গুৱাহাটী
অসমৰ ৰাজ্যিক জন্তু এশিঙীয়া গঁড়ৰ সংৰক্ষণৰ প্ৰতি কম বয়সীয়া শিক্ষাৰ্থীসকলক আগ্ৰহী কৰি তোলাৰ বাবে অগ্ৰণী জৈৱ বৈচিত্ৰ্য সংৰক্ষণ সংস্থা আৰণ্যকে গ্ৰহণ কৰা উদ্যোগৰ অংশ হিচাপে অলপতে পবিতৰা বন্যপ্ৰাণী অভয়াৰণ্যৰ সমীপৰ কেইখনমান বিদ্যালয়ত আয়োজন কৰা 'গঁড় বিদ্যালয়লৈ যায়' শীৰ্ষক কাৰ্যসূচীত ১৭০০ৰো অধিক ছাত্ৰ-ছাত্ৰীয়ে অংশগ্ৰহণ কৰিছে।
পবিতৰা বন্যপ্ৰাণী অভয়াৰণ্য কৰ্তৃপক্ষৰ সহযোগত আৰু ডেভিদ শ্বেফাৰ্ড ৱাইল্ডলাইফ ফাউণ্ডেশ্যন (ডি এছ ডব্লিউ এফ)ৰ সহায়ত এই সজাগতা কাৰ্যসূচী অনুষ্ঠিত কৰা হয়। ইয়াৰে ২১ নৱেম্বৰত মায়ং উচ্চতৰ মাধ্যমিক বিদ্যালয়ত অনুষ্ঠিত কৰা প্ৰথমটো কাৰ্যসূচীত প্ৰায় ৪৫০ জন ছাত্ৰ-ছাত্ৰীয়ে অংশগ্ৰহণ কৰিছে।
মৰিগাঁও জিলাৰ অতিৰিক্ত আৰক্ষী অধীক্ষক ধ্ৰুৱজ্যোতি নাথে উদ্বোধন কৰা এই কাৰ্যসূচীত আৰণ্যকৰ গঁড় গৱেষণা আৰু সংৰক্ষণ বিভাগৰ প্ৰৱন্ধক আৰিফ হুছেইনে গঁড়ৰ আৱাসভূমি, সংৰক্ষণৰ প্ৰয়োজনীয়তা, পৰিৱেশতন্ত্ৰত ইয়াৰ গুৰুত্ব আদিকে ধৰি তৃণভোজী প্ৰাণীবিধৰ বিষয়ে বিস্তৃতভাৱে উপস্থাপন কৰিছে। আৰক্ষী বিষয়া নাথে শিক্ষাৰ্থীসকলক বন্যপ্ৰাণী সংৰক্ষণত সক্ৰিয় ভূমিকা গ্ৰহণ কৰিবলৈ আহ্বান জনায়।
বিদ্যালয়খনৰ প্ৰধান শিক্ষক আৰু অন্যান্য শিক্ষকসকলৰ লগতে মায়ং থানা সমিতিৰ সচিব ধৰ্ম নাথো উপস্থিত থকা অনুষ্ঠানটোত পবিতৰা বন্যপ্ৰাণী অভয়াৰণ্যৰ ৰেঞ্জ বিষয়া প্ৰাঞ্জল বৰুৱাই অভয়াৰণ্যখনৰ চহকী জৈৱ বৈচিত্ৰ্যৰ ওপৰত আলোকপাত কৰিছে। 'গঁড় বিদ্যালয়লৈ যায়' অভিযানৰ দ্বিতীয়টো কাৰ্যসূচী ২২ নৱেম্বৰত শংকৰদেৱ শিশু নিকেতন আৰু বুঢ়া-বুঢ়ী উচ্চতৰ মাধ্যমিক বিদ্যালয়ত অনুষ্ঠিত কৰা হয়।
প্ৰায় ৮৫০ জন ছাত্ৰ-ছাত্ৰীয়ে অংশগ্ৰহণ কৰা এই কাৰ্যসূচীত আৰণ্যকৰ প্ৰতিনিধি আৰিফ হুছেইনে শিক্ষাৰ্থীসকলক পৰিৱেশতন্ত্ৰত গঁড়ৰ গুৰুত্বৰ বিষয়ে ব্যাখ্যা কৰে আৰু তেওঁলোকক এই অমূল্য প্ৰাণীবিধৰ সংৰক্ষণৰ কাৰণে সাধ্যানুসৰি হাত উজান দিবলৈ অনুপ্ৰাণিত কৰে। পবিতৰা বন্যপ্ৰাণী অভয়াৰণ্যৰ ৰেঞ্জ বিষয়া প্ৰাঞ্জল বৰুৱা, দুয়োখন বিদ্যালয়ৰ প্ৰধান শিক্ষকদ্বয় আৰু শিক্ষক-শিক্ষয়িত্ৰীসকল আৰু অভয়াৰণ্যখনৰ ফৰেষ্টাৰ নং ১ মিতুল দাসেও এই কাৰ্যসূচীত অংশগ্ৰহণ কৰিছে।
পবিতৰা বন্যপ্ৰাণী অভয়াৰণ্যৰ সমীপৰ লোকপ্ৰিয় গোপীনাথ বৰদলৈ হাইস্কুলত ২৩ নৱেম্বৰত 'গঁড় বিদ্যালয়লৈ যায়' অভিযানৰ তৃতীয়টো কাৰ্যসূচী অনুষ্ঠিত কৰা হয়। প্ৰায় ৪০০ জন ছাত্ৰ-ছাত্ৰীয়ে অংশগ্ৰহণ কৰা এই কাৰ্যসূচীত গঁড় বিষয়ক পাৱাৰ পইন্ট উপস্থাপন, মত-বিনিময় আৰু মুকলি কুইজ প্ৰতিযোগিতা আদি অনুষ্ঠিত কৰা হয়।
আৰণ্যকৰ প্ৰতিনিধি আৰিফ হুছেইনে শিক্ষাৰ্থীসকলক পৰিৱেশতন্ত্ৰত গঁড়ৰ গুৰুত্বৰ বিষয়ে ব্যাখ্যা কৰে আৰু তেওঁলোকক এই অমূল্য প্ৰাণীবিধৰ সংৰক্ষণৰ কাৰণে সাধ্যানুসৰি হাত উজান দিবলৈ অনুপ্ৰাণিত কৰে।
বন্যপ্ৰাণী অভয়াৰণ্যৰ ৰেঞ্জ বিষয়া প্ৰাঞ্জল বৰুৱা, দুয়োখন বিদ্যালয়ৰ প্ৰধান শিক্ষকদ্বয় আৰু শিক্ষক-শিক্ষয়িত্ৰীসকল আৰু অভয়াৰণ্যখনৰ ফৰেষ্টাৰ নং ১ মিতুল দাসেও অংশগ্ৰহণ কৰা এই কাৰ্যসূচীতো আৰণ্যকৰ প্ৰতিনিধি আৰিফ হুছেইন মূল সমল ব্যক্তিৰুপে আছিল। তিনিওটা কাৰ্যসূচীতে আৰণ্যকৰ ক্ষেত্ৰ প্ৰতিনিধি উজ্জ্বল ভূঞা আৰু ৰাহুল দাস উপস্থিত থাকে।
