পাঞ্চকুলা
বৃহস্পতিবাৰে হাৰিয়ানাৰ মুখ্যমন্ত্ৰী হিচাপে শপত গ্ৰহণ কৰি বিজেপি নেতা নয়ব সিং ছাইনীয়ে দ্বিতীয়বাৰৰ বাবে শীৰ্ষ পদটোত কাৰ্যনিৰ্বাহ কৰিবলৈ আৰম্ভ কৰে। প্ৰধানমন্ত্ৰী নৰেন্দ্ৰ মোদী আৰু বিজেপিৰ শীৰ্ষ নেতাসকলে অংশগ্ৰহণ কৰা হাইপ্ৰফাইল অনুষ্ঠানত ছাইনীৰ মন্ত্ৰী পৰিষদেও শপত গ্ৰহণ কৰে।
হাৰিয়ানাৰ ৰাজ্যপাল বান্দাৰু দত্তাত্ৰেয়ই চাইনীক পদ আৰু গোপনীয়তাৰ শপত গ্ৰহণ কৰায়। পাঞ্চকুলাৰ দশেহৰা ময়দানত কেন্দ্ৰীয় মন্ত্ৰী অমিত শ্বাহ, ৰাজনাথ সিং, নীতিন গাডকাৰীৰ লগতে নেশ্যনেল ডেম’ক্ৰেটিক এলায়েন্স (এন ডি এ) শাসিত ৰাজ্যৰ মুখ্যমন্ত্ৰীসকলৰ উপস্থিতিৰ মাজতে এই শপতগ্ৰহণ অনুষ্ঠিত হয়।
হাৰিয়ানা বিজেপিৰ ভিতৰত সকলো ঠিকেই আছে বুলি এক চিন স্বৰূপে ছাইনীয়ে শপতগ্ৰহণ অনুষ্ঠানত মঞ্চত তেওঁৰ পূৰ্বসূৰী তথা গুৰু মনোহৰ লাল খট্টৰক কাষত লৈ উপস্থিত হৈছিল। মুখ্যমন্ত্ৰীৰ প্ৰতিদ্বন্দ্বিতাত অৱতীৰ্ণ হোৱা বুলি চৰ্চা চলি থকা জ্যেষ্ঠ নেতা অনিল বিজে ছাইনী ২.০ মন্ত্ৰীসভাত মন্ত্ৰী হিচাপে শপত গ্ৰহণ কৰে।
হাৰিয়ানাত মুখ্যমন্ত্ৰীকে ধৰি সৰ্বাধিক ১৪ জন মন্ত্ৰী থাকিব পাৰে। ছাইনীৰ কেবিনেটত মন্ত্ৰী হিচাপে শপত গ্ৰহণ কৰে অনিল বিজ, কৃষণ লাল পানৱাৰ, ৰাও নৰবীৰ সিং, মহিপাল ধনদা, বিপুল গোৱেল, অৰবিন্দ কুমাৰ শৰ্মা, শ্ৰুতি চৌধুৰী, শ্যাম সিং ৰানা, ৰণবীৰ সিং গংগৱা, কৃষণ বেদী, গৌৰৱ গৌতম, আৰ্তি সিং ৰাও আৰু ৰাজেশ নগৰে।
খট্টৰৰ ঠাইত মুখ্যমন্ত্ৰী হিচাপে নিযুক্তি লাভ কৰাৰ কেইমাহমানৰ পাছত ছাইনীয়ে ৫ অক্টোবৰৰ হাৰিয়ানা বিধানসভা নিৰ্বাচনত বিজেপিক ঐতিহাসিক জয়ৰ দিশত আগুৱাই লৈ যায়। এগজিট প’লৰ ভৱিষ্যদ্বাণীক অৱজ্ঞা কৰি গেৰুৱা দলটোৱে ৯০ জনীয়া বিধান সভাত ৪৮খন আসন লাভ কৰি ৰাজ্যখনত ক্ৰমাগত তৃতীয়টো কাৰ্যকাল নিশ্চিত কৰে।
কুৰুক্ষেত্ৰ জিলাৰ লাডৱা আসনত প্ৰতিদ্বন্দ্বিতা কৰি জয়ী হোৱা ৫৪ বছৰীয়া দলিত নেতাগৰাকীয়ে বুধবাৰে হাৰিয়ানাত সৰ্বসন্মতিক্ৰমে বিজেপিৰ বিধায়িনী দলৰ নেতা হিচাপে নিৰ্বাচিত হয়। ইয়াৰ পিছতে তেওঁ ৰাজ্যপাল বান্দৰু দত্তত্ৰেয়ক সাক্ষাৎ কৰি ৰাজ্যখনৰ পৰৱৰ্তী চৰকাৰ গঠনৰ দাবী কৰে।
হাৰিয়ানাত বিজেপিৰ বিশিষ্ট দলিত নেতা ছাইনীয়ে ইয়াৰ পূৰ্বে কুৰুক্ষেত্ৰৰ লোকসভাৰ সাংসদ হিচাপে কাৰ্যনিৰ্বাহ কৰিছিল। ১৯৭০ চনৰ ২৫ জানুৱাৰীত আম্বালাত জন্মগ্ৰহণ কৰা ছাইনীয়ে বি আৰ আম্বেদকাৰ বিহাৰ বিশ্ববিদ্যালয় আৰু চৰণ সিং বিশ্ববিদ্যালয়ৰ পৰা স্নাতক আৰু আইনৰ ডিগ্ৰী লাভ কৰে।
১৯৯৬ চনৰ পৰা বিজেপিৰ হাৰিয়ানা ইউনিটত সক্ৰিয় হৈ থকা ছাইনীয়ে ২০০২ চনত দলটোৰ যুৱ শাখাৰ জিলা সাধাৰণ সম্পাদক হিচাপে কাম আৰম্ভ কৰে, আৰু ২০০৫ চনত যুৱ মৰ্চাৰ জিলা সভাপতি হয়। পিছলৈ তেওঁ আম্বালাৰ জিলা সভাপতি আৰু বিজেপি কিষাণ মৰ্চা সাধাৰণ সম্পাদককে ধৰি গুৰুত্বপূৰ্ণ ভূমিকা পালন কৰে।
ছাইনীয়ে ২০১০ চনত নিৰ্বাচনী সভাত আত্মপ্ৰকাশ কৰিছিল যদিও ২০১৪ চনত নাৰায়ণগড়ৰ পৰা প্ৰথমখন বিধানসভাৰ আসন লাভ কৰি খট্টৰ কেবিনেটত যোগদান কৰে। ২০২৩ চনৰ অক্টোবৰ মাহত তেওঁক হাৰিয়ানা বিজেপিৰ মুৰব্বী হিচাপে নিযুক্তি দিয়া হয়।
