'আৱাজ-দ্য ভইচ'ৰ সৈতে হোৱা এক সাক্ষাৎকাৰত শিল্পী নুৰুদ্দিন আহমেদে কয়, "মহাভাৰত হৈছে প্ৰাচীন ভাৰতৰ দুখন প্ৰধান সংস্কৃত মহাকাব্যৰ ভিতৰত এখন। এই মহাকাব্য ভাৰতৰ ইতিহাসৰ এক অংশ। মহাভাৰত মানে 'ভৰত বংশৰ মহান কাহিনী' বুলিও উল্লেখ কৰা হয়। কিন্তু সেই সময়ত হিন্দু সভ্যতা অনুসৰি দুৰ্গা পূজা কেনেদৰে উদযাপন কৰা হৈছিল, সেই বিষয়ে আমাৰ মাজত এক সাম্যক ধাৰণাহে আছে, কিন্তু আমি প্ৰকৃততে কোনেও নাজানো, যাক লৈ আমাৰ মাজত আজিও এক কৌতুহলহে আছে। সেয়েহে, এইবাৰ পূজাত দৰ্শক তথা ভক্তক প্ৰাচীন মহাভাৰতৰ সময়ৰ এক আভাস দিয়াৰ প্ৰয়াস কৰিছো।"
উল্লেখ্য যে, ইন্দ্ৰপ্ৰস্থ (আক্ষৰিক অৰ্থত: ইন্দ্ৰৰ নগৰ) মহাভাৰতৰ পাণ্ডৱ ৰাজ্যৰ ৰাজধানী আছিল। বৰ্তমানৰ নতুন দিল্লী যি অঞ্চলত অৱস্থিত সেই একেটা অঞ্চলতে ইন্দ্ৰপ্ৰস্থ আছিল বুলি ধাৰণা কৰা হয়।
ইফালে, দীপ আহমেদে কয়, "মহাভাৰতৰ যুগত সকলোতকৈ ধুনীয়া আৰু আকৰ্ষনীয় স্থাপত্য আছিল ইন্দ্ৰপ্ৰস্থ। ভগৱান শ্ৰীকৃষ্ণই স্বয়ং বিশ্বকৰ্মাক মাতি আনি ইয়াক নিৰ্মান কৰা বুলি এক প্ৰবাদ আছে। অৱশ্যে, ইয়াৰ কোনো প্ৰমান নাই, সেয়ে আমি অত্যাধুনিক বুদ্ধিমত্তাৰ সহায়ত অলপ গৱেষনা কৰিছো আৰু সেই সময়ৰ শিল্পকৰ্ম কেনেকুৱা আছিল, তাৰ বাবে কি কি বস্তু ব্যৱহাৰ কৰিছিল, তাৰ ওপৰত ভিত্তি কৰি আমি বিস্তাৰিতভাৱে কাম কৰাৰ চেষ্টা কৰিছো। ইয়াত আমি পোহৰৰ তৰংগ (lighting effect), পানীৰ ফোৱাৰা আৰু নিজৰাৰ ব্যৱস্থা কৰি মহাভাৰতৰ ইন্দ্ৰপ্ৰস্থৰ দৰে এক পৰিবেশ সৃষ্টি কৰাৰ প্ৰয়াস কৰিছো। যাতে ভক্তসকলে পেণ্ডেলৰ ভিতৰত প্ৰৱেশ কৰিয়ে সেই যুগলৈ গুচি যায়।"
আঠগাঁও সাৰ্বজনীন দূৰ্গাপূজাৰ পেণ্ডেলৰ নিৰ্মিয়মান পানীৰ ফোৱাৰাৰ এক দৃশ্য
৪১ সংখ্যক আঠগাওঁ সাৰ্বজনীন দুৰ্গা পূজা সমিতিৰ এগৰাকী সদস্য মায়ংক আনন্দে কয়, "আমি প্ৰতি বছৰে কিবা নহয় কিবা নতুন বিষয়বস্তু লৈ পূজা মণ্ডপটো তৈয়াৰ কৰো। ইয়াৰ পূৰ্বে আমি আমাৰ পূজা পেণ্ডেলত বলি প্ৰথা, শিশু শ্ৰমিক আদি বিষয়বস্তু প্ৰদৰ্শন কৰিছিলো। এইবছৰো আমি বহু চিন্তা চৰ্চা কৰাৰ পিছত মহাভাৰতৰ ইন্দ্ৰপ্ৰস্থৰ কথা চূড়ান্ত কৰিলো। সেই সময়ত ইন্দ্ৰপ্ৰস্থত কেনেদৰে দূৰ্গাপূজা উদযাপন কৰা হৈছিল, তাৰে এক আভাস ৰাইজক দিয়াৰ বাবে এই সিদ্ধান্ত লোৱা হৈছে।"
মায়ংক আনন্দে কয়, "যোৱা দহ বছৰ ধৰি প্ৰতিবছৰে বিভিন্ন প্ৰতিষ্ঠানে আয়োজন কৰা বিভিন্ন প্ৰতিযোগিতাত অংশগ্ৰহণ কৰি আমাৰ পূজা মণ্ডলীয়ে শ্ৰেষ্ঠ বঁটা লাভ কৰি আহিছে। এইবেলিও আমি আশাবাদী। এইবাৰৰ আমাৰ পূজাৰ বাজেট হৈছে ৩৪ লাখ টকা। পেণ্ডেলৰ বাজেট ১৭ লাখ টকা আৰু প্ৰতিমাৰ বাজেট ২.৫ লাখ টকা। আনহাতে এইবাৰ পুজা যিহেতু তিনিদিন পালন কৰা হ'ব, সেয়েহে পুজা আটাইকেইদিন দিনৰ ১২ বজাৰ পৰা নিশা ১ বজালৈ ভোগ আৰু প্ৰসাদ বিলোৱা হব। তদুপৰি, পূজাৰ তিনিও দিনে ভক্তৰ বাবে বহু বিশেষ আকৰ্ষণ ৰখা হৈছে। যিবোৰ ভক্তসকলে পূজালৈ আহিলেহে জানিব।"
আঠগাঁও সাৰ্বজনীন দূৰ্গাপূজাৰ পেণ্ডেলৰ এক দৃশ্য
হিন্দু ধৰ্মৰ অন্যতম প্ৰধান উৎসৱ দূৰ্গা পূজাত দূৰ্গতিনাশিনী মা দূৰ্গাৰ প্ৰতিমা আৰু মণ্ডপ তৈয়াৰত মুছলমান ব্যক্তি জড়িত থকাটোৱে আমাৰ দেশৰ একতা, সম্প্ৰীতি আৰু সমন্বয়মুখী সংস্কৃতিক প্ৰতিফলিত কৰে।
