ইম্ফল
ভাৰতে ভাৰত-ম্যানমাৰ সীমান্তৰ মণিপুৰৰ মোৰেত ৯.২১৪ কিলোমিটাৰ দৈৰ্ঘ্যৰ সীমান্ত বেৰ নিৰ্মাণ প্ৰকল্প সম্পূৰ্ণ কৰিছে আৰু বৰ্তমান বেৰৰ সমান্তৰালভাৱে এটা পথ নিৰ্মাণৰ কাম চলি আছে। এমএইচএ-ৰ এক প্ৰতিবেদনত কোৱা হৈছে যে, এই প্ৰকল্পৰ লক্ষ্য হৈছে নিৰাপত্তা বৃদ্ধি আৰু অবৈধ সীমান্ত পাৰ কাৰ্যকলাপ নিয়ন্ত্ৰণ কৰাৰ লগতে অঞ্চলটোত প্ৰৱেশাধিকাৰ উন্নত কৰা আৰু টহল শক্তিশালী কৰা।
গৃহ পৰিক্ৰমা মন্ত্ৰালয়ৰ বাৰ্ষিক প্ৰতিবেদন ২০২৩-২০২৪ত এই তথ্য উল্লেখ কৰা হৈছে। প্ৰতিবেদন উল্লেখ কৰা মতে, "বৰ্ডাৰ ৰোডছ অৰ্গেনাইজেচন (বি আৰ অ')ক প্ৰদান কৰা মোৰেত ৯.২১৪ কিলোমিটাৰ দৈৰ্ঘ্যৰ বেৰ নিৰ্মাণ সম্পূৰ্ণ হৈছে আৰু বেৰৰ কাষৰ পথটোৰ নিৰ্মানৰ কাম চলি আছে।"
ভাৰত-ম্যানমাৰ সীমান্তই ১৬০০ কিলোমিটাৰৰ ওপৰত বিস্তৃত আৰু মণিপুৰকে ধৰি উত্তৰ-পূবৰ চাৰিখন ৰাজ্য অতিক্ৰম কৰিছে। এই ছিদ্ৰযুক্ত সীমান্তখন চোৰাংচোৱাগিৰি, অবৈধ প্ৰব্ৰজন, বিদ্ৰোহীৰ কাৰ্যকলাপৰ কেন্দ্ৰবিন্দু হৈ আহিছে।
সীমান্তৱৰ্তী এখন গুৰুত্বপূৰ্ণ চহৰ আৰু উল্লেখযোগ্য বাণিজ্যিক কেন্দ্ৰ মোৰেত এই ফেন্সিং প্ৰকল্পটো ভাৰতৰ সীমান্ত সুৰক্ষিত কৰাৰ লগতে উত্তৰ-পূবৰ আন্তঃগাঁথনিগত উন্নয়নক প্ৰসাৰিত কৰাৰ বহল প্ৰচেষ্টাৰ অংশ।
ম্যানমাৰৰ সৈতে ভাৰতৰ ১৬৪৩ কিলোমিটাৰ দৈৰ্ঘ্যৰ সীমান্ত অৰুণাচল প্ৰদেশ (৫২০ কিলোমিটাৰ), নাগালেণ্ড (২১৫ কিলোমিটাৰ), মণিপুৰ (৩৯৮ কিলোমিটাৰ) আৰু মিজোৰাম (৫১০ কিলোমিটাৰ) ৰাজ্যৰ মাজেৰে পাৰ হৈ যায়।
১৬৪৩ কিলোমিটাৰ সীমাৰ ভিতৰত ১৪৭২ কিলোমিটাৰ সীমা নিৰ্ধাৰণৰ কাম সম্পূৰ্ণ হৈছে। অৰুণাচল প্ৰদেশ আৰু মণিপুৰত এক কিলোমিটাৰকৈ হাইব্ৰিড চোৱাচিতা ব্যৱস্থাৰ দুটা পাইলট প্ৰজেক্টৰ নিৰ্মাণকাৰ্য্য অসম ৰাইফলছক প্ৰদান কৰা হৈছে আৰু কাম চলি আছে।
এমএইচএৰ প্ৰতিবেদনত উল্লেখ কৰিছে যে, ২০.৮৬২ কিলোমিটাৰ বেৰ আৰু পথ নিৰ্মাণৰ কাম ২০২৪ চনৰ ফেব্ৰুৱাৰী মাহত বি আৰ অ’ক দিয়া হৈছিল যাৰ কাম চলি আছে।
