যুটীয়া সংসদীয় সমিতিৰ ৱাকফ প্ৰতিবেদনক ‘অসাংবিধানিক’ বুলি অভিহিত কৰে মল্লিকাৰ্জুন খাৰ্গে
নতুন দিল্লী
বিৰোধী দলৰ সদস্যৰ হুলস্থুলৰ মাজতে বৃহস্পতিবাৰে ৰাজ্যসভাত ৱাকফ (সংশোধনী) বিধেয়ক সন্দৰ্ভত যুটীয়া সংসদীয় সমিতিয়ে প্ৰতিবেদন দাখিল কৰে। সংসদত বিশৃংখলতাৰ সৃষ্টি হোৱাৰ বাবে লগে লগে সদন ১০ মিনিটৰ বাবে স্থগিত ৰখা হয় আৰু পুনৰ আহ্বান কৰা হয় আৰু দুয়োপক্ষই বিধেয়কখনৰ ওপৰত আলোচনা আৰম্ভ কৰে।
সদনৰ নেতা জে পি নাড্ডাইও ৰাষ্ট্ৰপতিৰ টোকা পাঠৰ সময়ত বিৰোধী দলক হুলস্থুলৰ সৃষ্টি কৰা বুলি গৰিহণা দিয়ে।
ৰাজ্যসভাৰ বিৰোধী দলৰ নেতা মল্লিকাৰ্জুন খাৰ্গে এই প্ৰতিবেদনক ‘অসাংবিধানিক’ আৰু ‘ভুৱা’ বুলি অভিহিত কৰে। তেওঁ দাবী কৰিছিল যে একাধিক সদস্যই মতানৈক্যৰ টোকা দাখিল কৰিছিল যদিও সংখ্যাগৰিষ্ঠতাৰ মতামতটো যথাযথ বিবেচনা নকৰাকৈয়ে জোৰকৈ পাৰ কৰা হৈছিল।
খাৰ্গে কয় যে, "ৱাকফৰ সন্দৰ্ভত জেপিচিৰ প্ৰতিবেদনত কেইবাজনো সদস্যৰ বিৰোধী মতামত আছিল, কিন্তু তেওঁলোকৰ মতামতক গুৰুত্ব দিয়া হোৱা নাছিল। এইটো সঠিক নহয়। ই নিন্দনীয় আৰু গণতন্ত্ৰ বিৰোধী কাৰ্য্য।"
"শ্বক" প্ৰকাশ কৰি তেওঁ কয়, "বিৰোধী মতামতসমূহ ডিলিট কৰা হৈছে, আৰু প্ৰতিবেদনখন দাখিল কৰা হৈছে। মই ইয়াক নিন্দা কৰিছো, আৰু সদনে এই ভুৱা প্ৰতিবেদন কেতিয়াও গ্ৰহণ নকৰে।"
যদিহে বিৰোধী মতামত বাদ দিয়া হয় তেন্তে প্ৰতিবেদন প্ৰত্যাহাৰ কৰি পুনৰ পৰ্যালোচনা কৰিবলৈ দাবী জনায়। তেওঁ সদনৰ নেতা জে পি নাড্ডাক জেপিচিৰ "অসাংবিধানিক" প্ৰতিবেদন পুনৰ ল'বলৈ আহ্বান জনায়।
এই হুলস্থুলৰ পিছতে নাড্ডাই বিৰোধীৰ আচৰণক তীব্ৰ সমালোচনা কৰি প্ৰত্যুত্তৰ দিয়ে। তেওঁ দৃঢ়তাৰে কয়, "সংসদত বিতৰ্ক আৰু আলোচনাৰ প্ৰয়োজন। গণতন্ত্ৰত আমি মতানৈক্য হ'বলৈ সন্মত। কিন্তু আমি পৰম্পৰা ৰক্ষা কৰিব লাগিব আৰু সাংবিধানিক পদ্ধতিৰে কাৰ্য্যবিধি চলাব লাগিব।"
হতাশা প্ৰকাশ কৰি তেওঁ লগতে কয়, "অধ্যক্ষৰ পৰা বাৰে বাৰে অনুৰোধ জনোৱাৰ পিছতো ৰাষ্ট্ৰপতিৰ বাৰ্তাৰ সময়তো বিৰোধীয়ে সদনত ব্যাঘাত জন্মাইছিল। এই আচৰণ অতি দায়িত্বহীন আৰু ই তীব্ৰ নিন্দাৰ যোগ্য।"
কেন্দ্ৰীয় সংসদীয় পৰিক্ৰমা মন্ত্ৰী কিৰেন ৰিজিজুৱেও বিৰোধী পক্ষক লক্ষ্য কৰি বিষয়টোক “বিপথে পৰিচালিত” কৰাৰ অভিযোগ উত্থাপন কৰে। তেওঁ কয় যে প্ৰতিবেদনৰ কোনো অংশ মচি পেলোৱা বা পৰিৱৰ্তন কৰা হোৱা নাই।
বিৰোধীয়ে উত্থাপন কৰা কিছুমান উদ্বেগ পৰীক্ষা কৰা হৈছিল আৰু দেখিলোঁ যে প্ৰতিবেদনৰ কোনো ধাৰা আঁতৰোৱা হোৱা নাই। সদনৰ সন্মুখত সকলো দাখিল কৰা হৈছে। কি ভিত্তিত এই অভিযোগ উত্থাপন কৰা হৈছে? বিষয়টোক বিপথে পৰিচালিত নকৰিব।'
তেওঁ আৰু আঙুলিয়াই দিয়ে যে বিগত ছমাহত বিৰোধীয়ে প্ৰতিবেদন প্ৰস্তুতৰ কামত সক্ৰিয়ভাৱে জড়িত হৈ আছে।
বিজেপিৰ সাংসদ তথা ৱাকফ (সংশোধনী) বিধেয়কৰ যুটীয়া সংসদীয় সমিতিৰ অধ্যক্ষ জগদাম্বিকা পালে ইয়াৰ পূৰ্বেও কয় যে কেইবামাহো ধৰি আলোচনাৰ অন্তত কমিটীয়ে প্ৰতিবেদন দাখিল কৰিছে।
পালে আলোকপাত কৰে যে মতানৈক্য বিধান প্ৰক্ৰিয়াৰ অংশ। তেওঁ লগতে কয় যে প্ৰতিবেদন চূড়ান্ত হোৱাৰ পিছতো বিৰোধী সদস্যসকলক তেওঁলোকৰ মতানৈক্যৰ টোকা দাখিল কৰিবলৈ আমন্ত্ৰণ জনোৱা হৈছিল, যিবোৰ অংশীদাৰসকলৰ মতামতৰ সৈতে চূড়ান্ত প্ৰতিবেদনত অন্তৰ্ভুক্ত কৰা হৈছিল।
ইয়াৰ পিছতো বিৰোধী নেতাসকলে আপত্তি প্ৰকাশ কৰি থাকিল। জেপিচিৰ সদস্য তৃণমূল কংগ্ৰেছৰ সাংসদ কল্যাণ বেনাৰ্জী আৰু এমডি নাদিমুল হকে চূড়ান্ত প্ৰতিবেদনৰ পৰা তেওঁলোকৰ মতানৈক্য নোটৰ মূল অংশ মচি পেলোৱাৰ অভিযোগ উত্থাপন কৰে।
ৱাকফৰ সম্পত্তি নিয়ন্ত্ৰণৰ বাবে প্ৰৱৰ্তন কৰা ১৯৯৫ চনৰ ৱাকফ আইনখনক দীৰ্ঘদিন ধৰি অপব্যৱস্থাপনা, দুৰ্নীতি, আৰু অবৈধ বেদখলৰ বাবে সমালোচনা কৰা হৈছে। ৱাকফ (সংশোধনী) বিধেয়ক, ২০২৪ৰ লক্ষ্য হৈছে ৰেকৰ্ডসমূহৰ ডিজিটেলাইজেচন, বৰ্ধিত অডিটিং ব্যৱস্থা, উন্নত স্বচ্ছতা, আৰু অবৈধভাৱে দখল কৰা সম্পত্তিসমূহ পুনৰ উদ্ধাৰৰ বাবে আইনী ব্যৱস্থাকে ধৰি সংস্কাৰ ৰূপায়ণ কৰা।
