মালিক আছঘৰ হাচমী/ নতুন দিল্লী
দিল্লী বিধানসভা নিৰ্বাচনৰ ফলাফলে সকলো ৰাজনৈতিক বিশ্লেষক আৰু সাধাৰণ জনতাক স্তম্ভিত কৰি তুলিছে। ২০২৫ চনত অনুষ্ঠিত এই নিৰ্বাচনত ভাৰতীয় জনতা পাৰ্টিয়ে দিল্লীত বৃহৎ জয়েৰে আম আদমী পাৰ্টিক পৰাস্ত কৰিছে। বিশেষ কথাটো হ’ল এই নিৰ্বাচনত আম আদমি পাৰ্টিৰ শীৰ্ষ নেতা অৰবিন্দ কেজৰিৱাল আৰু মনীষ চিছ’দিয়াও পৰাস্ত হৈছে, যিটো দলটোৰ বাবে এক ডাঙৰ বিপৰ্যয় হিচাপে পৰিগণিত হৈছে।
নিৰ্বাচনৰ বেছিভাগ ফলাফল অহাৰ লগে লগে স্পষ্ট হৈ পৰিছিল যে, দিল্লীত বিজেপিয়ে চৰকাৰ গঠন কৰিবলৈ গৈ আছে। ২৭ বছৰৰ মূৰত দিল্লীত ক্ষমতা দখল কৰিলে বিজেপিয়ে। যোৱা কেইবছৰমানৰ পৰা আম আদমী পাৰ্টিয়ে দিল্লীত নিজৰ শক্তিশালী স্থিতি প্ৰতিষ্ঠা কৰিছিল, যদিও এইবাৰ দিল্লীৰ জনসাধাৰণে বিজেপিৰ সপক্ষে নিজৰ ভোটাধিকাৰ সাব্যস্ত কৰিছে।
বিজেপি কৰ্মীসকলৰ বিজয় উদযাপন
দিল্লী বিধানসভাৰ মুঠ ৭০খন আসনত সংখ্যাগৰিষ্ঠতাৰ বাবে ৩৬খন আসনৰ প্ৰয়োজন হৈছিল আৰু বিজেপিয়ে ৪৮খন আসন লাভ কৰিছে। আনহাতে আম আদমী পাৰ্টিয়ে মাত্ৰ ২২খন আসন লৈ সন্তুষ্ট হ’বলগীয়া হৈছে।
দিল্লীৰ ৰাজনীতিত উত্তাল পৰিস্থিতি
নিৰ্বাচনৰ প্ৰাৰম্ভিক ধাৰাসমূহৰ পিছত স্পষ্ট হৈ পৰিছিল যে, বিজেপিয়ে আগবাঢ়ি আছে। দুপৰীয়ালৈকে অধিক স্পষ্ট হৈ পৰিছিল যে দিল্লীৰ আম আদমি পাৰ্টি চৰকাৰৰ অস্তিত্ব নাইকীয়া হ’বলৈ ওলাইছে। বিজেপিয়ে ৪৮খন আসনত অগ্ৰগতি লাভ কৰাৰ বিপৰীতে আপৰ হাতত আছিল মাত্ৰ ২২খন আসন।
দিল্লীত কংগ্ৰেছ পাৰ্টিৰ পৰিস্থিতি আৰু বেয়া হৈ পৰিছিল। এই নির্বাচনত কংগ্রেছ দলে এখনো আসন নাপালে, যিটো কংগ্রেছ দলৰ বাবে এক মোক্ষম আঘাত৷ একে সময়তে ওৱাইছিৰ দলটোৱেও দিল্লীৰ মুছলমানসকলৰ মাজত নিজৰ স্থান দখল কৰিবলৈ ব্যৰ্থ হয় আৰু তেওঁৰ দলটোৱে সমৰ্থন আশা কৰা সেই অঞ্চলসমূহৰ পৰাও বিজেপিয়েহে জয়লাভ কৰে।
মূল নেতাসকলৰ পৰাজয়
নিৰ্বাচনৰ ফলাফলে এটা বৃহৎ বাৰ্তা দিছে যে, এতিয়া দিল্লীত বিজেপিৰ ৰাজনীতিয়ে আধিপত্য বিস্তাৰ কৰিছে। অৰবিন্দ কেজৰিৱাল, মনীষ চিছ’দিয়া, সৌৰভ ভৰদ্বাজ, আৱধ ওঝাৰ দৰে বিশিষ্ট নেতাও এই নিৰ্বাচনত পৰাস্ত হয়। যদিও কলকাজী আসনত আতিশীয়ে বিজয় লাভ কৰিছিল, তথাপিও দিল্লীৰ ৰাজনীতিত বিজেপিৰ আধিপত্য বাঢ়িছিল।
দিল্লীৰ প্ৰাক্তন মুখ্যমন্ত্ৰী অৰবিন্দ কেজৰিৱালে এইবাৰ নতুন দিল্লীৰ আসনৰ পৰা পৰবেশ ভাৰ্মাৰ হাতত ৩১৮২টা ভোটৰ ব্যৱধানত পৰাস্ত হয়। একে সময়তে জাংপুৰাৰ আসনৰ পৰা নিৰ্বাচনত পৰাস্ত হৈ মনীষ ছিছ’দিয়াই নিজৰ প্ৰভাৱ হেৰুৱাই পেলাইছে।
প্ৰধানমন্ত্ৰী মোদীৰ সঁহাৰি
দিল্লীৰ নির্বাচনত বিজেপিৰ জয়ৰ পাছত প্রধানমন্ত্রী নৰেন্দ্র মোদীয়ে ছ’চিয়েল মিডিয়াত সুখ প্রকাশ কৰি ইয়াক উন্নয়ন আৰু সুশাসনৰ জয় বুলি অভিহিত কৰে৷ তেওঁ লিখিছে, "জনতাৰ ক্ষমতা সৰ্বোচ্চ! উন্নয়ন জয়ী, সুশাসন জয়ী।"
বিজেপিক এক ঐতিহাসিক বিজয় দিয়াৰ বাবে দিল্লীৰ সকলো ভাই-ভনীলৈ মোৰ প্ৰণাম আৰু অভিনন্দন! প্ৰধানমন্ত্ৰী মোদীয়ে আৰু কয় যে "দিল্লীৰ সৰ্বাংগীন উন্নয়নৰ বাবে আৰু ইয়াৰ জনসাধাৰণৰ জীৱন উন্নত কৰাৰ বাবে আমি সকলো অসম্ভৱ সম্ভৱ কৰিম। এয়া আমাৰ নিশ্চয়তা।"
পৰাজয় মানি লৈছে অৰবিন্দ কেজৰিৱালে
দিল্লী নিৰ্বাচনৰ ফলাফলৰ পিছত অৰবিন্দ কেজৰিৱালে পৰাজয় মানি লৈ বিজেপিক অভিনন্দন জনায়। তেওঁ কয়, "আমি বিনম্ৰতাৰে ৰাইজৰ সিদ্ধান্ত গ্ৰহণ কৰিছোঁ। এই বিজয়ৰ বাবে বিজেপিলৈ অভিনন্দন। আশাকৰোঁ তেওঁ যি আশাৰে মানুহে তেওঁক সংখ্যাগৰিষ্ঠতা দিছে, সেই আশাৰে তেওঁলোকে পূৰণ কৰিব।"
বিজেপি কৰ্মীসকলৰ বিজয় উদযাপন
দিল্লী বিজেপিৰ মুখ্য কাৰ্যালয়ত কৰ্মীসকলৰ উৎসাহ চাবলগীয়া আছিল। ১৫খন আসনত বিজেপিয়ে জয়লাভ কৰাৰ বিপৰীতে ৩২খন আসনত আগবাঢ়ি আছিল। এই বৃহৎ বিজয় উদযাপন কৰি বিজেপিৰ নেতা কৰ্মীসকলে প্ৰধানমন্ত্ৰী মোদীক ধন্যবাদ জ্ঞাপন কৰে।
স্বাতী মালিৱাল আৰু কুমাৰ বিশ্বাসৰ প্ৰতিক্ৰিয়া
দিল্লী বিধানসভা নিৰ্বাচনৰ ফলাফল সন্দৰ্ভত মন্তব্য কৰি ৰাজ্যসভাৰ সাংসদ স্বতী মালিৱালে কয়, "কাৰো গৌৰৱ বেছি দিন নাথাকে। আনকি ৰাৱণৰ অহংকাৰো ছিন্নভিন্ন হৈ পৰিছিল, এয়া অৰবিন্দ কেজৰিৱাল। আজি দিল্লী সম্পূৰ্ণৰূপে জাবৰৰ দম হৈ পৰিছে, ৰাস্তা-ঘাট ভাঙি গৈছে, মানুহে পানী পোৱা নাই। বায়ু প্ৰদূষণৰ শিখৰত উপনীত হৈছে, যমুনা পৰিষ্কাৰ হোৱা নাই। এইবোৰ বিষয়ত অশান্তি পোৱাৰ বাবেই মানুহে এই ভোটাধিকাৰ সাব্যস্ত কৰিছে।"
এসময়ত আম আদমী পাৰ্টিৰ মুখপাত্ৰ কুমাৰ বিশ্বাসেও দিল্লীত দলটোৰ পৰাজয়ক লৈ প্ৰতিক্ৰিয়া প্ৰকাশ কৰে। তেওঁ কয়, "মোৰ পত্নীয়ে টিভিত জাংপুৰাত মনীষ চিছ’দিয়াৰ পৰাজয়ৰ খবৰ পোৱাৰ লগে লগে কান্দিবলৈ ধৰিলে। এয়া সমগ্ৰ দলৰ বাবে পৰাজয়।"
ৰাজনীতিৰ ভৱিষ্যত
দিল্লীত বিজেপিৰ এই দৰ্শনীয় বিজয়ে কেৱল দিল্লীৰ ৰাজনীতিত প্ৰভাৱ পেলোৱাই নহয়, ইয়াৰ প্ৰভাৱ পঞ্জাৱ আৰু অন্যান্য ৰাজ্যতো দেখা গৈছে। বিজেপিৰ কেন্দ্ৰীয় মন্ত্ৰী নীতিন গাডকাৰীয়ে কয় যে, "প্ৰধানমন্ত্ৰী নৰেন্দ্ৰ মোদীৰ নেতৃত্বত দিল্লীৰ জনসাধাৰণে সৰ্বাংগীন উন্নয়ন মানি লৈছে আৰু বিজেপিৰ বিজয়ৰ পিছত দিল্লীত উন্নয়নৰ এক নতুন অধ্যায় আৰম্ভ হ’ব।"
একে সময়তে এই পৰাজয়ৰ পাছত পঞ্জাৱৰ মুখ্যমন্ত্রী ভগৱন্ত মানেও অৰবিন্দ কেজৰিৱালৰ ঘৰত সাক্ষাৎ কৰিবলৈ উপস্থিত হয়, যিটোৰ ইংগিত যে দিল্লীৰ পৰাজয়ৰ প্রভাৱ এতিয়া পঞ্জাৱতো দেখা গৈছে৷
দিল্লীত বিজেপিৰ দৰ্শনীয় বিজয়ে আকৌ এবাৰ প্ৰমাণ কৰিলে যে, উন্নয়ন আৰু সুশাসনৰ কথা অহাৰ লগে লগে দিল্লীৰ জনসাধাৰণে বিজেপিৰ সৈতে থিয় দিছে। এই পৰাজয় আম আদমী পাৰ্টিৰ বাবে এক কঠিন শিক্ষা। যাতে তেওঁলোকে পৰৱৰ্তী নিৰ্বাচনৰ বাবে নিজৰ কৌশল উন্নত কৰিব পাৰে। এতিয়া সকলোৰে দৃষ্টি বিজেপিয়ে দিল্লীত দিয়া প্ৰতিশ্ৰুতি কেনেকৈ পূৰণ কৰে আৰু ৰাইজৰ আশা পূৰণ কৰে।
