ৰমজানৰ ৰোজাৰ অন্তত খোৱা টেবুলত সাজু কৰা হৈছে হেঁপাহৰ ইফতাৰ (প্ৰতিনিধিত্বমূলক ফটো)
বিদুষী গৌৰ / নতুন দিল্লী
মুছলমানসকলৰ বাবে ৰমজান কেৱল এমাহজোৰা উপবাস নহয়, ই এক চিন্তা, আধ্যাত্মিক সংযোগ আৰু অনুশাসনৰ সময়৷ আৱাজ - দ্য ভইচৰ সৈতে এক আছুতীয়া বাৰ্তালাপত দিল্লীৰ চকু বিশেষজ্ঞ ডাঃ ইফাৎ নাছিৰে কয়, ৰমজানৰ উপকাৰিতা আধ্যাত্মিক পৰিপূৰ্ণতাৰ বাহিৰলৈও বিস্তৃত হৈ আছে। ই মানুহৰ শৰীৰ আৰু মনক বিষমুক্ত কৰে আৰু স্বাস্থ্য উন্নত কৰাত সহায় কৰে।
ডাঃ নাছিৰে কয় যে ৰমজানৰ সময়ত উপবাসে শৰীৰ সুস্থ কৰে। উপবাসে শৰীৰটো বিষমুক্ত কৰি ব্যৱস্থাটো পুনৰ স্থাপন কৰে। গতিকে নিজৰ ওজন নিয়ন্ত্ৰণ কৰি সুস্থ জীৱনশৈলীৰ অভ্যাস গ্ৰহণ কৰাৰ বাবে ৰমজান হৈছে সৰ্বোত্তম সময়। ৰমজানে মানুহৰ জীৱনলৈ অনুশাসন আনে। ই কেৱল খাদ্য আৰু পানীয়ৰ পৰা বিৰত ৰখাই নহয়, আধ্যাত্মিকভাৱে ই আপোনাক সংচেষ্ট কৰে আৰু এই সময়ছোৱাত স্বাস্থ্যক অগ্ৰাধিকাৰ দিয়া হয়।
"এজন মুছলমানে ৰোজা ৰাখিলে কেৱল খাদ্যৰ পৰা বিৰত থকাই নহয়, তেওঁলোকে নিজৰ শৰীৰ আৰু আত্মাক পবিত্ৰ কৰি আছে আৰু তেনে কৰাৰ ফলত তেওঁলোকে প্ৰায়ে আল্লাহৰ সৈতে গভীৰ সম্পৰ্ক অনুভৱ কৰে।"-ডাঃ নাছিৰে কয়।
উপবাসৰ স্বাস্থ্য উপকাৰীতাসমূহৰ ভিতৰত কম আলোচনা কৰা অন্যতম বিষয় এটা হৈছে অটোফেজি নামৰ প্ৰক্ৰিয়া। ডাঃ নাছিৰে বুজাই দিয়ে যে অটোফেজি হ’ল যেতিয়া শৰীৰে কোষবোৰ ভাঙি পুৰণি আৰু ক্ষতিগ্ৰস্ত কোষৰ ঠাই পূৰণ কৰে। উপবাসৰ সময়ত এই প্ৰক্ৰিয়াটো বৰ্ধিত হয় আৰু ই কোষীয় ৰক্ষণাবেক্ষণৰ এক স্বাভাৱিক ৰূপ। ৰমজান অটোফেজিক সমৰ্থন কৰাৰ এক উত্তম সময়। ই শৰীৰক সুস্থ হ'বলৈ উৎসাহিত কৰে, আৰু সুস্থ জীৱনশৈলী গ্ৰহণ কৰাৰ বাবে এক নিখুঁত মুহূৰ্ত বুলি তেওঁ উল্লেখ কৰে।
ৰমজান মাহৰ তাৰাবীহ নামাজৰ বাবে একগোট হৈছে একাংশ ইছলামধৰ্মী লোক
উপবাস পালন কৰা লোকসকলৰ মাজত এটা সাধাৰণ চিন্তা হৈছে হাইড্ৰেটেড হৈ থকা। ডাঃ নাছিৰে কয় যে মানুহে বিশেষকৈ ৰমজানৰ সময়ত পৰ্যাপ্ত পৰিমাণৰ পানী সেৱনৰ গুৰুত্বক প্ৰায়ে তুচ্ছজ্ঞান কৰে। উপবাসৰ অন্ত পৰাৰ পিছত পানী গ্ৰহণ কৰাটো অতি গুৰুত্বপূৰ্ণ বুলি তেওঁ উল্লেখ কৰে। "মানুহে পাহৰি যায় যে উপবাস মানেই কেৱল খাদ্যৰ কথা নহয়, হাইড্ৰেচনো সমানেই গুৰুত্বপূৰ্ণ।"-ডাঃ নাছিৰে কয়।
ডাঃ নাছিৰে পৰামৰ্শ দিয়ে যে প্ৰাপ্তবয়স্কসকলে দৈনিক সন্ধিয়া আৰু নিশা ২-৩ লিটাৰ পানী সেৱন কৰিব লাগে। ৰোজা ৰখাৰ সময়ত দিনটোত শৰীৰৰ শক্তি অটুট ৰাখিবলৈ শৰীৰত পানীৰ প্ৰয়োজনীয়তা পূৰণ কৰাটো অতি প্ৰয়োজনীয়। স্বাস্থ্য আৰু পুষ্টিৰ সৈতে জড়িত হৈ থকাৰ দীঘলীয়া যাত্ৰাৰ কথা উল্লেখ কৰি ডাঃ নাছিৰে কয় যে, 'আমি আগতে ৰমজানক উৎসৱ হিচাপে গণ্য কৰিছিলো, সকলো ধৰণৰ ভজা জলপান খাইছিলো, কিন্তু স্বাস্থ্য সচেতন হোৱাৰ লগে লগে মই স্বাস্থ্যসন্মত জীৱনশৈলীক আঁকোৱালি ল'লো।'
"মোৰ স্বামী আৰু মই এতিয়া যিমান পাৰি পৰিষ্কাৰ আৰু স্বাস্থ্যকৰ খাদ্য খোৱাত গুৰুত্ব দিওঁ। নিশ্চিতভাৱে, আমি সপ্তাহত এবাৰ ভজা-পূৰা খাদ্য উপভোগ কৰো, কিন্তু এইবোৰৰ মাজত সম্পূৰ্ণ ভাৰসাম্য বৰ্তাই ৰাখো।"-তেওঁ কয়। স্বাস্থ্যসন্মত উপবাসৰ বাবে ডাঃ নাছিৰৰ এটা মূল টিপছ হ’ল আপুনি কেনেকৈ চেহেৰীৰ সৈতে আপোনাৰ দিনটো আৰম্ভ কৰে। চেহৰীৰ সময়ত মানুহে প্ৰায়ে কেফেইনযুক্ত পানীয় বা চেনিযুক্ত পানীয় সেৱনৰ ভুল কৰে, যিয়ে হ্ৰস্বম্যাদী শক্তি বৃদ্ধি কৰিব পাৰে, আৰু গোটেই দিনটো আপোনাক ডিহাইড্ৰেটেড আৰু এলেহুৱা কৰি পেলায়।
ড্ৰাই ফুডছ আৰু চেনিৰে প্ৰস্তুত কৰা নিশাষ্ট নামৰ পুষ্টিকৰ খাদ্য়বিধ
তেওঁ কেফেইনৰ পৰিৱৰ্তে পানী আৰু খাদ্যৰ সৈতে চিয়া ছীডছ বা ফ্লেক্স ছীডছ (২ চামুচকৈ) যোগ কৰাৰ পৰামৰ্শ দিয়ে। এই ছুপাৰফুডবোৰত ওমেগা-৩ ফেটি এচিড আৰু ফাইবাৰ থাকে, যিয়ে গোটেই উপবাসৰ সময়ছোৱাত আপোনাক শক্তি প্ৰদান কৰে। ডাঃ নাছিৰে পৰঠাৰ দৰে গধুৰ, তেলীয়া খাদ্যৰ পৰিৱৰ্তে ৰুটিৰ দৰে আঁহযুক্ত শস্য খোৱাৰ বাবেও উৎসাহিত কৰে। তেওঁ কয় যে এইটো এটা সৰু কিন্তু উল্লেখযোগ্য পৰিৱৰ্তন, যিয়ে আপোনাৰ শক্তিৰ মাত্ৰা আৰু সামগ্ৰিক স্বাস্থ্যৰ ক্ষেত্ৰত ডাঙৰ পৰিৱৰ্তন আনিব পাৰে।
ডাঃ নাছিৰে গাখীৰত তিয়াই থোৱা শুকান ফল আৰু এচিকুট চেনিৰে প্ৰস্তুত কৰা নিশাষ্ট (Nishashta) নামৰ এটা পুষ্টিকৰ আৰু সহজে বনাব পৰা খাদ্যৰ পৰামৰ্শ দিয়ে। শুকান ফল এন্টিঅক্সিডেন্টৰে ভৰপূৰ আৰু ই আপোনাক গোটেই দিনটো শক্তিশালী কৰি ৰাখিব। ই চেহৰীৰ বাবে এক আদৰ্শ খাদ্য।
ডাঃ নাছিৰে উল্লেখ কৰে যে পৰম্পৰাগতভাৱে ৰমজান মাহ হৈছে নিৰামিষ খাদ্যৰ ব্যৱহাৰ বৃদ্ধি কৰাৰ সময়, কিয়নো বহু মুছলমানে নিজৰ পৰিয়াল আৰু বন্ধু-বান্ধৱীৰ সৈতে ভোজভাত খাই ভাল পায়। ৰমজানৰ সময়ত টেবুলত অধিক মাংস দেখাটো সাধাৰণ কথা, কিন্তু তেল কম ব্যৱহাৰ কৰাটো অতি প্ৰয়োজনীয়। তেওঁ কয়, "উদাহৰণস্বৰূপে, আপোনালোকে কাবাব ডিপ ফ্ৰাইৰ পৰিৱৰ্তে শ্বেল'-ফ্ৰাই কৰিব পাৰে, আৰু আমি আমাৰ খাদ্যত অধিক শাক-পাচলি আৰু মাহজাতীয় শস্য অন্তৰ্ভুক্ত কৰিব পাৰো।"
দিল্লীৰ চকু বিশেষজ্ঞ ডাঃ ইফাৎ নাছিৰ
ভজা-পূৰা (স্পাইচী) খাদ্য অতিমাত্ৰা গ্ৰহণ নকৰিবলৈও তেওঁ সতৰ্ক কৰি দিয়ে, যিবোৰ সোৱাদযুক্ত হ’লেও ই মানুহক অলস অনুভৱ কৰিব পাৰে। ডাঃ নাছিৰে কয় যে স্পাইচী খাদ্যই আপোনাক মন্থৰ অনুভৱ কৰিব পাৰে, আৰু ৰমজান ভোজৰ সময় নহয়, উপবাসৰহে সময়। আপোনাৰ পছন্দৰ প্ৰতি সচেতন হোৱাটো গুৰুত্বপূৰ্ণ আৰু মনত ৰাখিব যে এই মাহটো শুদ্ধি আৰু আধ্যাত্মিক শক্তি বৃদ্ধিৰ সময়।
ডাঃ নাছিৰৰ মতে সচেতনভাৱে খাদ্যৰ বাছনি কৰি আৰু হাইড্ৰেটেড হৈ থাকিলে মুছলমানসকলে ৰমজানক সঁচাকৈয়ে মন আৰু স্বাস্থ্যৰ সামগ্ৰিক কল্যাণ সাধনৰ মাহলৈ ৰূপান্তৰিত কৰিব পাৰে, যিয়ে শৰীৰ, আত্মাক পুষ্টি দিয়ে।
