চৰকাৰী আৰু বেচৰকাৰী দাবীৰ প্ৰাভাৱ বিস্তাৰিত হ'ব।"
তেওঁ লগতে কয় যে, এই বিধেয়কখন ভাৰতীয় সংবিধানৰ ১৪, ২৫ আৰু ২৬ অনুচ্ছেদৰ বিৰোধী। যিয়ে ধৰ্মীয় স্বাধীনতা আৰু সমতাৰ অধিকাৰ নিশ্চিত কৰে।
বিৰোধীৰ কৌশল আৰু ইণ্ডিয়া ব্লকৰ বৈঠক মঙলবাৰে সংসদত বিৰোধী দলসমূহৰ বৈঠকত ৱাকফ সংশোধনী বিধেয়কক লৈ কৌশল ৰচনা কৰা হয়। কংগ্ৰেছ, এছ পি, টি এম চি, ডি এম কে, আৰ জে ডি আদি বিৰোধী দলসমূহে চৰকাৰক ধৰ্মীয় বৈষম্যৰ অভিযোগ উত্থাপন কৰি কয় যে, এই বিধেয়কখন মুছলমান সম্প্ৰদায়ৰ ধৰ্মীয় আৰু সামাজিক সম্পত্তিক ভেঙুচালি কৰাৰ ষড়যন্ত্ৰ। সমাজবাদী পাৰ্টিৰ ধৰ্মেন্দ্ৰ যাদৱে লোকসভাৰ সকলো দলীয় সাংসদক বিধেয়কখনৰ আলোচনাত অংশগ্ৰহণ কৰিবলৈ তিনি দফীয়া হুইপ জাৰি কৰিছে।
উত্তৰ প্ৰদেশৰ মুখ্যমন্ত্ৰী যোগী আদিত্যনাথে বিধেয়কখনৰ পক্ষ লৈ কয় যে, ৱাকফৰ সম্পত্তিৰ প্ৰায়ে অপব্যৱহাৰ কৰা হৈছে আৰু সংস্কাৰৰ প্ৰয়োজন আছিল। মুখ্যমন্ত্ৰী যোগীয়ে কয় যে, "প্ৰতিটো ভাল সংস্কাৰেই বিৰোধিতাৰ সন্মুখীন হয়। ৱাকফ ব'ৰ্ডক মুছলমানৰ কল্যাণৰ বাবে নহয়, ব্যক্তিগত লাভালাভৰ আহিলা হিচাপে ব্যৱহাৰ কৰা হৈছে।"
আনহাতে, সমাজবাদী পাৰ্টীৰ নেতা অখিলেশ যাদৱে বিধেয়কখনক তীব্ৰ সমালোচনা কৰি কয় যে, এয়া চৰকাৰৰ সংখ্যালঘু বিৰোধী স্থিতিৰ আন এক উদাহৰণ মাথোঁ। ৰাজনৈতিক উদ্দেশ্যপ্ৰণোদিত আৰু সমাজৰ এটা বিশেষ শ্ৰেণীক লক্ষ্য কৰি লোৱা এই পদক্ষেপ বুলি অভিযোগ কৰে তেওঁ। ৱাকফৰ সম্পত্তি সুৰক্ষিত কৰাৰ পৰিৱৰ্তে সংস্কাৰৰ আৱৰণত চৰকাৰে জব্দ কৰিবলৈ চেষ্টা কৰিছে বুলিও যাদৱে মন্তব্য কৰিছে।
সোমবাৰে আপৰ নেতা তথা পঞ্জাৱৰ মুখ্যমন্ত্ৰী ভগৱন্ত মানেও তীব্ৰ বিৰোধিতা কৰি ঘোষণা কৰে যে তেওঁৰ দলে সংসদ আৰু পঞ্জাৱ বিধানসভা উভয়তে বিধেয়কখনৰ বিৰুদ্ধে যুঁজিব। এই বিধেয়কখন মুছলমান সম্প্ৰদায়ৰ স্বাৰ্থত নহয়।
কংগ্ৰেছৰ সাংসদ ৰাজনী পাটিলে নিজৰ দলৰ স্থিতিৰ পুনৰাবৃত্তি কৰি কয় যে, তেওঁলোকে বিধেয়কখনৰ সংশোধনী বিচাৰিছিল, যিবোৰক আওকাণ কৰা হৈছিল। যিহেতু আমাৰ পৰামৰ্শ অন্তৰ্ভুক্ত কৰা হোৱা নাছিল, গতিকে আমি বিধেয়কখনৰ বিৰোধিতা কৰি যাম।
সৰ্বভাৰতীয় মজলিছ-ই-ইত্তেহাদুল মুছলিমীন (এআইএমআইএম)ৰ ৰাষ্ট্ৰীয় সভাপতি তথা হায়দৰাবাদৰ সাংসদ আছাদুদ্দিন ওৱাইছিয়ে এই বিধেয়কখনক মুছলমানৰ মৌলিক অধিকাৰৰ ওপৰত আক্ৰমণ বুলি অভিহিত কৰি কয় যে, ইয়াৰ ফলত চৰকাৰে ৱাকফৰ সম্পত্তি স্বেচ্ছাচাৰীভাৱে অধিগ্ৰহণ কৰিব। তেওঁ কয়, "এইটো ৱাকফ প্ৰতিষ্ঠানসমূহক দুৰ্বল কৰাৰ লগতে আমাৰ সম্প্ৰদায়ৰ সম্পত্তিৰ ওপৰত নিয়ন্ত্ৰণ হ্ৰাস কৰাৰ প্ৰয়াস।"
বিধেয়কখনৰ ভৱিষ্যত কি হ’ব?
লোকসভাত বিজেপিৰ সংখ্যাগৰিষ্ঠতাৰ প্ৰতি লক্ষ্য ৰাখি এই বিধেয়কখন সহজে গৃহীত হোৱাৰ সম্ভাৱনা আছে। কিন্তু বিৰোধী দলৰ সংখ্যা বেছি হোৱা ৰাজ্যসভাত চৰকাৰে কঠোৰ প্ৰত্যাহ্বানৰ সন্মুখীন হ’ব পাৰে। এই বিধেয়কখনক লৈ দেশজুৰি মুছলমান সংগঠন আৰু সমাজকৰ্মীসকলৰ প্ৰতিবাদো অব্যাহত আছে।
ৱাকফ (সংশোধনী) বিধেয়ক, ২০২৪ক লৈ দেশৰ ৰাজনীতি উত্তপ্ত হৈ পৰিছে। য’ত চৰকাৰে ইয়াক স্বচ্ছতা আৰু সুশাসনৰ দিশত এক পদক্ষেপ বুলি অভিহিত কৰিছে। আনহাতে, মুছলমান সংগঠন আৰু বিৰোধী দলসমূহে এই বিধেয়কখন সমাজৰ ধৰ্মীয় আৰু সামাজিক তন্ত্ৰৰ ক্ষতি কৰাৰ প্ৰয়াস বুলিহে বিশ্বাস কৰে।
এতিয়া সকলোৰে দৃষ্টি সংসদত আছে। কিয়নো বিৰোধীয়ে ইয়াক ৰোধ কৰাত সফল হয় নে, চৰকাৰে গৃহীত কৰি নতুন আইনখন কাৰ্যকৰী কৰে। আগন্তুক দিনত আমি হয়তো সমগ্ৰ দেশতে এই বিষয়ত আৰু অধিক চোকা প্ৰতিক্ৰিয়া দেখিবলৈ পাম।
