নতুন দিল্লী
সমগ্ৰ বিশ্বজুৰি মুছলমানসকলে পালন কৰা পবিত্ৰ মাহ ৰমজান উপলক্ষে দেওবাৰে প্ৰধানমন্ত্ৰী নৰেন্দ্ৰ মোদীয়ে দেশৰ ইছলাম ধৰ্মালম্বী লোকসকলক শুভেচ্ছা জ্ঞাপন কৰিছে।
প্ৰধানমন্ত্ৰী নৰেন্দ্ৰ মোদীয়ে এক্সত এক পোষ্ট কয়, "পবিত্ৰ ৰমজান মাহ আৰম্ভ হোৱাৰ লগে লগে ই আমাৰ সমাজত শান্তি আৰু সম্প্ৰীতি কঢ়িয়াই আনক। এই পবিত্ৰ মাহটোৱে প্ৰতিফলন, কৃতজ্ঞতা আৰু ভক্তিৰ সাৰ্থকতা, লগতে আমাক মমতা, দয়া আৰু সেৱাৰ মূল্যবোধৰ কথাও সোঁৱৰাই দিয়ে। ৰমজান মুবাৰক!"
সমগ্ৰ দেশৰ মুছলমানসকলৰ ৰোজাৰ প্ৰথম দিন উপলক্ষে দেওবাৰৰ পৰা ভাৰতত ৰমজানৰ আৰম্ভণি হয়। অৰ্ধচন্দ্ৰ দৰ্শনৰ পিছতে আন বিভিন্ন দেশতো আৰম্ভ হৈছে এই উদযাপন। শুকুৰবাৰে প্ৰধানমন্ত্ৰী মোদীয়ে ২৫ সংখ্যক জাহান-ই-খুছৰোত অংশগ্ৰহণ কৰি ৰমজানৰ বাবে আগতীয়া শুভেচ্ছা জ্ঞাপন কৰে।
উত্তৰ প্ৰদেশৰ মুখ্যমন্ত্ৰী যোগী আদিত্যনাথেও আনুষ্ঠানিক বিবৃতি প্ৰকাশ কৰি পবিত্ৰ অনুষ্ঠানত ৰাইজক শুভেচ্ছা জনাই ৰমজানত ৰোজা আৰু মানৱতাৰ সেৱাৰ গুণসমূহৰ ওপৰত আলোকপাত কৰে।
মুখ্যমন্ত্ৰী যোগীয়ে কয় যে, এই পবিত্ৰ দিনবোৰত উপবাস, আত্ম-অনুশাসন, ধৈৰ্য্য আৰু নামাজৰ দৰে ভাল কামে সহনশীলতা, সৰলতা আৰু পাৰস্পৰিক ভাতৃত্ববোধৰ মূল্যবোধক পুষ্ট কৰে।
ৰমজান মাহটো পুৱাৰ পৰা সূৰ্যাস্তলৈকে ৰোজা ৰখাৰ বাবে উৎসৰ্গিত কৰা হয়, ইয়াৰ অন্ত পৰে ঈদ-উল-ফিটৰ উদযাপনৰ সৈতে। শনিবাৰে চান্দনী চ’কৰ ফাতেহপুৰী মছজিদৰ শ্বাহী ইমাম মৌলানা মুফতি মুকাৰৰাম আহমেদে বিভিন্ন ধৰ্মীয় সংগঠনৰ লগতে ২০২৫ চনৰ ২ মাৰ্চৰ পৰা পবিত্ৰ মাহ আৰম্ভ হ’ব বুলি ঘোষণা কৰিছিল।
ইছলামিক কেলেণ্ডাৰ অনুসৰি চন্দ্ৰ দেখাৰ লগে লগে এই ৰমজান মাহৰ আৰম্ভণি আৰু শেষ নিৰ্ধাৰণ কৰা হয়, যিটো সাধাৰণতে ৩০ দিনীয়া হয়। শ্বাহী ইমামে উল্লেখ কৰিছে যে, যিহেতু শনিবাৰটো পূৰ্বৰ চন্দ্ৰ মাহৰ সামৰণি হৈছিল আৰু বতৰৰ অৱস্থা বেয়াৰ বাবে চন্দ্ৰ দেখা পোৱা নাছিল, সেয়েহে দেওবাৰক ৰোজাৰ প্ৰথম দিন হিচাপে নিৰ্ধাৰণ কৰা হৈছিল।
গোটেই ৰমজানত মুছলমানসকলে পুৱাৰ পৰা সূৰ্যাস্তলৈকে ৰোজা পালন কৰে আৰু সন্ধিয়া তাৰাৱীহ নামৰ বিশেষ নামাজত অংশগ্ৰহণ কৰে, য’ত গোটেই মাহটো সমগ্ৰ কোৰাণ পাঠ কৰা হয়। এই নামাজ ঈদৰ চন্দ্ৰ দৰ্শন নোহোৱালৈকে চলি থাকে, যাৰ ফলত ৰোজাৰ সময় শেষ হয় আৰু উদযাপনৰ আৰম্ভণি হয়।
