নতুন দিল্লী
বিৰোধী দল আৰু কেইবাটাও মুছলমান সংগঠনৰ ব্যাপক সমালোচনাৰ সন্মুখীন হোৱা ৱাকফ সংশোধনী বিধেয়কখন আগন্তুক সংসদৰ শীতকালীন অধিবেশনত গৃহীত হ’ব বুলি সংসদীয় পৰিক্ৰমা মন্ত্ৰী কিৰেনে ৰিজিজুৱে জানিবলৈ দিছে। ৱাকফ সংশোধনী বিধেয়কখনে ব্যাপক সংস্কাৰৰ প্ৰস্তাৱ আগবঢ়াইছে।
'আমি এই শীতকালীন অধিবেশনৰ ভিতৰতে বিধেয়কখন গৃহীত কৰিবলৈ প্ৰতিশ্ৰুতিবদ্ধ। এই বিধেয়কখন গৃহীত কৰিবলৈ মুছলমান সম্প্ৰদায়কে ধৰি সমাজৰ সকলো শ্ৰেণীৰ লোকৰ পৰা প্ৰচণ্ড হেঁচা আহিছে।"-তেওঁ কয়।
উল্লেখ্য যে, অহা ২৫ নৱেম্বৰৰ পৰা আৰম্ভ হ’ব শীতকালীন অধিৱেশন। ইয়াৰ পূৰ্বে ৰিজিজুৱে কয় যে আইনখন বিতংভাৱে পৰীক্ষা কৰা সৰ্বদলীয় সংস্থা যুটীয়া সংসদীয় সমিতিক অধিৱেশনৰ প্ৰথম সপ্তাহৰ অন্তিম দিনৰ ভিতৰত সংসদত নিজৰ তথ্য দাখিল কৰাৰ দায়িত্ব দিয়া হৈছে।
ইয়াৰ পিছত বিধেয়কখনৰ ওপৰত আলোচনা কৰি ভোটদান কৰা হ’ব বুলি মন্ত্ৰীগৰাকীয়ে কয়। তেওঁৰ এই মন্তব্যই এই কথা স্পষ্ট কৰিছে যে জেপিচিৰ ভিতৰত আৰু বাহিৰত বিৰোধীৰ প্ৰতিবাদে চৰকাৰক স্তব্ধ নকৰে। "বিৰোধী দলৰ সদস্যসকলে অতি উৎসাহেৰে জেপিচিৰ কাৰ্যসূচীত অংশগ্ৰহণ কৰি বিভিন্ন দিহা-পৰামৰ্শ দিছিল। পেনেলৰ সদস্যসকলক ৱাকফ বৰ্ডৰ কাম-কাজৰ সৈতে পৰিচিত কৰিবলৈ বিভিন্ন কাৰ্যসূচী আয়োজন কৰা হৈছিল।"-মন্ত্ৰীগৰাকীয়ে কয়।
সংখ্যালঘু পৰিক্ৰমা মন্ত্ৰীও ৰিজিজুৱে কয় যে কেইবা লাখ কোটি মূল্যৰ সম্পত্তিৰ গৰাকী ৱাকফ সংস্থাসমূহৰ কাম-কাজ নিয়ন্ত্ৰণৰ বাবে বিধেয়কখনৰ বিধানসমূহৰ ওপৰতো জনসাধাৰণৰ মাজত বিতৰ্ক হৈছে, সংখ্যালঘু পৰিক্ৰমা মন্ত্ৰালয়ে এক লাখতকৈ অধিক পত্ৰ লাভ কৰিছে, তেওঁলোকৰ এক বৃহৎ সংখ্যকে এই আইনখনৰ সমৰ্থনত আছে। চৰকাৰে দাবী কৰিছে যে প্ৰস্তাৱিত সংস্কাৰে ৱাকফ ব’ৰ্ডৰ কাৰ্য্যকলাপত স্বচ্ছতা আনিব।
উল্লেখ্য যে, বিগত বৰ্ষাকালীন অধিবেশনত (৮ আগষ্ট) চৰকাৰে লোকসভাত দুখন বিধেয়ক ক্ৰমে ৱাকফ (সংশোধনী) বিল আৰু মুছলমান ৱাকফ (বাতিল) বিল উত্থাপন কৰিছিল, য’ত ৱাকফ ব’ৰ্ডৰ কাম-কাজ আৰু ইয়াৰ সম্পত্তি পৰিচালনাৰ সংস্কাৰৰ প্ৰস্তাৱ দিয়া হৈছিল।
ৰিজিজুৱে কয় যে সংস্কাৰ বহুদিনৰ পৰা বাকী আছে আৰু এই সংস্কাৰ অতি প্ৰয়োজনীয় হৈ পৰিছে। কাৰণ এই সংস্থাসমূহ কিছুমান মুছলমান অভিজাত শ্ৰেণীৰ দ্বাৰা নিয়ন্ত্ৰিত হৈ থকাৰ বিপৰীতে দুখীয়া আৰু মুছলমান সম্প্ৰদায়ৰ বৃহৎ জনসংখ্যাই ইয়াৰ সুবিধাৰ পৰা বঞ্চিত হৈ আছে।
