নতুন দিল্লী
ৱাকফ (সংশোধনী) বিধেয়ক ২০২৪ সন্দৰ্ভত বিতংভাৱে আলোচনা কৰিবলৈ যুটীয়া সংসদীয় কমিটি(জেপিচি)-এ দ্বিতীয়খন বৈঠকৰ প্ৰস্তুতি চলাইছে। সমিতিয়ে বিষয়টো বিস্তৃতভাৱে আলোচনাৰ বাবে আৰু নিজৰ মতামত দাঙি ধৰিবলৈ শুকুৰবাৰে মুছলমান সংগঠনসমূহক আমন্ত্ৰণ জনাইছে।
জেপিচিৰ বৈঠকত মুম্বাইৰ অল ইণ্ডিয়া চুন্নী জমিয়ত-ই-উলেমা, নতুন দিল্লীৰ ইণ্ডিয়ান মুছলিমছ ফৰ চিভিল ৰাইটছ, উত্তৰ প্ৰদেশৰ চুন্নী চেণ্ট্ৰেল ৱাকফ ব’ৰ্ড আৰু ৰাজস্থান মুছলিম ৱাকফ ব’ৰ্ডৰ প্ৰতিনিধিয়ে বিধেয়কখন সন্দৰ্ভত নিজৰ মতামত দাঙি ধৰিব।
ইয়াৰ পূৰ্বে ২২ আগষ্টত জেপিচিৰ প্ৰথমখন বৈঠক অনুষ্ঠিত হৈছিল, য’ত যথেষ্ট হুলস্থুলীয়া পৰিৱেশৰ সৃষ্টি হৈছিল। এই বৈঠকত বিজেপি আৰু বিৰোধী সাংসদসকলৰ মাজত বিধেয়কখনৰ উদ্দেশ্য আৰু ইয়াৰ বিধান সন্দৰ্ভত তীব্ৰ বিতৰ্কৰ সৃষ্টি হয়।
একেখন বৈঠকত বিৰোধী সাংসদসকলেও বিধেয়কখনৰ সৈতে জড়িত সকলো অংশীদাৰৰ সৈতে বিস্তৃত আলোচনাৰ বাবে বাতৰি কাকতত বিজ্ঞাপন দি পৰামৰ্শ আমন্ত্ৰণ কৰিব লাগে বুলি পৰামৰ্শ আগবঢ়ায়। সাংসদসকলৰ এই দাবী মানি লৈ জগদম্বিকা পাল নেতৃত্বাধীন সংসদীয় কমিটিয়ে ‘ৱাকফ (সংশোধনী) বিধেয়ক, ২০২৪’ক লৈ দিহা-পৰামৰ্শ বিচাৰিছে।
লোকসভা সচিবালয়ে এক বিজ্ঞাপনত জাৰি কৰিছে যে ৱাকফ (সংশোধনী) বিধেয়ক, ২০২৪ সন্দৰ্ভত যিকোনো ব্যক্তি বা সংগঠনে ডাক, ফেক্স আৰু ইমেইলৰ জৰিয়তে জেপিচিলৈ নিজৰ পৰামৰ্শ প্ৰেৰণ কৰিব পাৰে। লোকসভা সচিবালয়ে জাৰি কৰা বিজ্ঞাপন অনুসৰি লোকসভাত উত্থাপন কৰা ৱাকফ (সংশোধনী) বিধেয়ক ২০২৪ পৰীক্ষা আৰু প্ৰতিবেদনৰ বাবে সংসদৰ যুটীয়া সমিতিলৈ প্ৰেৰণ কৰা হৈছে।
প্ৰস্তাৱিত বিধেয়কখনৰ বহল প্ৰভাৱৰ প্ৰতি লক্ষ্য ৰাখি জগদম্বিকা পালৰ অধ্যক্ষতাত গঠিত সমিতিখনে সাধাৰণ জনতাৰ আৰু বিশেষকৈ বেচৰকাৰী সংস্থা/বিশেষজ্ঞ/অংশীদাৰ আৰু প্ৰতিষ্ঠানসমূহৰ মতামত/পৰামৰ্শ সন্নিবিষ্ট স্মাৰকপত্ৰ আমন্ত্ৰণ কৰাৰ সিদ্ধান্ত গ্ৰহণ কৰিছে।
ইয়াত আৰু কোৱা হৈছে যে কমিটীলৈ লিখিত স্মাৰকপত্ৰ বা পৰামৰ্শ দাখিল কৰিব বিচৰাসকলে ইংৰাজী বা হিন্দী ভাষাত দুটা কপি যুটীয়া সচিব (জে এম), লোকসভা সচিবালয়, কোঠা নং ৪৪০, সংসদ গৃহ পৰিশিষ্ট, নতুন দিল্লী-১১০০০১ লৈ প্ৰেৰণ কৰিব পাৰে।
ফেক্সৰ বাবে ২৩০১৭৭০৯ নম্বৰ জাৰি কৰা হৈছে। পৰামৰ্শ দিয়াৰ বাবে কমিটীয়ে মেইল আইডিও জাৰি কৰিছে। এই বিজ্ঞাপন প্ৰকাশৰ তাৰিখৰ পৰা ১৫ দিনৰ ভিতৰত পৰামৰ্শ প্ৰেৰণ কৰিব পাৰিব।
‘ৱাকফ (সংশোধনী) বিধেয়ক, ২০২৪’ৰ প্ৰতিলিপি লোকসভাৰ ৱেবছাইটত হিন্দী আৰু ইংৰাজী দুয়োটা ভাষাতে আপলোড কৰা হৈছে। সমিতিলৈ দাখিল কৰা স্মাৰকপত্ৰ বা পৰামৰ্শসমূহ সমিতিৰ ৰেকৰ্ডৰ অংশ হ’ব আৰু ইয়াক ‘গোপনীয়’ হিচাপে গণ্য কৰা হ’ব। এইবোৰ সমিতিৰ বিশেষাধিকাৰৰ সৈতেও জড়িত বুলি বিবেচনা কৰা হ’ব।
লগতে কোৱা হৈছে যে স্মাৰক পত্ৰখন দাখিল কৰাৰ উপৰিও যিসকলে কমিটীৰ সন্মুখত নিজৰ মতামত দাখিল কৰিব বিচাৰে তেওঁলোকে এই সন্দৰ্ভত বিশেষভাৱে ইচ্ছা প্ৰকাশ কৰিব পাৰে। অৱশ্যে এই সন্দৰ্ভত সিদ্ধান্ত লোৱাৰ চূড়ান্ত কৰ্তৃত্ব কমিটীৰ হাতত থাকিব।
