ফজল পাঠান / বীড (মহাৰাষ্ট্ৰ)
মুছলমানসকলৰ বিশ্বৰ সৰ্ববৃহৎ ধৰ্ম সংস্কাৰ আন্দোলন তবলিগী জামাতে সমগ্ৰ মহাৰাষ্ট্ৰৰ বিভিন্ন স্থানত ‘ইজতেমা’ৰ আয়োজন কৰিছে। ইয়াৰ ভিতৰত ২ জানুৱাৰীৰ পৰা ৩ জানুৱাৰীলৈ মহাৰাষ্ট্ৰৰ বীড জিলাৰ আম্বাজোগাইত জিলা পৰ্যায়ৰ ইজতেমা অনুষ্ঠিত হয়। প্ৰায় ১৫০ একৰ এলেকাত আয়োজন কৰা হৈছিল এই গ্ৰেণ্ড ইভেণ্ট।
জিলাখনৰ সকলো তালুক (ব্লক)ৰ পৰা প্ৰায় দুই লাখ মুছলমান লোক ইয়াত সমবেত হৈ সকলোৰে মংগলৰ বাবে প্ৰাৰ্থনা কৰে। বক্তাসকলে গুৰুত্ব আৰোপ কৰে যে সকলোৱে হজৰত মহম্মদে দেখুৱাই দিয়া পথ অনুসৰণ কৰিব লাগে আৰু সকলোৰে লগত ভদ্ৰতা আৰু মৰমেৰে ব্যৱহাৰ কৰিব লাগিব। আমোদজনক কথাটো হ’ল এই অনুষ্ঠানত যুৱ দম্পতীয়েও সহজ ইছলামিক পদ্ধতিৰে বিবাহপাশত আবদ্ধ হয়।
সামাজিক সম্প্ৰীতিৰ বাবে সমূহীয়া দোৱাৰে সামৰণি পৰা এই দুদিনীয়া ইজতেমাত বীড জিলা আৰু ইয়াৰ নিকটৱৰ্তী অঞ্চলৰ হাজাৰ হাজাৰ মুছলমানে অংশগ্ৰহণ কৰে। যোৱা কেইমাহমানৰ পৰা ইয়াত ইজতেমাৰ প্ৰস্তুতি চলি আছিল। বীড জিলাৰ গেভৰাই মন্তদাৰ সংঘৰ বিধায়ক বিজয় সিং পণ্ডিতে ইজতেমাৰ বাবে অহা মুছলমান সকলৰ গাড়ীৰ টোল ৰেহাই কৰি দি মহানুভৱতাৰ পৰিচয় দাঙি ধৰে।
টোলগেট কৰ্তৃপক্ষলৈ বিধায়কে লিখা পত্ৰখন
ইজতেমাৰ পৰিচালনা সমিতিৰ সদস্য ইছমাইল কাদ্ৰীয়ে কয়, “ইজতেমাত অংশগ্ৰহণ কৰিবলৈ অহা বহুতেই গাড়ী চলাই ইয়ালৈ আহিছে। সেয়ে, আমি গেভৰাইৰ বিধায়ক বিজয় সিং পণ্ডিতক অনুৰোধ জনাইছিলো যে ইজতেমালৈ অহা বাহনসমূহক টোলৰ পৰা ৰেহাই দিয়ক। বিধায়কগৰাকীয়ে মুছলমান সমাজৰ দাবী মানি লৈ কৰ্তৃপক্ষক ফোন কৰে। তেওঁ টোল প্লাজাৰ মেনেজাৰলৈ এখন চিঠিও পঠায়। সমগ্ৰ মুছলমান সমাজৰ হৈ তেওঁক আমি আন্তৰিক ধন্যবাদ জ্ঞাপন কৰিছো।”
কেবিনেট মন্ত্ৰী ধনঞ্জয় মুণ্ডেইও ইজতেমালৈ সৌজন্যমূলক ভ্ৰমণ কৰি ৰাইজক সম্ভাষণ জনায়। ইজতেমাত মুছলমান মৌলবী আৰু উলেমাসকলে মুছলমান সম্প্ৰদায়ক পথ প্ৰদৰ্শন কৰিবলৈ উপস্থিত আছিল। এই উপলক্ষে মৌলানা ছাদিকে কয়, "মুছলমানৰ বাবে বিশ্বাসৰ শক্তি আৰু ইছলামিক পদ্ধতি গুৰুত্বপূৰ্ণ। ইয়াৰ সমান্তৰালভাৱে মুছলমানৰ বাবে দেশখনো সমানে গুৰুত্বপূৰ্ণ। মুছলমানসকলে একত্ৰিত হৈ সামাজিক সম্প্ৰীতি বজাই ৰাখিব লাগে। তেতিয়াহে সমাজ আৰু দেশৰ উন্নতি হ’ব।"
মৌলানা জুনাইদ চুলতানীয়ে কয়, "তবলিগী ইজতেমা কেৱল ধৰ্মীয় সংগঠন নহয়। ইজতেমাই মুছলমানসকলৰ জীৱন উন্নত কৰাৰ বাবে, সমাজত ঐক্য প্ৰতিষ্ঠা কৰিবলৈ, আৰু সকলো ধৰ্মৰ প্ৰতি সন্মানৰ বাবে সৎ প্ৰচেষ্টা চলায়। ইয়াৰ লগতে মুছলমানসকলক ইয়াত ইছলামিক শিক্ষা আৰু সামাজিক দায়বদ্ধতাৰ বিষয়েও নিৰ্দেশনা দিয়া হয়।"
ইজতেমা আয়োজন কৰা পৰিচালকে ইজতেমালৈ অহা হাজাৰ হাজাৰ মুছলমান সম্প্ৰদায়ৰ লোকৰ থকাৰ ব্যৱস্থা আৰু খাদ্যৰ দায়িত্ব লয়। এই দায়িত্ব পালন কৰিবলৈ অধিক মানৱশক্তিৰ প্ৰয়োজন। এই প্ৰয়োজনীয়তাক কৰ্তব্য হিচাপে বিবেচনা কৰি হাজাৰ হাজাৰ মুছলমান শ্ৰমিকে ইজটেমাৰ বাবে নিজৰ সেৱা আগবঢ়ায়। এই সেৱাৰ উদ্দেশ্য হৈছে ইজতেমাৰ বাবে অহা মুছলমানসকলে যাতে কোনো সমস্যাৰ সন্মুখীন নহয় আৰু তেওঁলোকৰ মৌলিক প্ৰয়োজন পূৰণ হয়। বিশেষকৈ স্বেচ্ছাসেৱকসকলে বিশেষ যত্ন লয় যাতে মুছলমানৰ এই বৃহৎ সমাৱেশে যান-বাহন আৰু অন্যান্য সমস্যাৰ সৃষ্টি নকৰে আৰু আনৰ মাজত অশান্তিৰ সৃষ্টি নকৰে।
ইজতেমাৰ সৈতে জড়িত কেইজনমান স্বেচ্ছাসেৱক
বীডত আয়োজিত ইজতেমাৰ বাবে চান্দমাৰী খেলপথাৰত ১০০ একৰ মাটিত এটা পেভিলিয়ন নিৰ্মাণ কৰা হৈছিল। সন্মিলনত অংশগ্ৰহণ কৰা সকলোৰে থকাৰ ব্যৱস্থা, খাদ্য, স্বাস্থ্য, পাৰ্কিঙৰ ব্যৱস্থাও সুন্দৰভাৱে কৰা হৈছিল। ইজতেমা পৰিচালনা সমিতিয়ে দৰ্শনাৰ্থী মুছলমানসকলৰ যত্ন ল’বলৈ থকাৰ ব্যৱস্থাৰ বাবে সুকীয়া জ’ন সৃষ্টি কৰিছিল। মেনেজমেণ্টে ইজনে সিজনৰ সৈতে যোগাযোগ বজাই ৰাখিবলৈ ৱাকি-টকিছ ব্যৱহাৰ কৰিছিল।
উল্লেখ্য যে, ১৯২৭ চনত মৌলানা ইলিয়াছ কান্ধলৱীয়ে প্ৰতিষ্ঠা কৰিছিল তবলিগী জামাত। তবলিগী জামাত বিশ্বৰ ভিতৰতে মুছলমানসকলৰ বাবে সৰ্ববৃহৎ ধৰ্ম সংস্কাৰ আন্দোলন হিচাপে পৰিচিত। ‘জামাত’ মানে মানুহৰ দল। তবলিগী জামাতৰ বাৰ্ষিক সভা হৈছে ইজতেমা। প্ৰতি বছৰে দেশৰ বিভিন্ন প্ৰান্তত এই ইজতেমাৰ আয়োজন কৰা হয়। ইজতেমাৰ উদ্দেশ্য হৈছে মুছলমানসকলৰ মাজত ইছলামৰ নৈতিক মূল্যবোধ গঢ়ি তোলা আৰু নৈতিক আৰু ধৰ্মীয়ভাৱে সংস্কাৰ সাধন কৰা।
