মডেল ৰহমানে কয়, "মই ভাবো সমৰ্থন অবিহনে কোনো কামত মনোনিবেশ কৰাটো সম্ভৱ নহয়। যিকোনো কামতে সফল হ'বলৈ হ'লে কষ্টৰ লগতে সমৰ্থনৰো খুবেই প্ৰয়োজন। যিহেতু আমাৰ মুছলমান সমাজখনত এক ভ্ৰান্ত ধাৰনা আছে যে মহিলসকলে সদায় পৰ্দাৰ আঁৰত থাকিব লাগে। তেনে ক্ষেত্ৰত ফেশ্বনৰ জগতখনত কাম কৰিবলৈ ওলাই অহাতো সঁচাকৈয়ে এক প্ৰত্যাহ্বানজনক কাম। কিন্তু মোৰ সৌভাগ্য যে মই পৰিয়াল তথা সমাজৰ পৰা তেনে কোনো বাধাৰ সন্মুখীন হোৱা নাই। মোক মোৰ স্বামীয়ে সদায়ে উৎসাহিত কৰি আহিছে আৰু বন্ধুবৰ্গই খুবেই সহযোগিতা আগবঢ়াই আহিছে। যাৰ বাবে মই আজি সফলতাৰ চিৰি বগাব পাৰিছো।"
মডেল ৰোজী ৰহমানে লাভ কৰা সৌন্দৰ্য প্ৰতিযোগীতাৰ খিতাপসমূহৰ সৈতে
ফেশ্বনৰ জগতখনৰ লগতে ৰোজীয়ে ৰাজনৈতিক আৰু সমাজসেৱামূলক কামৰ সৈতেও জড়িত। ৰোজী বৰ্তমান মহিলা ৰাষ্ট্ৰ সুৰক্ষা সংগঠন অব ইণ্ডিয়াৰ বাবে অসমৰ হৈ কাম কৰি আহিছে। তেওঁ বিহু সুৰক্ষা মঞ্চ অসম, সাংস্কৃতিক মহাসভা অসম, ৰাংঢালী সাংস্কৃতিক সংস্থা, সাংস্কৃতিক সংস্থা 'সাতসৰী' আদি কেইবাটাও সাংস্কৃতিক অনুষ্ঠানৰ সৈতে জড়িত হৈ আছে।
ৰোজীয়ে কয়, "বৰ্তমান সময়ত অসমৰ ফেশ্বন উদ্যোগটো বহু আগবাঢ়ি গৈছে। কিয়নো অসমীয়া সংস্কৃতিত বাৰে-ৰহনীয়া সাজ-পাৰৰ এক মেট-মৰা সম্ভাৰ আছে। বহিঃৰাজ্যতে হওঁক বা বিদেশতে হওঁক, অসমৰ পৰম্পৰাগত মেখেলা-ছাদৰৰ এক সুকীয়া স্থান আছে। পাট, মূগা, ঘিচা, এড়ি আদিৰ পৰা কেৱল মেখেলা চাদৰ হৈয়ে থকা নাই, বিভিন্ন ফেশ্বনেবল পোচাক প্ৰস্তুত কৰা হৈ আহিছে। এই উদ্যোগৰ সৈতে জড়িত হৈ বহু মানুহে স্বাৱলম্বী হোৱাৰ লগতে ৰাজ্য, বহিঃৰাজ্যৰ ওপৰিও বিদেশলৈ গৈও অসমৰ নাম উজ্জ্বলাবলৈ সক্ষম হৈছে। সেয়েহে মই ভাবো এতিয়া ফেশ্বনক পেছা হিচাপে গ্ৰহণ কৰিব পাৰি।"
মহিলা ৰাষ্ট্ৰ সুৰক্ষা সংগঠন অব ইণ্ডিয়াৰ মহিলা সদস্য সকলৰ সৈতে ৰোজী ৰহমান
