অমৃতসৰ
পঞ্জাৱৰ প্ৰাক্তন উপ-মুখ্যমন্ত্ৰী সুখবীৰ সিং বাদলক অমৃতসৰৰ স্বৰ্ণ মন্দিৰৰ শৌচাগাৰ আৰু পাকঘৰত চাফাই কৰ্তব্যৰ শাস্তি প্ৰদান কৰিছে শিখসকলৰ সৰ্বোচ্চ লৌকিক কৰ্তৃপক্ষ অকল তাখতে। ২০১৫ চনত বিতৰ্কিত ডেৰা সাচ্চা সৌদাৰ মুৰব্বী গুৰমীত ৰাম ৰহিম সিঙক ক্ষমা প্ৰদানকে ধৰি “ভুল ৰাজনৈতিক সিদ্ধান্ত” লোৱাৰ বাবে এই ধৰ্মীয় শাস্তি।
অকল তখ্ত জাথেদৰ গিয়ানী ৰাঘবীৰ সিঙে আন চাৰিজন মহাপুৰোহিতৰ সৈতে যোৱা ৩০ আগষ্টত সুখবীৰ বাদলক ‘তাংখৈয়া’ (ধৰ্মীয় অসৎ আচৰণৰ দোষী) ঘোষণা কৰিছিল।
এই শাস্তিৰ অংশ হিচাপে হুইলচেয়াৰত চলাচল কৰা সুখবীৰ বাদল আৰু তেওঁৰ ২০১৫ চনৰ পঞ্জাৱ কেবিনেটৰ নেতাসকলক অমৃতসৰৰ স্বৰ্ণ মন্দিৰত ‘সেৱা’ (নিঃস্বাৰ্থ সেৱা) কৰিবলৈ নিৰ্দেশ দিয়া হৈছে। ইয়াৰ ভিতৰত শৌচাগাৰ চাফা কৰা, বাচন-বৰ্তন ধোৱা, তেওঁলোকৰ কাৰ্য্যৰ প্ৰায়শ্চিত্তৰ বাবে অন্যান্য ধৰ্মীয় কৰ্তব্য গ্ৰহণ কৰা আদি অন্তৰ্ভুক্ত আছে।
আনহাতে, সুখবীৰ বাদলৰ নেতৃত্বত শিৰোমণি আকালি দলক তিনিদিনৰ ভিতৰত দলীয় মুৰব্বী পদৰ পৰা পদত্যাগ গ্ৰহণ কৰিবলৈও এক নিৰ্দেশ জাৰি কৰিছে অকল তখতে। এই আদেশ মানি চলি আকল তখ্তক প্ৰতিবেদন দিবলৈ এছ এ ডিৰ কাৰ্য্যকৰী সমিতিক নিৰ্দেশ দিয়া হৈছে।
আনকি পঞ্জাৱৰ প্ৰয়াত প্ৰাক্তন মুখ্যমন্ত্ৰী পৰকাশ সিং বাদলক পূৰ্বে প্ৰদান কৰা সন্মানীয় "ফকৰ-ই-ক্বাম" (সম্প্ৰদায়ৰ গৌৰৱ) উপাধিটোও আকালি শাসনৰ সময়ত হোৱা একে বিতৰ্কৰ উদ্ধৃতি দি আকাল তখতে প্ৰত্যাহাৰ কৰিছে।
অকল তখতৰ দিনজোৰা কাৰ্য্যবিধিৰ পিছতে এই নিৰ্দেশ দিয়া হৈছে য’ত হুইল চেয়াৰত বহি থকা সুখবীৰ বাদলে ডেৰাৰ মুৰব্বী গুৰমীত ৰাম ৰহিমক দিয়া বিতৰ্কিত ক্ষমাত ভূমিকা লোৱা বুলি স্বীকাৰ কৰে, যিটো সিদ্ধান্তই শিখ সম্প্ৰদায়ৰ ভিতৰত ব্যাপক সমালোচনাৰ সৃষ্টি কৰিছিল।
শ্ৰী আকল তাখ্ত চাহাবৰ ধৰ্মীয় স্বাৰ্থ আৰু ‘মান-মৰ্যাদা’ৰ প্ৰতি লক্ষ্য ৰাখি পঞ্জাৱৰ চাৰিখন বিধানসভাৰ আসনত শেহতীয়া উপ-নিৰ্বাচনত এছ এ ডিৰ কাৰ্যকৰী সমিতিয়ে সৰ্বসন্মতিক্ৰমে প্ৰতিদ্বন্দ্বিতা নকৰাৰ সিদ্ধান্ত লৈছিল।
