অধিবক্তা শ্বেহনাজ ৰহমান, পদ্মশ্ৰী ডাঃ ইলিয়াছ আলী, কবি শ্বাহীন আখতাৰ, নাৰ্ছ ৰূপজান বেগম (বাওঁফালৰ পৰা)
দৌলত ৰহমান / গুৱাহাটী
বহুবিবাহৰ অন্ত পেলাবলৈ ৰাজ্য চৰকাৰে নতুন আইন প্ৰণয়ন কৰিবলৈ গ্ৰহণ কৰা পদক্ষেপক অসমৰ মুছলমান সমাজে আদৰণি জনাইছে। গৰিষ্ঠসংখ্যক মুছলমান বিশেষকৈ মহিলাই চৰকাৰৰ এই পদক্ষেপক সমৰ্থন জনাইছে যদিও তেওঁলোকে আশা প্ৰকাশ কৰিছে যে প্ৰস্তাৱিত আইনখনে যাতে মুছলমান সম্প্ৰদায়ৰ ব্যক্তিগত আইন (personal laws )ৰ সৈতে সংঘাত সৃষ্টি নকৰে, তাৰ প্ৰতি চৰকাৰ সতৰ্ক হোৱা উচিত।
ৰাজ্য চৰকাৰৰ এই পদক্ষেপক আদৰণি জনাই বিশিষ্ট অধিবক্তা, সমাজকৰ্মী আৰু শিক্ষক শ্বাহনাজ ৰহমানে কয় যে প্ৰস্তাৱিত আইনখনৰ খচৰা প্ৰস্তুত কৰাত যথেষ্ট সাৱধানতা অৱলম্বন কৰিব লাগিব, কাৰণ ই মুছলমান ব্যক্তিগত আইনখনৰ সৈতে সংঘাত সৃষ্টি কৰিব পাৰে।
বিশেষজ্ঞ সমিতিয়ে মুখ্যমন্ত্ৰী হিমন্ত বিশ্ব শৰ্মাক বহু বিবাহ সন্দৰ্ভত প্ৰতিবেদন দাখিল কৰাৰ মুহূৰ্তত
“অল ইণ্ডিয়া মুছলিম পাৰ্চনেল ল ব’ৰ্ডে ব্যাখ্যা কৰা ‘মুছলিম পাৰ্চনেল ল (শ্বৰিয়ত), ১৯৩৭ৰ অধীনত থকা দফাসমূহ ভাৰতৰ মুছলমানসকলৰ ক্ষেত্ৰত প্ৰযোজ্য। মুছলমান আইনত বহুবিবাহ নিষিদ্ধ নহয় কাৰণ ইয়াক ধৰ্মীয় প্ৰথা হিচাপে স্বীকৃতি দিয়া হৈছে, সেয়েহে তেওঁলোকে ইয়াক আঁকোৱালি ল'ব বিচাৰে। যেতিয়া ভাৰতীয় দণ্ডবিধি আৰু ব্যক্তিগত আইনৰ মাজত মতানৈক্য হয়, তেতিয়া ব্যক্তিগত আইন কাৰ্যকৰী কৰা হয় যিহেতু এখন নিৰ্দিষ্ট আইনে সাধাৰণ আইনক স্থানচ্যুত কৰাটো এক আইনী নীতি।’- 'আৱাজ-দ্য ভইচ অসম'ক এইদৰে কয় শ্বাহনাজ ৰহমানে।
শ্বাহনাজ ৰহমানৰ মতে স্বাভাৱিকতে বহুবিবাহৰ অন্ত পেলাবলৈ এই ধৰণৰ আইন প্ৰৱৰ্তন কৰিলে মহিলাসকল অধিক সুৰক্ষিত আৰু নিৰাপদ হ’ব। বহুবিবাহে ভাৰতীয় সমাজত যথেষ্ট প্ৰভাৱ পেলায় আৰু বিশেষকৈ ইছলাম আৰু হিন্দু ধৰ্মৰ দৰে ধৰ্মৰ সম্পৰ্কত সাংবিধানিক দৃষ্টিকোণৰ পৰা ইয়াৰ বৈধতাৰ বাবে বিতৰ্ক হৈছে বুলিও তেওঁ কয়।
প্ৰতিশ্ৰুতিসম্পন্ন যুৱ কবি শ্বাহীন আখতাৰে কয় যে হজৰত মহম্মদৰ সময়ত যে বহুবিবাহ ন্যায্যভাৱে চলিছিল আৰু সেই যুগৰ নাৰীসকলক ন্যায় প্ৰদানৰ বাবে বিশুদ্ধভাৱে ইয়াক প্ৰয়োগ কৰা হৈছিল, এই কথাটো অস্বীকাৰ কৰিব নোৱাৰি।
প্ৰতিনিধিত্বমূলক ছবি
“উহুদৰ যুদ্ধত বহু মুছলমান (পুৰুষ) নিহত হোৱাৰ বাবেই অনাথ আৰু বিধৱাসকলৰ প্ৰতি চিন্তাৰ সৃষ্টি হৈছিল। ফলত অনাথ শিশুসকলৰ সামাজিক ন্যায় নিশ্চিত কৰাৰ বাবে এজন পুৰুষে বহুবিবাহক দায়িত্ব হিচাপে ব্যৱহাৰ কৰাৰ অনুমতি দিয়া হৈছিল। অৰ্থাত্ বিপদত পৰা এগৰাকী মহিলাৰ জীৱন উদ্ধাৰৰ ক্ষেত্ৰতহে এজন পুৰুষক তেতিয়াৰ পৰিস্থিতিত বহুবিবাহৰ অনুমতি দিয়া হৈছিল। মই অনুভৱ কৰোঁ যে যিহেতু হজৰত মহম্মদৰ সময়ত বহুবিবাহ এটা সামাজিক প্ৰয়োজন আছিল, সেয়েহে ই ন্যায়সংগত আৰু উপযুক্ত আছিল। কিন্তু, বৰ্তমান সময় সলনি হৈছে আৰু পৰিস্থিতি একে নহয়, গতিকে আজিৰ যুগত বহুবিবাহ কৰাটো সমাজৰ বাবে ভাবুকি আৰু সেয়েহে ইয়াৰ প্ৰচলনৰ বিৰুদ্ধে ফলপ্ৰসূ ব্যৱস্থা গ্ৰহণ কৰাটো সময়ৰ প্ৰয়োজনীয়তা বুলি মই বিশ্বাস কৰোঁ।’-শেহতীয়াকৈ ‘Words From Dust’ শীৰ্ষক ইংৰাজী কবিতা পুথি প্ৰকাশ পোৱা শ্বাহীনে এইদৰে কয়।
ইফালে, এক লাখৰো অধিক লোকক ক'ভিড-১৯ ভেকচিন দিয়াৰ বাবে কেন্দ্ৰীয় চৰকাৰে পুৰস্কৃত কৰা দক্ষ নাৰ্ছ ৰূপজান বেগমে কয় যে বহুবিবাহৰ লগত জড়িত বহুতেই আইনগতভাৱে বিবাহযোগ্য বয়স নোহোৱা ছোৱালীৰ সৈতে বিবাহপাশত আবদ্ধ হয়। ইয়াৰ ফলত তেওঁলোক কিশোৰী অৱস্থাতে গৰ্ভধাৰণ কৰে বুলি বেগমে উল্লেখ কৰে।
“কিশোৰীৰ গৰ্ভাৱস্থাৰ বহু ঘটনা মই চম্ভালিছো য’ত ছোৱালীবোৰে অসহ্যকৰ কষ্ট স্বীকাৰ কৰিবলগীয়া হয়। কিছুমান ক্ষেত্ৰত প্ৰসৱৰ পিছত গৰ্ভৱতী ছোৱালী আৰু কেঁচুৱা মৃত্যুমুখত পৰে। গতিকে, বহুবিবাহ নাৰীৰ প্ৰতি বৃহৎ অন্যায় আৰু ইয়াক বন্ধ কৰা উচিত।’-ৰূপজান বেগমে কয়।
বহুবিবাহৰ বিৰুদ্ধে মহিলাসকলে কৰা এক প্ৰতিবাদ
বিশিষ্ট অস্ত্ৰোপচাৰ বিশেষজ্ঞ পদ্মশ্ৰী ডাঃ ইলিয়াছ আলীয়ে কয় যে বহুবিবাহ দেশত জনসংখ্যা বিস্ফোৰণৰ অন্যতম প্ৰধান কাৰণ। তেওঁ অৱশ্যে কয় যে বহুবিবাহ কেৱল মুছলমান সম্প্ৰদায়ৰ মাজতে সীমাবদ্ধ বুলি ধৰি লোৱাটো ভুল হ’ব আৰু সেয়েহে প্ৰস্তাৱিত আইনখনে সমস্যাটোক বৃহত্তৰ দৃষ্টিকোণৰ পৰা সমাধান কৰিব লাগে।
অসমৰ মুছলমানসকলৰ মাজত পৰিয়াল পৰিকল্পনা সম্পৰ্কে সজাগতা সৃষ্টিৰ বাবে জেহাদ আৰম্ভ কৰা ডাঃ আলীয়ে কয় যে তুৰস্ক আৰু টিউনিছিয়াৰ দৰে দেশসমূহে বহুবিবাহ নিষিদ্ধ কৰিছে আৰু ইজিপ্ত, ছিৰিয়া আৰু জৰ্ডানত ই প্ৰশাসনিক বা ন্যায়িক নিয়ন্ত্ৰণৰ অধীনত আছে। ‘মুছলমান সংখ্যাগৰিষ্ঠ দেশসমূহে যদি বহুবিবাহৰ অন্ত পেলাবলৈ ফলপ্ৰসূ ব্যৱস্থা ল’ব পাৰে, তেন্তে ভাৰতে কিয় নোৱাৰে। অসম চৰকাৰৰ এই পদক্ষেপক মই আদৰণি জনাইছো।’ কেইবাখনো ৰাষ্ট্ৰীয় আৰু আন্তঃৰাষ্ট্ৰীয় আলোচনী, বাতৰি কাকত আৰু আলোচনীত জন্ম নিয়ন্ত্ৰণৰ ব্যৱস্থা প্ৰকাশ পোৱা ডাঃ আলীয়ে এইদৰে কয়।
