নতুন দিল্লী
উপ-ৰাষ্ট্ৰপতি জগদীপ ধনখড়ে দেওবাৰে দিল্লী সেনা শিবিৰত এন চি চি গণৰাজ্য দিৱস শিবিৰ উদ্বোধন কৰি এমাহজোৰা উদযাপনৰ শুভাৰম্ভ কৰে। ২০২৫ চনৰ ২৭ জানুৱাৰীত প্ৰধানমন্ত্ৰীৰ সমাৱেশত এই শিবিৰৰ অন্ত পৰিব।
এইবাৰৰ শিবিৰত দেশৰ সকলো ৰাজ্য আৰু কেন্দ্ৰীয় শাসিত অঞ্চলক প্ৰতিনিধিত্ব কৰা ৯১৭ গৰাকী ছোৱালী কেডেটকে ধৰি মুঠ ২৩৬১ গৰাকী কেডেট আছে।
এনচিচিৰ মুখ্য কাৰ্যালয়ৰ এক বিবৃতি অনুসৰি এনচিচিৰ সেনা, নৌসেনা আৰু বায়ুসেনাৰ শাখাৰ পৰা নিৰ্বাচিত এই যুৱ কেডেটসকলে সাংস্কৃতিক কাৰ্যসূচী, প্ৰতিষ্ঠানিক প্ৰশিক্ষণ, প্ৰতিযোগিতাকে ধৰি একাধিক কাৰ্যসূচীত অংশগ্ৰহণ কৰিব।
উদ্বোধনী অনুষ্ঠানত ভাষণ দি উপ-ৰাষ্ট্ৰপতি ধনখড়ে জাতি গঠনত যুৱক-যুৱতীসকলৰ ভূমিকাক গুৰুত্ব আৰোপ কৰি ভাৰতৰ ৰূপান্তৰৰ বাবে 'পঞ্চ-প্ৰাণ' (পাঁচটা সংকল্প) আকোৱালি ল’বলৈ আহ্বান জনায়।
এন চি চিৰ এক বিবৃতিত কোৱা হৈছে যে, 'পঞ্চ প্ৰাণ'ত সামাজিক সম্প্ৰীতি, দেশপ্ৰেমমূলক মূল্যবোধৰ জৰিয়তে পাৰিবাৰিক জ্ঞানলাভ, পৰিৱেশ সুৰক্ষা, ভাৰত মা আৰু সভ্যতাবাদী নীতি-নিয়মক সন্মান জনোৱা, স্বদেশী আৰু আত্মনিৰ্ভৰশীলতা আদি অন্তৰ্ভুক্ত কৰা হৈছে।
উপ-ৰাষ্ট্ৰপতিগৰাকীয়ে মন্তব্য কৰে যে, "এই পঞ্চ-প্ৰাণসমূহে আমাৰ সমাজৰ শিৰাৰ মাজেৰে বৈ যায়। যিয়ে ব্যক্তিগত দায়িত্ব, পৰম্পৰাগত মূল্যবোধ আৰু পৰিৱেশ সজাগতাক সাংস্কৃতিক গৌৰৱ, ঐক্য আৰু আত্মনিৰ্ভৰশীলতাৰ দিশত ভাৰতৰ যাত্ৰাত বৈ যোৱা এক অদম্য জাতীয়তাবাদী মনোভাৱ গঢ়ি তোলে।"
এনচিচি গণৰাজ্য দিৱসৰ আনুষ্ঠানিক উদ্বোধন উপলক্ষে দিল্লী সেনা নিবাসত এক অনুষ্ঠানত দিয়া ভাষণত ধনখড়ে কয়, "মাতৃভূমিৰ প্ৰতি আমাৰ প্ৰতিশ্ৰুতি অটুট থাকিব লাগিব। কিয়নো ই আমাৰ অস্তিত্বৰ ভেটি গঠন কৰে। আপোনালোকৰ প্ৰজন্মই ভাৰতৰ ভাগ্য গঢ়ি দিব।"
ধনখড়ে কয়, "আমাৰ সংবিধানে আমাক মৌলিক অধিকাৰ প্ৰদান কৰে আৰু সেই মৌলিক অধিকাৰৰ প্ৰতি আমি সচেতন, যদিও আমাৰ মৌলিক কৰ্তব্যও আছে। যেতিয়া দেশৰ প্ৰতিজন নাগৰিকে মৌলিক কৰ্তব্যক বিশ্বাস কৰে আৰু সমৰ্থন কৰে তেতিয়া জাতীয়তাবাদক লালন-পালন কৰা হয়, বিকাশ সুৰক্ষিত হয়, সমন্বয় সুস্থিৰ হয়। নাগৰিক কৰ্তব্যৰ বাবে আপুনি বাহিনীটোৰ এজন অনুশাসিত সদস্য হিচাপে সঁচাকৈয়ে মশাল-বাহক হ’ব পাৰে।"
৩০ ডিচেম্বৰৰ পৰা আৰম্ভ হোৱা এমাহজোৰা গণৰাজ্য দিৱস শিবিৰত দেশৰ বিভিন্ন প্ৰান্তৰ পৰা মুঠ ২৩৬১ জন এনচিচি কেডেটে অংশগ্ৰহণ কৰিছে আৰু ২৭ জানুৱাৰীত প্ৰধানমন্ত্ৰীৰ সমাৱেশৰ সৈতে অন্ত পৰিব। বাৰ্ষিক অনুষ্ঠানত ৯১৭ গৰাকী ছোৱালী কেডেটৰ অংশগ্ৰহণো দেখা গৈছে, যি এতিয়ালৈকে সৰ্ববৃহৎ দল।
ভাৰতৰ চহকী ঐতিহ্য আৰু যুৱক-যুৱতীৰ উৎসাহ প্ৰদৰ্শন কৰি এনচিচিৰ কেডেটসকলে পৰিবেশন কৰা এক সজীৱ সাংস্কৃতিক কাৰ্যসূচীৰে উদ্বোধনী অনুষ্ঠানৰ সামৰণি পৰে।
