নতুন দিল্লী
উত্তৰ প্ৰদেশৰ সম্ভলত আদালতৰ নিৰ্দেশত কৰা মছজিদৰ জৰীপক লৈ সৃষ্টি হোৱা উত্তেজনাৰ বাবে সমগ্ৰ অঞ্চলটোত বিদ্যালয়সমূহ বন্ধ কৰাৰ উপৰিও মোবাইল ইণ্টাৰনেট স্থগিত ৰখা হৈছে আৰু বৃহৎ সমাৱেশ নিষিদ্ধ কৰা হৈছে। কিয়নো মছজিদৰ জৰীপৰ বিৰুদ্ধে শতাধিক লোকে প্ৰতিবাদ সাব্যস্ত কৰাৰ এদিন পিছতে আৰক্ষীৰ সৈতে সংঘৰ্ষত লিপ্ত হয় স্থানীয় ৰাইজ। যাৰ ফলত চাৰিজন লোকৰ মৃত্যু হোৱাৰ লগতে পুলিচকে ধৰি কেইবাজনো লোক আহত হৈছে।
সংঘৰ্ষত লিপ্ত ২০ জনতকৈ অধিক লোকক গ্ৰেপ্তাৰ কৰা হৈছে, আৰু আৰক্ষীয়ে সম্ভলৰ সাংসদ জিয়াউৰ ৰহমান বৰ্ক আৰু স্থানীয় বিধায়কৰ পুত্ৰ সোহেইল ইকবালৰ বিৰুদ্ধে হিংসাৰ পৰিকল্পনা আৰু উচটনি দিয়া, ভিৰ সংগঠিত কৰা, অশান্তিৰ সৃষ্টি কৰাৰ অভিযোগত গোচৰ ৰুজু কৰিছে বুলি বিষয়াসকলে জনায়।
সম্ভলত ২৪ ঘণ্টাৰ বাবে বন্ধ কৰি দিয়া হৈছে ইণ্টাৰনেট সেৱা। সকলো বিদ্যালয়-মহাবিদ্যালয় বন্ধ কৰা হৈছে, আৰু ৰাজহুৱা সমাৱেশ নিষিদ্ধ কৰা নিষেধাজ্ঞামূলক আদেশ জাৰি কৰা হৈছে। জিলা প্ৰশাসনে শিল, চ’ডাৰ বটল, বা কোনো জ্বলনশীল বা বিস্ফোৰক সামগ্ৰী ক্ৰয় বা মজুত কৰাত নিষেধাজ্ঞা আৰোপ কৰিছে। ৩০ নৱেম্বৰলৈকে কোনো বহিঃৰাজ্য, সামাজিক সংগঠন বা জনপ্ৰতিনিধিকো অনুমতি অবিহনে অঞ্চলটোত প্ৰৱেশ কৰাত নিষেধাজ্ঞা আৰোপ কৰা হৈছে।
সম্ভলৰ শ্বাহী মছজিদটো মোগলৰ যুগত পূৰ্বতে সেই স্থানত থকা মন্দিৰ ভাঙি নিৰ্মাণ কৰা বুলি অভিযোগ উত্থাপন কৰি প্ৰতিবাদকাৰীসকলে অধিবক্তা আয়োগৰ সমীক্ষাৰ বিৰোধিতা কৰাৰ পিছতে হিংসাত্মক পৰিস্থিতিৰ সৃষ্টি হয়। প্ৰতিবাদকাৰীসকলে শিলগুটি নিক্ষেপ আৰু বাহন জ্বলোৱাৰ আশ্ৰয় লোৱাৰ ফলত আৰক্ষীয়ে কন্দুৱা গেছ নিক্ষেপ কৰে।
আৰক্ষীয়ে জনোৱা মতে, দুষ্কৃতিকাৰীয়ে গুলীচালনা কৰাৰ লগতে এজন আৰক্ষী বিষয়াৰ ভৰিত গুলীচালনা কৰে। এই হিংসাত্মক ঘটনাত আন এজন বিষয়াক গুলীৰে আঘাত কৰাৰ লগতে ১৫ৰ পৰা ২০জন নিৰাপত্তাৰক্ষী আহত হয়। আন এজন পুলিচৰ মূৰত গুৰুতৰভাৱে আঘাত পোৱাৰ বিপৰীতে ডেপুটি কালেক্টৰৰ এখন ভৰি ভাঙি যায়।
প্ৰতিবাদকাৰীয়ে অট্টালিকাৰ ওপৰৰ পৰা আৰু শ্বাহী জামা মছজিদৰ সন্মুখৰ পৰা পুলিচৰ ওপৰত শিলগুটি নিক্ষেপ কৰিছে। পিছত আৰক্ষীৰ লোকে এটা সৰু আলিবাটত বৃহৎ জনসমাগমক ছত্ৰভংগ দিবলৈ চেষ্টা কৰি কোণত সোমাই মানুহক আঘাত কৰা দেখা গৈছিল বুলি অভিযোগ উঠিছে। এই সংঘৰ্ষত মৃত্যু হোৱা লোকসকল হৈছে নৌমান, বিলাল, নাইম, আৰু মহম্মদ কাইফ। গুলীৰ আঘাত পোৱা বুলি অভিযোগ উত্থাপন হোৱাৰ বিপৰীতে মৰণোত্তৰ পৰীক্ষাৰ পিছত মৃত্যুৰ সঠিক কাৰণ নিশ্চিত কৰা হ’ব বুলি আৰক্ষীয়ে উল্লেখ কৰিছে।
এই সংঘৰ্ষক লৈ বিৰোধী দলসমূহে বিজেপিক তীব্ৰ সমালোচনা কৰে। মুখ্যমন্ত্ৰী যোগী আদিত্যনাথ আৰু বিজেপি-আৰএছএছৰ 'সুপৰিকল্পিত ষড়যন্ত্ৰৰ ভয়াবহ ফল' বুলি অভিহিত কৰি কংগ্ৰেছে প্ৰতিবাদকাৰীসকলৰ ওপৰত পোনপটীয়াকৈ গুলীচালনা কৰাৰ অভিযোগ উত্থাপন কৰে। সমাজবাদী পাৰ্টিৰ মুৰব্বী অখিলেশ যাদৱেও বিজেপিক সমালোচনা কৰি বিজেপি চৰকাৰ আৰু প্ৰশাসনে 'নিৰ্বাচনী অসৎ আচৰণৰ পৰা মনোযোগ আঁতৰাবলৈ' হিংসাত্মক পৰিস্থিতিৰ আয়োজন কৰা বুলি অভিযোগ কৰে।
লোকসভা নিৰ্বাচনত ব্যৰ্থ হোৱাৰ পিছৰে পৰা ভাৰতৰ মিত্ৰজোঁটে অশান্তিৰ সৃষ্টি কৰিবলৈ চেষ্টা চলাইছিল বুলি অভিযোগ উত্থাপন কৰি বিজেপিয়ে প্ৰতিশোধ লয়। ইয়াত কোৱা হৈছে যে, ন্যায়িক আদেশত সন্মতি নিদিয়াসকলে আইনী আশ্ৰয় ল'ব লাগে। দলৰ এজন মুখপাত্ৰই হিংসাত্মক পৰিস্থিতিৰ বাবে তেওঁ "ঘামাণ্ডিয়া মিত্ৰতা" (অহংকাৰে ভৰা মিত্ৰতা) বুলি কোৱা শব্দটোক জগৰীয়া কৰে, যিটো শব্দ বিজেপিৰ নেতাসকলে ইণ্ডিয়া ব্লকৰ বাবে প্ৰায়ে ব্যৱহাৰ কৰি আহিছে।
১৯ নৱেম্বৰৰ পৰাই সম্ভলত উত্তেজনাৰ সৃষ্টি হৈছে, যেতিয়া স্থানীয় আদালতৰ নিৰ্দেশত জামা মছজিদত জৰীপ কৰা হৈছিল, য’ত এসময়ত সেই স্থানত এটা হৰিহৰ মন্দিৰ আছিল বুলি দাবী কৰা আবেদনৰ পিছতে জামা মছজিদত জৰীপ কৰা হৈছিল। আৰক্ষীয়ে জনোৱা মতে, প্ৰথমটো জৰীপ অসম্পূৰ্ণ হোৱাৰ বাবে দেওবাৰে দ্বিতীয়টো জৰীপ চলোৱা হয়। অৱশ্যে হিংসাত্মক পৰিস্থিতিৰ মাজতে দেওবাৰে সমীক্ষা সম্পূৰ্ণ কৰিলে অধিবক্তা আয়ুক্তই।
এই সন্দৰ্ভত দণ্ডাধীশৰ তদন্ত কৰা হ’ব বুলি বিষয়াসকলে জানিবলৈ দিয়ে। আটক কৰা ২১ জন লোকৰ ভিতৰত দুগৰাকী মহিলাও আছে আৰু বিষয়াসকলে কয় যে হিংসাৰ অভিযোগত অভিযুক্তসকলক কঠোৰ ৰাষ্ট্ৰীয় নিৰাপত্তা আইন (এন এছ এ)ৰ অধীনত গোচৰ ৰুজু কৰা হ’ব।
এই গোচৰৰ আবেদনকাৰী উচ্চতম ন্যায়ালয়ৰ অধিবক্তা বিষ্ণু শংকৰ জৈনে ভাৰতীয় প্ৰত্নতাত্ত্বিক জৰীপ (এ এছ আই)ৰ আদালতৰ দেৱানী ন্যায়াধীশ (জ্যেষ্ঠ বিভাগ)ক মন্দিৰটোৰ নিয়ন্ত্ৰণ ল’বলৈ আহ্বান জনায়। হিন্দু পক্ষৰ স্থানীয় অধিবক্তা গোপাল শৰ্মাই দাবী কৰিছিল যে, এসময়ত সেই স্থানত থকা মন্দিৰটো ১৫২৯ চনত মোগল সম্ৰাট বাবৰে ভাঙি পেলাইছিল।
