নতুন দিল্লী
মঙলবাৰে জম্মু-কাশ্মীৰৰ পুঞ্চ জিলাত পাকিস্তান সেনাই দুয়োখন দেশৰ মাজত অব্যহত থকা যুদ্ধবিৰতি চুক্তি উলংঘা কৰি অনুপ্ৰৱেশ কৰিছিল। অনুপ্ৰৱেশৰ পিছতে সেনাৰ প্ৰতিশোধমূলক গুলীচালনাত ৪-৫ জন অনুপ্ৰৱেশকাৰীক হত্যা কৰা হয় বুলি এক সূত্ৰই প্ৰকাশ কৰিছে। পুঞ্চ জিলাৰ কৃষ্ণ ঘাটি অঞ্চলত অনুপ্ৰৱেশৰ চেষ্টা সফলতাৰে বিফল কৰা বুলি সেনাই জানিবলৈ দিয়ে।
মঙলবাৰে পাকিস্তানী সেনা আৰু অনুপ্ৰৱেশকাৰীয়ে গুলীচালনা কৰাৰ পিছত ভাৰতীয় সেনাই প্ৰতিশোধ মূলক গুলীচালনা কৰিছিল। সূত্ৰই প্ৰকাশ কৰা অনুসৰি এই সংঘৰ্ষত পাকিস্তানী পক্ষ যথেষ্ট ক্ষতিগ্ৰস্ত হৈছে।
যোৱা কেইমাহমানৰ ভিতৰত এইটোৱেই প্ৰথমবাৰৰ বাবে সেনাই নিশ্চিত কৰিছে যে, পাকিস্তানে যুদ্ধবিৰতি উলংঘা কৰিছে। চলিত বৰ্ষৰ ফেব্ৰুৱাৰী মাহৰ আৰম্ভণিতে কৃষ্ণ ঘাটি খণ্ডতো একেধৰণৰ ক্ৰছ ফায়াৰিঙৰ ঘটনা সংঘটিত হৈছিল।
ভাৰতীয় সেনাই উল্লেখ কৰে যে, তেওঁলোকৰ পক্ষৰ কোনো প্ৰাণ বা সা-সম্পত্তিৰ ক্ষতি হোৱা নাই। গোটেই দিনটো মাজে মাজে গুলীচালনা চলি থাকিল, কৃষ্ণ ঘাটি অঞ্চলত ভাৰতীয় সেনা সম্পূৰ্ণৰূপে নিয়োজিত হৈ আছে।
প্ৰতিৰক্ষাৰ এগৰাকী মুখপাত্ৰই কয় যে, "১ এপ্ৰিলত কৃষ্ণ ঘাটি ছেক্টৰত পাকিস্তান সেনাৰ অনুপ্ৰৱেশৰ বাবেই এক মাইন বিস্ফোৰণ ঘটিছিল। ইয়াৰ পিছতে পাকিস্তান সেনাই অপ্ৰৰোচিত গুলীচালনা আৰু যুদ্ধবিৰতি উলংঘা কৰিছিল। আমাৰ সৈন্যই নিয়ন্ত্ৰিত আৰু মানাংকিতভাৱে ফলপ্ৰসূভাৱে প্ৰতিক্ৰিয়া প্ৰকাশ কৰিছিল। বৰ্তমান পৰিস্থিতি নিয়ন্ত্ৰণত আছে আৰু নিবিড়ভাৱে নিৰীক্ষণ কৰা হৈছে।"
