নতুন দিল্লী
প্ৰধানমন্ত্ৰী নৰেন্দ্ৰ মোদীয়ে শনিবাৰে কংগ্ৰেছৰ ওপৰত “তুষ্টিকৰণৰ ৰাজনীতি”ৰ অভিযোগ উত্থাপন কৰি কয় যে সংবিধানত কোনো নিয়ম নথকাকৈ তেওঁলোকে ৱাকফ ব’ৰ্ড সম্পৰ্কীয় আইন প্ৰণয়ন কৰিছিল। মহাৰাষ্ট্ৰৰ বিধানসভা নিৰ্বাচনত বিজেপি নেতৃত্বাধীন মিত্ৰজোটৰ চমকপ্ৰদ বিজয় উদযাপনৰ বাবে বিজেপিৰ মুখ্য কাৰ্যালয়ত আয়োজিত এক অনুষ্ঠানত প্ৰধানমন্ত্ৰী মোদীয়ে এই গুৰুত্বপূৰ্ণ মন্তব্য আগবঢ়ায়।
তেওঁ অভিযোগ কৰে যে কংগ্ৰেছে দেশত তুষ্টিকৰণৰ বীজ সিঁচিছিল। "কংগ্ৰেছে তুষ্টিকৰণৰ বাবে আইন প্ৰণয়ন কৰিছিল। উচ্চতম ন্যায়ালয়ৰ নিৰ্দেশকো তেওঁলোকে গুৰুত্ব নিদিলে। ইয়াৰ এক উদাহৰণ হ’ল ৱাকফ ব’ৰ্ড। দিল্লীৰ জনসাধাৰণ এই কথা জানি আচৰিত হ’ব যে ২০১৪ চনত চৰকাৰ এৰি যোৱাৰ পূৰ্বে এই লোকসকলে দিল্লী আৰু ইয়াৰ আশে-পাশে থকা বহু সম্পত্তি ৱাকফ ব’ৰ্ডক গতাই দিছিল। বাবাছাহেব আম্বেদকাৰে আমাক দিয়া সংবিধানত ৱাকফ আইনৰ কোনো স্থান নাই যদিও কংগ্ৰেছে ভোট বেংক বৃদ্ধিৰ বাবেই এই কাম কৰিছিল।"-প্ৰধানমন্ত্ৰীয়ে কয়। তেওঁ লগতে অভিযোগ কৰে যে কংগ্ৰেছে “প্ৰকৃত ধৰ্মনিৰপেক্ষতা”ক হত্যা কৰিবলৈ চেষ্টা কৰিছিল।
উল্লেখ্য যে, ২৫ ডিচেম্বৰৰ পৰা আৰম্ভ হ’বলগীয়া সংসদৰ শীতকালীন অধিৱেশনত চৰকাৰৰ কাৰ্যসূচীত আছে ৱাকফ সংশোধনী বিধেয়ক,২০২৪। বিজেপিৰ জ্যেষ্ঠ সদস্য জগদম্বিকা পালৰ নেতৃত্বত সদনৰ যুটীয়া সমিতি (জেপিচি)য়ে বিধেয়কখন পৰীক্ষা কৰি আছে।জেপিচিৰ সন্মুখত অংশীদাৰ আৰু জনসাধাৰণৰ প্ৰতিনিধিৰ কেইবাটাও পৰ্যায়ৰ আলোচনা সম্পন্ন কৰা হৈছে। মাজে মাজে বিৰোধীয়ে এই বৈঠক প্ৰত্যাহাৰ কৰাত আলোচনা বিঘ্নিত হয়।
সংশোধনী বিধেয়কখনে ডিজিটেলাইজেচন, নিকা আৰু স্বচ্ছ হিচাপ-নিকাচ, আৰু অবৈধভাৱে দখল কৰা সম্পত্তি পুনৰ উদ্ধাৰৰ বাবে আইনী ব্যৱস্থা প্ৰৱৰ্তনৰ জৰিয়তে ৱাকফ বৰ্ডত ব্যাপক সংস্কাৰ আনিব বিচাৰিছে। জেপিচিয়ে বিভিন্ন ৰাজ্য আৰু কেন্দ্ৰীয় শাসিত অঞ্চলৰ চৰকাৰী বিষয়া, আইনী বিশেষজ্ঞ, ৱাকফ ব’ৰ্ডৰ সদস্য আৰু সম্প্ৰদায়ৰ প্ৰতিনিধিৰ পৰা মতামত সংগ্ৰহৰ বাবে ধাৰাবাহিক বৈঠক অনুষ্ঠিত কৰিছে, যাৰ লক্ষ্য হৈছে সম্ভৱপৰ সবাতোকৈ ব্যাপক সংস্কাৰ।
ভাষণত প্ৰধানমন্ত্ৰী মোদীয়ে মহাৰাষ্ট্ৰৰ ঐতিহাসিক বিজয়ৰ কথা উল্লেখ কৰি কয়, "মহাৰাষ্ট্ৰত এয়া একেৰাহে তৃতীয়বাৰৰ বাবে বিজেপি সৰ্ববৃহৎ দল হিচাপে আত্মপ্ৰকাশ কৰিছে, যিটো নিঃসন্দেহে এক ঐতিহাসিক কৃতিত্ব। এই বিজয় বিজেপিৰ শাসন ব্যৱস্থাৰ এক প্ৰতীক। মহাৰাষ্ট্ৰৰ জনসাধাৰণে বিজেপিক কংগ্ৰেছ আৰু মিত্ৰ দলসমূহ মিলি যিমান আসন দিছে, তাতকৈ বহু বেছি আসন দিছে। ইয়াৰ পৰা দেখা যায় যে সুশাসনৰ কথা আহিলে দেশে কেৱল বিজেপি আৰু এন ডি এক বিশ্বাস কৰে।"
নগৰীয়া নক্সালবাদৰ সৈতে মিত্ৰতাৰ বাবে কংগ্ৰেছক আক্ৰমণ কৰি প্ৰধানমন্ত্ৰীয়ে কয়, "দেশ আৰু দেশৰ জনসাধাৰণৰ কল্যাণক অৱজ্ঞা কৰি কংগ্ৰেছ দলৰ একমাত্ৰ গুৰুত্ব হৈছে পৰিয়াল। নাগৰিকতকৈ পৰিয়ালক অগ্ৰাধিকাৰ দিয়া দলে গণতন্ত্ৰৰ প্ৰতি এক ভয়াবহ ভাবুকি কঢ়িয়াই আনিছে। নগৰীয়া নক্সালবাদৰ সৈতে কংগ্ৰেছৰ মিত্ৰতা ভাৰতৰ বাবে এক নতুন প্ৰত্যাহ্বান হিচাপে দেখা দিছে। এইটো মন কৰিবলগীয়া যে এই নগৰীয়া নক্সালবাদীসকলক বাহ্যিক শক্তিৰ দ্বাৰা নিয়ন্ত্ৰিত কৰা হৈছে, যাৰ বাবে সকলোৱে অত্যন্ত সাৱধানতা অৱলম্বন কৰাটো অতি প্ৰয়োজনীয়।"
"আজি মহাৰাষ্ট্ৰত উন্নয়ন, সুশাসন, আৰু প্ৰকৃত সামাজিক ন্যায়ৰ জয় হৈছে। আজি প্ৰতাৰণা, বিভাজনকাৰী ৰাজনীতি, পৰিয়াল বংশবাদৰ শক্তিবোৰ পৰাস্ত হৈছে! আজি মহাৰাষ্ট্ৰই উন্নত ভাৰতৰ সংকল্প শক্তিশালী কৰিছে। সমগ্ৰ দেশৰ সকলো বিজেপি আৰু এন ডি এ কৰ্মীক অভিনন্দন জনাইছো আৰু তেওঁলোকৰ শলাগ লৈছো।"-প্ৰধানমন্ত্ৰী মোদীয়ে কয়।
