নতুন দিল্লী
ৰাষ্ট্ৰীয় নিৰাপত্তা উপদেষ্টা অজিত ড'ভালে দেওবাৰে আমেৰিকাৰ ৰাষ্ট্ৰীয় চোৰাংচোৱা সঞ্চালক তুলসী গাবাৰ্ডৰ সৈতে দ্বিপাক্ষিক আলোচনাত মিলিত হয়। বৈঠকত তেওঁলোকে সন্ত্ৰাসবাদকে ধৰি বিভিন্ন নিৰাপত্তাজনিত প্ৰত্যাহ্বান আৰু উদীয়মান প্ৰযুক্তিৰ দ্বাৰা সৃষ্টি হোৱা ভাবুকিৰ সন্মুখীন হোৱাৰ ক্ষেত্ৰত সহযোগিতা বৃদ্ধিৰ ওপৰত গুৰুত্ব আৰোপ কৰিছে।
জানিব পৰা মতে, তেওঁলোকৰ বৈঠকত ড'ভাল আৰু গাবাৰ্ডে মূলতঃ ভাৰত-আমেৰিকাৰ বিশ্বব্যাপী কৌশলগত অংশীদাৰিত্বৰ সৈতে সংগতি ৰাখি চোৰাংচোৱা তথ্য বিনিময় আৰু নিৰাপত্তাৰ ক্ষেত্ৰত ঘনিষ্ঠভাৱে কাম কৰাৰ উপায়ৰ বিষয়ে আলোচনা কৰে। ড’নাল্ড ট্ৰাম্প প্ৰশাসনৰ এজন শীৰ্ষ বিষয়াৰ ভাৰতলৈ কৰা প্ৰথমটো উচ্চ পৰ্যায়ৰ ভ্ৰমণৰ বাবে দেওবাৰে পুৱা আঢ়ৈদিনীয়া ভ্ৰমণসূচীৰে ৰাষ্ট্ৰীয় ৰাজধানীত উপস্থিত হয়। ড’ভাল আৰু গাবাৰ্ডৰ মাজত অনুষ্ঠিত হোৱা বৈঠক সন্দৰ্ভত শীৰ্ষ সূত্ৰই জনোৱা মতে, এই বৈঠক আছিল “ভাল আলোচনা”।
ইয়াত ভাৰতে আয়োজন কৰা নিৰাপত্তা সন্মিলনত অংশগ্ৰহণ কৰা বিশ্বৰ শীৰ্ষ চোৰাংচোৱা বিষয়াসকলৰ ভিতৰত আছিল আমেৰিকাৰ ৰাষ্ট্ৰীয় চোৰাংচোৱাৰ সঞ্চালক, কানাডাৰ চোৰাংচোৱাৰ মুৰব্বী ডেনিয়েল ৰজাৰ্ছ আৰু ব্ৰিটেইনৰ ৰাষ্ট্ৰীয় নিৰাপত্তা উপদেষ্টা জনাথন পাৱেল। জানিব পৰা মতে, শীৰ্ষ চোৰাংচোৱা আৰু নিৰাপত্তা বিষয়াসকলে সন্ত্ৰাসবাদ আৰু উদীয়মান প্ৰযুক্তিৰদ্বাৰা সৃষ্টি হোৱা ভাবুকিৰ সৈতে মোকাবিলা কৰিবলৈ চোৰাংচোৱা তথ্যৰ আদান-প্ৰদান আৰু সহযোগিতাৰ ওপৰত গুৰুত্ব আৰোপ কৰিছিল।
এই বৈঠকত ভাৰত-প্ৰশান্ত মহাসাগৰীয় অঞ্চলৰ নিৰাপত্তা, সন্ত্ৰাসবাদৰ পুঁজি আৰু ধন সৰবৰাহ প্ৰতিৰোধৰ বাবে সহযোগিতা আৰু প্ৰত্যাৰ্পণ আৰু অনুপ্ৰৱেশৰ সৈতে জড়িত বিষয়সমূহৰ ওপৰতো গুৰুত্ব আৰোপ কৰা হয় বুলি বিষয়টোৰ সৈতে পৰিচিত লোকসকলে জানিবলৈ দিয়ে।
ভাৰতীয় পক্ষই খালিস্তান সমৰ্থক উপাদানকে ধৰি বিদেশৰ ভূমিৰ পৰা চলি থকা ভাৰত বিৰোধী উপাদানৰ সন্দৰ্ভতো উদ্বেগ প্ৰকাশ কৰিছে বুলি তেওঁলোকে জানিবলৈ দিয়ে। এই সন্মিলনত অষ্ট্ৰেলিয়া, জাৰ্মানী, নিউজিলেণ্ড আৰু ভাৰতৰ আন কেইবাখনো বন্ধুত্বপূৰ্ণ দেশৰ চোৰাংচোৱা মুৰব্বীসকলে অংশগ্ৰহণ কৰা বুলি জানিব পৰা গৈছে।
জাপান, থাইলেণ্ড আৰু ফ্ৰান্সৰ বহু ৰাষ্ট্ৰ ভ্ৰমণৰ অংশ হিচাপে প্ৰথমে ভাৰত ভ্ৰমণ কৰিছে গাবাৰ্ডে। যোৱা মাহত গাবাৰ্ডে ৱাশ্বিংটন ডি চি ভ্ৰমণৰ সময়ত প্ৰধানমন্ত্ৰী নৰেন্দ্ৰ মোদীক সাক্ষাৎ কৰিছিল। তেওঁলোকৰ আলোচনাত চোৰাংচোৱা মুৰব্বীসকলে ৰাছিয়া-ইউক্ৰেইন যুদ্ধ আৰু মধ্যপ্ৰাচ্যৰ সংঘাতৰ প্ৰভাৱকে ধৰি বিভিন্ন বিশ্বজনীন প্ৰত্যাহ্বানৰ ওপৰত আলোচনা কৰা বুলি বুজা গৈছিল।
হৰদীপ সিং নিজ্জাৰ গোচৰক লৈ দুয়োখন দেশৰ মাজত হিমশীতল সম্পৰ্কৰ মাজতে কানাডাৰ নিৰাপত্তা চোৰাংচোৱা সেৱাৰ মুৰব্বী ৰজাৰ্ছৰ ভাৰত ভ্ৰমণ। ২০২৩ চনৰ ছেপ্টেম্বৰ মাহত কানাডাৰ তদানীন্তন প্ৰধানমন্ত্ৰী জাষ্টিন ট্ৰুডোৱে কানাডাত নিজ্জাৰক হত্যা কৰাত ভাৰতীয় এজেণ্টৰ “সম্ভাৱ্য” জড়িততাৰ অভিযোগ উত্থাপন কৰাৰ পিছতে ভাৰত আৰু কানাডাৰ মাজৰ সম্পৰ্ক তীব্ৰ উত্তেজিত হৈ পৰে।
নতুন দিল্লীয়ে ট্ৰুডোৰ অভিযোগক “অৰ্থহীন” বুলি নাকচ কৰিছে। যোৱা বছৰৰ দ্বিতীয়াৰ্ধত অট'ৱাই উচ্চায়ুক্ত সঞ্জয় ভাৰ্মাকে ধৰি কেইবাজনো ভাৰতীয় কূটনীতিবিদক নিজ্জাৰৰ হত্যাকাণ্ডৰ সৈতে জড়িত কৰাৰ পিছত সম্পৰ্ক আৰু অধিক তীব্ৰ হৈ পৰিছিল। যোৱা অক্টোবৰ মাহত কানাডাই ভাৰ্মা আৰু আন পাঁচজন কূটনীতিবিদক বহিষ্কাৰ কৰিছিল। ইয়াৰ প্ৰতিশোধ হিচাপে নতুন দিল্লীয়ে কানাডাৰ চাৰ্জ ডি এফেয়াৰ্ছ ষ্টুৱেৰ্ট হুইলাৰৰ লগতে আন পাঁচজন কূটনীতিবিদকো বহিষ্কাৰ কৰে। আশা কৰা হৈছে যে, ৰজাৰ্ছৰ সৈতে ড'ভালৰ কথা-বতৰাৰ সময়ত এই গোচৰৰ তথ্য আহিব পাৰে।
ৰাষ্ট্ৰীয় চোৰাংচোৱা বিভাগৰ সঞ্চালক হিচাপে দায়িত্ব গ্ৰহণ কৰাৰ পিছত গাবাৰ্ডৰ এইটোৱেই দ্বিতীয় বিদেশ ভ্ৰমণ। প্ৰথম আন্তঃৰাষ্ট্ৰীয় ভ্ৰমণৰ সময়ত গাবাৰ্ডে যোৱা মাহত মিউনিখ নিৰাপত্তা সন্মিলনত অংশগ্ৰহণৰ বাবে জাৰ্মানী ভ্ৰমণ কৰিছিল।
