নতুন দিল্লী
“যেতিয়া আপুনি কাৰোবাক সহায় কৰে, তেতিয়া তেওঁৰ জাতি বা ধৰ্মৰ কথা কেতিয়াও নাভাবে; এটা জীৱন ৰক্ষা কৰাটো মানৱীয় কৰ্তব্য। ধৰ্মইও শিকায় যে মানুহৰ জীৱন পৃথিৱীৰ আটাইতকৈ মূল্যৱান বস্তু।” এই মন্তব্য প্ৰয়াগৰাজৰ যুৱ অধিবক্তা তথা সমাজকৰ্মী ফাৰহান আলমৰ। অলপতে তেওঁ উত্তৰ প্ৰদেশৰ প্ৰয়াগৰাজত চলি থকা মহাকুম্ভৰ সময়ত হৃদৰোগত আক্ৰান্ত ৰামশংকৰ নামৰ এগৰাকী ব্যক্তিক সময়মতে চিপিআৰ দি জীৱন ৰক্ষা কৰিছিল। কাৰ্ডিঅ’পালমোনাৰী ৰিচাইচিটেচন (Cardiopulmonary resuscitation) হৈছে উশাহ-নিশাহ বা হৃদস্পন্দন বন্ধ হৈ যোৱা ব্যক্তিক দিয়া এক জৰুৰীকালীন চিকিৎসা।
যোৱা সপ্তাহৰ এই ঘটনা পোহৰলৈ আহে যেতিয়া ফাৰহান আলমে ৰামশংকৰৰ জীৱন ৰক্ষাৰ পদ্ধতি প্ৰদান কৰা ভিডিঅ’ ছ’চিয়েল মিডিয়াত ভাইৰেল হৈ পৰে। ক্লিপটোত ফাৰহাৰে অচেতন ৰামশংকৰৰ বুকুত দুয়োখন হাতেৰে হেঁচা প্ৰয়োগ কৰা দেখা গৈছে আৰু তেওঁৰ পত্নী আৰু সন্তানে ওচৰত কান্দি থকা দেখা গৈছে।
পিছত প্ৰকাশ পালে যে ফাৰহান আলমে সঠিক সময়ত চিপিআৰ প্ৰদান কৰি মহা কুম্ভলৈ অহা ভক্ত ৰামশংকৰৰ প্ৰাণ ৰক্ষা কৰিবলৈ সক্ষম হয়। আৱাজ-দ্য ভইচৰ সৈতে হোৱা কথা-বতৰাত ফাৰহান আলমে কয় যে তেওঁৰ বাবে এইটো অস্বাভাৱিক কথা নহয়। তেওঁ কয়, ‘চিপিআৰ দিয়াত মই ভাল প্ৰদৰ্শন কৰাটো মোৰ দায়িত্বৰ এটা অংশ আছিল। গুৰুত্বপূৰ্ণ কথাটো হ’ল মই তেওঁক চিপিআৰৰ জৰিয়তে পুনৰ জীৱন দিয়াৰ চেষ্টা কৰিছিলোঁ আৰু আল্লাহে মোক সহায় কৰিলে।”
ফাৰহান আলমে আৰ পি এফ জোৱানক প্ৰশিক্ষণ দি থকাৰ এক মুহূৰ্ত
ঘটনাটো মনত পেলাই তেওঁ কয়, ‘মোক ৰেলৱে ষ্টেচনত পোষ্ট কৰা হৈছিল, কিন্তু মোৰ এজন সহকৰ্মী মহম্মদ আৰ্ছাদে মোক ৱাকি-টকিত কৈছিল যে এজন ভক্ত হৃদৰোগত আক্ৰান্ত হোৱাৰ কথা কৈছিল। কেইমিনিটমানৰ ভিতৰতে মই তালৈ লৰালৰিকৈ আহিলোঁ। তেওঁ অচেতন হৈ পৰি আছিল আৰু উশাহ বন্ধ হৈ গৈছিল। মই সোনকালে চিপিআৰ প্ৰক্ৰিয়াটো আৰম্ভ কৰিলোঁ। কেইমুহূৰ্ত কষ্টৰ অন্তত তেওঁ পুনৰ উশাহ ল’বলৈ ধৰিলে; তেওঁৰ হৃদযন্ত্ৰ ধপধপাই আছিল। ৰামশংকৰ নামৰ ব্যক্তিজনৰ উশাহ-নিশাহ উভতি অহাৰ লগে লগে ই চৌপাশৰ মানুহবোৰকো আনন্দিত কৰি তুলিলে। আটাইতকৈ ভাল লাগিছিল তেওঁৰ সন্তান আৰু পত্নীৰ মুখলৈ হাঁহি উভতি অহাত।”
উল্লেখ্য যে, ফাৰহান আলমে সম্প্ৰতি শিশু অধিকাৰৰ ওপৰত কাম কৰা প্ৰয়াগৰাজস্থিত এন জি অ’ HAQ ৰ হৈ ইউনিচেফৰ সৈতে কাম কৰি আছে। HAQ-ৰ লগতে তেওঁ Prim Rose Siksha Sansthan নামৰ প্ৰতিষ্ঠানটোৰো প্ৰতিষ্ঠাপক। সমাজকৰ্মী আৰু স্বেচ্ছাসেৱী হিচাপে কাম কৰাৰ প্ৰতি ফাৰহানৰ আগ্ৰহ তেওঁৰ প্ৰয়াত পিতৃ ডাঃ নূৰ আলমৰ পৰাই জন্ম পাইছিল। ১৯৯৪ চনত তেওঁ ৰেলৱে সুৰক্ষা বাহিনীৰ জোৱানসকলক জৰুৰীকালীন চিকিৎসা সাহায্যৰ পদ্ধতিৰ প্ৰশিক্ষণ দিয়ে।
অৱশ্যে ফাৰহান আলমে কয় যে জীৱন ৰক্ষা কৰাটো সদায় এক প্ৰত্যাহ্বান; ৰামশংকৰৰ ক্ষেত্ৰতো তেনেকুৱাই হৈছিল। “মোৰ যিমান সাহস আছে, মই মোৰ সাধ্য অনুসৰি কৰিব পাৰো। বাকী আল্লাহৰ ইচ্ছা”।-তেওঁ কয়।
ফাৰহান আলমে আৱাজ-দ্য ভইচক জনোৱা মতে, মহাকুম্ভৰ পূৰ্বে তেওঁ পৰিদৰ্শক শিৱ কুমাৰ সিঙৰ নেতৃত্বত ৰে’ল সুৰক্ষা বাহিনীৰ জোৱানসকলক প্ৰশিক্ষণ দিছিল। তেওঁ জোৱানসকলক চিপিআৰ প্ৰদানৰ প্ৰশিক্ষণ প্ৰদান কৰিছিল। অভিলেখসংখ্যক ৪৫ কোটি লোকে ভ্ৰমণ কৰিবলগীয়া মহাকুম্ভৰ প্ৰস্তুতিৰ এইটো এক অংশ আছিল।
ফাৰহান আলমে কয় যে মহা কুম্ভমেলা হিন্দুসকলৰ আস্থা আৰু বিশ্বাসৰ কেন্দ্ৰবিন্দু, কিন্তু আমি সকলোৱে ইয়াক সন্মান কৰো আৰু প্ৰয়াগৰাজৰ বাসিন্দাসকলে ইয়াৰ সুচাৰুৰূপে চলাচলৰ বাবে সকলো ধৰণৰ দায়িত্ব ল’বলৈ সাজু হৈছে কাৰণ সকলো ভক্ত আমাৰ অতিথি।
তেওঁ কয় যে প্ৰয়াগৰাজৰ সন্তান হিচাপে কুম্ভ মেলাৰ পৰা উভতি যোৱালৈকে ভক্তসকলক সুৰক্ষা দিয়াটো তেওঁলোকৰ দায়িত্ব আৰু কৰ্তব্য। "মোৰ বিশ্বাস এয়াই ভাতৃত্ববোধ আৰু সাম্প্ৰদায়িক সম্প্ৰীতিৰ মহা কুম্ভ। ইয়াত মুছলমান লোকেও স্বেচ্ছাই কোটি কোটি ভক্তক সেৱা আগবঢ়াইছে। মুছলমান স্বেচ্ছাসেৱকসকলে ভক্তসকলক সহায় কৰিবলৈ অতি গৌৰৱেৰে দিনে নিশাই কাম কৰে। মহা কুম্ভ মেলাত হিন্দু আৰু মুছলমানৰ মাজত কোনো পাৰ্থক্য নাই। আমাৰ ধৰ্মৰ বাবে কোনেও আমাক সেৱা কৰাত বাধা দিয়া নাই আৰু কোনেও আপত্তি কৰা নাই। আমি নগৰবাসীয়ে দৰ্শনাৰ্থীৰ সেৱা কৰাটো আমাৰ সামাজিক আৰু মানৱীয় দায়িত্ব বুলি গণ্য কৰোঁ। আমি সকলোৱে এই মনোভাৱেৰে কাম কৰোঁ যে ভক্তসকলে সন্মুখীন হ’ব পৰা সমস্যাসমূহ আমি মোকাবিলা কৰিব লাগে। স্বেচ্ছাসেৱকৰ কোনো ধৰ্ম নাই; তেওঁলোক মানৱতাৰ সেৱাত আছে।”-ফাৰহান আলমে আৱাজ-দ্য ভইচক কয়।
উল্লেখ্য যে, জীৱন উদ্ধাৰৰ পিছত ফৰহান আলমে প্ৰয়াগৰাজৰ চিকিৎসালয়ত ৰাম শংকৰক লগ কৰে। চিকিৎসালয়ত থকা সকলোৱে ফৰহানক তেওঁৰ এই মহান কামৰ বাবে ধন্যবাদেৰে উপচাই পেলায়। ৰামশংকৰৰ হাঁহিমুখীয়া মুখখন দেখি ফাৰহানো আনন্দিত হৈ পৰে।
