ইম্ফল
মণিপুৰৰ জিৰিবাম জিলাত আজি পুৱা নতুনকৈ সংঘটিত হিংসাত্মক ঘটনাত ৬ জন লোকৰ মৃত্যু হোৱা বুলি আৰক্ষীয়ে জানিবলৈ দিছে। ৰাজ্যৰ ৰাজধানী ইম্ফলৰ পৰা ২২৯ কিলোমিটাৰ নিলগৰ জিলাখনৰ নুংচাপ্পী গাঁৱত সন্দেহযুক্ত কুকি বিদ্ৰোহীয়ে এই আক্ৰমণ চলায়। আক্ৰমণত যুৰেম্বাম কুলেন্দ্ৰ সিংহা নামৰ এজন ৬৩ বছৰীয়া ব্যক্তিৰ মৃত্যু হয়।
মণিপুৰৰ মইৰাং চহৰত কুকি বিদ্ৰোহীয়ে মেইটেই অধ্যুষিত অঞ্চলৰ এজন বৃদ্ধ লোক প্ৰাৰ্থনা কৰি থকা অৱস্থাত ৰকেট চালিত বোমা আক্ৰমণত নিহত হোৱাৰ এদিন পিছতে আজিৰ ঘটনা সংঘটিত হয়।
মেইটেই সম্প্ৰদায় আৰু পাহাৰৰ বাসিন্দা কুকি জনগোষ্ঠীৰ সশস্ত্ৰ সংগঠনৰ মাজত হোৱা গুলীয়াগুলীয়াত আন পাঁচজন লোক নিহত হোৱা বুলি আৰক্ষী সূত্ৰই প্ৰকাশ কৰিছে। এই গোটসমূহে নিজকে "গাঁও প্ৰতিৰক্ষা স্বেচ্ছাসেৱক" বুলি পৰিচয় দিয়ে।
জিৰিবামৰ আৰক্ষী অধীক্ষক (এছ পি) আৰু আৰক্ষীৰ এটা দলে ততাতৈয়াকৈ অঞ্চলটোলৈ যায় যদিও তেওঁলোকক লক্ষ্য কৰি গুলীচালনা কৰা হয় বুলি আৰক্ষীয়ে বিবৃতিটোত কয়। ইয়াৰ প্ৰত্যুত্তৰত আৰক্ষীৰ দলটোৱে উগ্ৰপন্থীৰ বিৰুদ্ধে প্ৰতিশোধ লয় আৰু গুলীচালনা নিজৰ নিয়ন্ত্ৰণলৈ আনে।
উল্লেখ্য যে, ইম্ফল পশ্চিম জিলাৰ সন্দেহযুক্ত কুকি বিদ্ৰোহীয়ে অস্ত্ৰৰে সজ্জিত ড্ৰ’নেৰে গাঁওসমূহত আক্ৰমণ কৰাৰ প্ৰায় এসপ্তাহৰ পাছত প্ৰথমবাৰৰ বাবে ভাৰতীয় সেনাই ড্ৰ’ন-প্ৰতিৰোধী ব্যৱস্থা প্ৰয়োগ কৰিছে।
আৰক্ষীয়ে জনোৱা মতে, বহুমুখী পদ্ধতিৰে সেনাৰ হেলিকপ্টাৰে স্থলভূমিত নজৰ ৰাখিছে আৰু পাহাৰ-ভৈয়াম উভয়ৰে সন্দেহযুক্ত অঞ্চলসমূহত উগ্ৰবাদ-বিৰোধী অভিযান চলি আছে। আৰক্ষীয়ে জনোৱা মতে, হিংসাৰ প্ৰৰোচনাকাৰীক ধৰিবলৈ ছ’চিয়েল মিডিয়াৰ পোষ্টসমূহো এটা দলে নিৰীক্ষণ কৰি আছে।
নিৰাপত্তাৰক্ষীয়ে পাহাৰৰ পাদদেশৰ কেইবাটাও বাংকাৰ ধ্বংস কৰিছে বুলি আৰক্ষীয়ে জানিবলৈ দিয়ে।
