নতুন দিল্লী
২০২৫ চনৰ ভাৰতৰ গণতন্ত্ৰ দিৱসৰ কুচকাৱাজ বিশেষ হ’ব। দেশৰ সাংস্কৃতিক বৈচিত্ৰ্য আৰু সামৰিক শক্তিৰ এক অনন্য মিশ্ৰণ প্ৰদৰ্শন কৰিব। এই বছৰ, কুচকাৱাজ তথা পেৰেডে সংবিধান স্থাপন আৰু জনসাধাৰণৰ অংশগ্ৰহণৰ ৭৫ সংখ্যক বাৰ্ষিকীত গুৰুত্ব দিব। পেৰেডৰ মুখ্য অতিথি হ’ব ইণ্ডোনেছিয়াৰ ৰাষ্ট্ৰপতি প্ৰবোও চুবিয়াণ্টো। প্ৰতিৰক্ষা মন্ত্ৰালয়ে সোমবাৰে এই তথ্য প্ৰদান কৰে।
প্ৰতিৰক্ষা সচিব ৰাজেশ কুমাৰ সিঙে কয় যে ২৬ জানুৱাৰীত কৰ্তব্য পথত অনুষ্ঠিত হ’বলগীয়া পেৰেডত ইণ্ডোনেছিয়াৰ ১৬০ জনীয়া মাৰ্চিং দল আৰু ১৯০ জনীয়া বেণ্ড দলে অংশগ্ৰহণ কৰিব। ইয়াৰ লগতে ভাৰতীয় সশস্ত্ৰ বাহিনীৰ দলসমূহো কুচকাৱাজৰ অংশ হ’ব।
মন্ত্ৰালয়ে কয় যে প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰীয় যুদ্ধ স্মাৰকত শ্ৰদ্ধাঞ্জলি জ্ঞাপন কৰাৰ সৈতে গণতন্ত্ৰ দিৱসৰ কুচকাৱাজ আৰম্ভ হ’ব। ইয়াৰ পিছত, ৰাষ্ট্ৰপতিয়ে এখন পৰম্পৰাগত বাহনত ৰাজপথত উপস্থিত হ’ব আৰু এক বিশাল মাৰ্চ পাষ্টক অভিবাদন জনাব। এই মাৰ্চ পাষ্টত ভাৰতীয় সশস্ত্ৰ বাহিনী, অৰ্ধসামৰিক বাহিনী, সহায়ক অসামৰিক বাহিনী, ৰাষ্ট্ৰীয় কেডেট কৰ্পছ (এন চি চি) আৰু ৰাষ্ট্ৰীয় সেৱা আঁচনি (এন এছ এছ) দলৰ অংশগ্ৰহণ থাকিব। এই কুচকাৱাজে কেৱল ভাৰতৰ সামৰিক শক্তি প্ৰদৰ্শন নকৰে, ই সংস্কৃতি, বৈচিত্ৰ্য আৰু ৰাষ্ট্ৰীয় ঐক্যৰ এক আভাসো উপস্থাপন কৰিব।
