বসিত জাৰগৰ / মণিগাম (কাশ্মীৰ)
নতুনকৈ নিযুক্তি লাভ কৰা ২৩৮জন আৰক্ষী জোৱানক শুকুৰবাৰে আয়োজিত এক গাম্ভীৰ্যপূৰ্ণ অনুষ্ঠানত জম্মু আৰু কাশ্মীৰ আৰক্ষীত অন্তৰ্ভুক্ত কৰা হয়। মধ্য কাশ্মীৰৰ মণিগামৰ আৰক্ষী প্ৰশিক্ষণ কেন্দ্ৰত অনুষ্ঠিত পাছিং আউট পেৰেডৰ সময়ত তেওঁলোকক এই নতুন দায়িত্বত নিযুক্ত কৰা হয়।
লেফটেনেণ্ট গৱৰ্ণৰ মনোজ সিনহাই আকৰ্ষণীয় মাৰ্চ-পাষ্টত চেলুট গ্ৰহণ কৰে। এই অনুষ্ঠানত জম্মু-কাশ্মীৰৰ বিভিন্ন প্ৰান্তৰ পৰা অহা যুৱ নিযুক্তিপ্ৰাপ্তসকলে তীব্ৰ অনুশাসন, দৃঢ় মনোবল আৰু অপূৰ্ব সুন্দৰ সমন্বয় প্ৰদৰ্শন কৰে।
নিযুক্তি লাভৰ পিছত মাতৃক নিজৰ হেডগিয়েৰটো পিন্ধাই আনন্দ প্ৰকাশ কৰিছে এগৰাকী মহিলা জোৱানে
নিযুক্তি লাভৰ পিছত যুৱ আৰক্ষী জোৱানসকলে পৰিয়ালৰ সদস্যক সাৱটি ধৰি সন্মান আৰু মৰ্যাদা প্ৰদৰ্শন কৰে। মাতৃসকলে পুত্ৰ-কন্যাক সাৱটি ধৰি চুমা খাই থকা দেখা যায় আৰু কিছুমানে পৰিয়ালৰ সৈতে চেলফি ক্লিক কৰি এই মুহূৰ্তটো স্মৰণীয় কৰি ৰাখে। আৰক্ষীত নিযুক্তি পোৱা যুৱক-যুৱতীসকলক সম্বোধন কৰি এল জি সিনহাই কয়, "এয়া কেৱল পেৰেড নহয়—এয়া নিষ্ঠা আৰু কৰ্তব্যৰ প্ৰতি এক ঘোষণা। আপোনালোক দেশৰ গৌৰৱ আৰু জম্মু-কাশ্মীৰৰ শক্তি।”
উল্লেখ্য যে, নিযুক্তিপ্ৰাপ্তসকলে কেইবামাহো ধৰি কঠোৰ প্ৰশিক্ষণ গ্ৰহণ কৰি জম্মু-কাশ্মীৰ আৰক্ষীত সেৱা আগবঢ়াবলৈ সাজু হৈছে। অনুশীলনৰ সময়ত তেওঁলোকে শাৰীৰিক সহনশীলতা, অস্ত্ৰ পৰিচালনা, বিদ্ৰোহ বিৰোধী কৌশল, যুদ্ধক্ষেত্ৰৰ অনুশীলন আদি বিষয়ৰ প্ৰশিক্ষণ লাভ কৰিছে।
নিযুক্তি পত্ৰ বিতৰণ অনুষ্ঠানত পুত্ৰক মৰমৰ চুমা দিছে এগৰাকী মাতৃয়ে
বৰফেৰে আগুৰি থকা পাহাৰৰ মাজত অৱস্থিত মণিগামৰ প্ৰশিক্ষণ কেন্দ্ৰত আয়োজিত অনুষ্ঠানটোত আৰক্ষীৰ নিখুঁত অনুশাসন আৰু উদযাপন শক্তি প্ৰতিফলিত হয়। জম্মু-কাশ্মীৰৰ দূৰ-দূৰণিৰ অঞ্চলবোৰৰ পৰা পৰিয়ালবোৰে নিজৰ পুত্ৰ, ভাতৃ আৰু বন্ধু-বান্ধৱীৰ জীৱনৰ এই স্মৰণীয় মুহূৰ্তৰ সাক্ষী হ'বলৈ আহে।
ৰাষ্ট্ৰীয় সংগীত আৰু ৰেজিমেণ্টৰ চেলুটেৰে অনুষ্ঠানৰ সামৰণি পৰে আৰু ইয়াৰ লগে লগে ২৩৮ জন জোৱানৰ জীৱনৰ এক নতুন অধ্যায়ৰ আৰম্ভণি হয়।
