নতুন দিল্লী
দ্বিতীয় কাৰ্যকালৰ বাবে আমেৰিকাৰ ৰাষ্ট্ৰপতি দ্বায়িত্ব গ্ৰহণ কৰা 'প্ৰিয় বন্ধু' ড'নাল্ড ট্ৰাম্পৰ সৈতে প্ৰথম সাক্ষাৎ কৰিবলৈ ১২-১৩ ফেব্ৰুৱাৰীত আমেৰিকা ভ্ৰমণ কৰিব প্ৰধানমন্ত্ৰী নৰেন্দ্ৰ মোদীয়ে। আমেৰিকাৰ ৰাষ্ট্ৰপতিয়ে ট্ৰাম্পে কাৰ্যভাৰ গ্ৰহণ কৰাৰ প্ৰথম মাহৰ ভিতৰত ভাৰতক শুল্কৰ ভাবুকি দিয়াৰ লগতে অবৈধ ভাৰতীয় অনুপ্ৰৱেশকাৰীক বিতাড়ন কৰাৰ সময়তে এই ভ্ৰমণৰ আয়োজন কৰা হৈছে।
এই ভ্ৰমণৰ কথা ঘোষণা কৰি বৈদেশিক মন্ত্ৰী বিক্ৰম মিশ্ৰীয়ে কয় যে, "ট্ৰাম্পৰ কাৰ্যভাৰ গ্ৰহণৰ পিছত আমেৰিকা ভ্ৰমণ কৰা প্ৰথম কেইজনমান বিশ্ব নেতাৰ ভিতৰত প্ৰধানমন্ত্ৰী মোদীও এগৰাকী হ'ব। নতুন প্ৰশাসনে কাৰ্যভাৰ গ্ৰহণ কৰাৰ মাত্ৰ তিনি সপ্তাহৰ ভিতৰতে প্ৰধানমন্ত্ৰীক আমেৰিকা ভ্ৰমণ কৰিবলৈ আমন্ত্ৰণ জনোৱাটোৱে ভাৰত-আমেৰিকাৰ অংশীদাৰিত্বৰ গুৰুত্বৰ কথা প্ৰকাশ কৰে আৰু ই আমেৰিকাত এই অংশীদাৰিত্বই লাভ কৰা দ্বিপাক্ষিক সমৰ্থনৰ প্ৰতিফলন ঘটায়।"
ইতিমধ্যে ট্ৰাম্পে ইজৰাইলৰ প্ৰধানমন্ত্ৰী বেঞ্জামিন নেতানিয়াহুক সাক্ষাৎ কৰিছে আৰু এই সপ্তাহত ৱাশ্বিংটনত জাপানৰ শ্বিগেৰু ইছিবাৰ সৈতে আলোচনাত মিলিত হোৱাৰ সম্ভাৱনা আছে।
ট্ৰাম্পৰ প্ৰথম কাৰ্যকালত সুসম্পৰ্ক গঢ়ি তোলা দুয়োগৰাকী নেতাই যোৱা সপ্তাহত এক ফোন কলৰ কৰিছিল, যিটোক দুয়োপক্ষই 'উৎপাদনশীল' বুলি অভিহিত কৰিছিল। হোয়াইট হাউছে জনোৱা মতে, দুয়োগৰাকী নেতাই অনুপ্ৰৱেশ, নিৰাপত্তা আৰু বাণিজ্যিক সম্পৰ্কৰ বিষয়ে আলোচনা কৰে। ট্ৰাম্পক তেওঁৰ প্ৰিয় বন্ধু বুলি উল্লেখ কৰি প্ৰধানমন্ত্ৰী মোদীয়ে কয় যে, দুয়োগৰাকী নেতাই “আমাৰ জনসাধাৰণৰ কল্যাণ” আৰু “বিশ্ব শান্তিৰ দিশত” একেলগে কাম কৰিব।
ৰিপাব্লিকান দলৰ কেন্দ্ৰীয় নেতাগৰাকীয়ে যোৱা বছৰ প্ৰধানমন্ত্ৰী নৰেন্দ্ৰ মোদীক “মহান নেতা” বুলি অভিহিত কৰিছিল, যদিও ইয়াৰ পূৰ্বে ভাৰতক “শুল্ক ৰজা” আৰু বাণিজ্যিক সম্পৰ্কৰ “বৃহৎ উৎপীড়ক” বুলিও অভিহিত কৰিছিল।
যোৱা সপ্তাহত নিৰ্মলা সীতাৰমণে দাখিল কৰা কেন্দ্ৰীয় বাজেটত ইতিমধ্যে ট্ৰাম্পৰ প্ৰভাৱ দেখা গৈছিল, য’ত চৰকাৰে মূলতঃ আমেৰিকাই ৰপ্তানি কৰা সামগ্ৰী যেনে ১৬০০ চিচিতকৈ কম ইঞ্জিন ক্ষমতা থকা মটৰ চাইকেল (হাৰ্লি-ডেভিডছন)ৰ ওপৰত শুল্ক কৰ্তন কৰিছিল।
আমেৰিকাই সামৰিক বিমানেৰে ১০৪ জন অবৈধ ভাৰতীয়ক বিতাড়িত কৰাৰ পটভূমিত প্ৰধানমন্ত্ৰী মোদীৰ এই ভ্ৰমণৰ আন এটা প্ৰধান কেন্দ্ৰবিন্দু সম্ভৱতঃ অনুপ্ৰৱেশৰ বিষয় হ’ব। এই বিষয়টোৱে সংসদত ব্যাপক হুলস্থুলৰ সৃষ্টি কৰিছে, বিৰোধীয়ে ভাৰতীয়সকলক হেণ্ডকাফ বা ভৰি শিকলিৰে বান্ধি বিতাড়িত কৰা "অমানৱীয় পদ্ধতি"ক গৰিহণা দিয়ে।
