গুলাম কাদিৰ
জীৱনত সফলতা লাভ কৰাটো কেতিয়াও সহজ কথা নহয়। কিন্তু পৰিস্থিতি কঠিন হ’লে বিশ্বাস আৰু কঠোৰ পৰিশ্ৰমৰ শক্তিৰে অসম্ভৱো সম্ভৱ হৈ উঠে। মছজিদত বিতৰণ কৰা দাইল আৰু চাউল খাই অধ্যয়ন কৰা মহম্মদ ইয়াছিনে কেৰালা ন্যায়িক সেৱা পৰীক্ষাত দ্বিতীয় স্থান লাভ কৰি দণ্ডাধীশ হোৱাৰ গৌৰৱ অৰ্জন কৰিছে। সংগ্ৰাম আৰু বিভিন্ন অসুবিধাৰে ভৰা ২৯ বছৰীয়া ইয়াছিনে এই প্ৰত্যাহ্বানবোৰক তেওঁ নিজৰ শক্তি কৰি গন্তব্যস্থানত উপনীত হ’ল।
কেৰালাৰ পালাক্কাড় জিলাৰ ভিলায়ুৰ এখন সৰু গাঁওত ইয়াছিনৰ জন্ম হৈছিল। মাত্ৰ তিনি বছৰ বয়সতে দেউতাকে পৰিয়ালটো ত্যাগ কৰাত ল’ৰা-ছোৱালীবোৰক ডাঙৰ-দীঘল কৰিবলৈ মাকে অকলে সংগ্ৰাম কৰিবলগীয়া হয়। ইয়াছিন আৰু তেওঁৰ সৰু ভাতৃক আশাকৰ্মী মাতৃয়ে বহু কষ্ট কৰি ডাঙৰ-দীঘল কৰিছিল।
ইয়াছিন আৰু তেওঁৰ ভাতৃয়ে সমাজৰ পৰা অপমানৰ লগতে দৰিদ্ৰতাৰো সন্মুখীন হ’বলগীয়া হৈছিল। সেয়ে, সাত বছৰ বয়সতে ইয়াছিনে পৰিয়াল পোহপাল দিবলৈ কাম আৰম্ভ কৰিছিল। বাতৰি কাকত বিতৰণ কৰা ল’ৰাৰ পৰা আৰম্ভ কৰি গাখীৰ যোগানকাৰী, চিত্ৰকৰ, নিৰ্মাণ শ্ৰমিক আৰু খাদ্য ডেলিভাৰী কৰালৈকে ইয়াছিনে জীৱিকা উপাৰ্জনৰ বাবে বহুতো কাম কৰিছিল। ইয়াৰ পিছতো তেওঁ কেতিয়াও হাৰ নামানিল আৰু সপোন পূৰণৰ বাবে সদায় সংগ্ৰাম কৰিছিল।
ইয়াছিনক এগৰাকী অকলশৰীয়া মাতৃয়ে ডাঙৰ-দীঘল কৰিছিল, যাৰ বাবে তেওঁ সমাজৰ পৰা বহুবাৰ তুচ্ছ-তাচ্ছিল্য আৰু অপমানৰ সন্মুখীন হ’বলগীয়া হৈছিল। স্কুলত সতীৰ্থসকলে অনবৰতে তেওঁক জোকাইছিল। মানুহে তেওঁক কৈছিল যে তেওঁৰ ভৱিষ্যত উজ্জ্বল হ’ব নোৱাৰে। কিন্তু ইয়াছিনে এই অপমানবোৰক নিজৰ শক্তি কৰি লোৱাৰ সিদ্ধান্ত ল’লে। তেওঁ নিজৰ অসুবিধাবোৰৰ পৰা শিকিছিল আৰু সেইবোৰক নিজৰ সফলতাৰ মাধ্যম হিচাপে ব্যৱহাৰ কৰিছিল।
কেৰালাৰ ঐতিহাসিক চেৰমন জুম্মা মছজিদ
ইয়াছিনে কেতিয়াও নিজৰ শিক্ষাক লৈ কোনো আপোচ কৰা নাছিল। ৰাজহুৱা প্ৰশাসনত স্নাতক ডিগ্ৰী আৰু ইলেক্ট্ৰনিক্সত ডিপ্লমা লাভ কৰাৰ পিছত ইয়াছিনে ২০১৯ চনত এৰ্নাকুলাম চৰকাৰী আইন মহাবিদ্যালয়ত যোগদান কৰে। কিন্তু আইনৰ ডিগ্ৰী ল’বলৈ তেওঁৰ হাতত টকা নাছিল, সেয়েহে তেওঁ পঢ়া-শুনাৰ বিত্তীয় সাহায্যৰ বাবে নিশাৰ ভাগত জোমাটোৰ খাদ্য ডেলিভাৰী বয় হিচাপে কাম আৰম্ভ কৰিলে। এইদৰে, কঠোৰ পৰিশ্ৰম আৰু সংগ্ৰামৰ ফলত তেওঁ পঢ়া-শুনাত সফলতা লাভ কৰিবলৈ সক্ষম হয়।
তেওঁ সদায় বিশ্ববিদ্যালয়ৰ শীৰ্ষ পাঁচজন ছাত্ৰৰ ভিতৰত আছিল আৰু কেইবাখনো মুট ক’ৰ্ট প্ৰতিযোগিতা (Moot Court Competition)তো তেওঁ পাৰদৰ্শিতা দেখুৱাইছিল। তেওঁৰ সহপাঠী ছামনা শ্বেৰিনে ইয়াছিনক এজন প্ৰতিভাৱান ছাত্ৰ হিচাপে মনত পেলাই ছ’চিয়েল মিডিয়াত লিখিছিল, "প্ৰথম বছৰত তেওঁক এজন মজলীয়া বুদ্ধিৰ ছাত্ৰ যেন লাগিছিল, কিন্তু দ্বিতীয় বছৰৰ পৰা তেওঁ নিজৰ মূল্য প্ৰমাণ কৰিবলৈ আৰম্ভ কৰিছিল। ইয়াচিনৰ জীৱনৰ আটাইতকৈ কঠিন দিশটো আছিল পঢ়া-শুনাৰ বাবে প্ৰয়োজনীয় সম্পদৰ অভাৱ। কিন্তু তেওঁ কেতিয়াও হাৰ নামানিল। তেওঁ ছেকেণ্ড হেণ্ড কিতাপেৰে পঢ়া-শুনা কৰিছিল আৰু আনে দিয়া পুৰণি কাপোৰ পিন্ধিছিল। তেওঁলোকৰ খাদ্য আছিল মছজিদে দান কৰা চাউল।"
উল্লেখ্য যে, এল এল বি ডিগ্ৰী সম্পূৰ্ণ কৰাৰ পিছত ইয়াছিনে ২০২৩ চনৰ মাৰ্চত এডভোকেট হিচাপে নামভৰ্তি কৰে আৰু প্ৰথম বৰ্ষতে তেওঁ আউটষ্টেণ্ডিং এডভোকেট বঁটা লাভ কৰিবলৈ সক্ষম হয়।
ইয়াছিনৰ জীৱন যাত্ৰা ইয়াতেই শেষ হোৱা নাছিল। কঠোৰ পৰিশ্ৰম আৰু দৃঢ়তাৰে ইয়াছিনে কেৰেলা ন্যায়িক সেৱা পৰীক্ষাত দ্বিতীয় স্থান দখল কৰি দণ্ডাধীশৰ উপাধি অৰ্জন কৰে। এয়া তেওঁৰ জীৱনৰ এক গুৰুত্বপূৰ্ণ মাইলৰ খুঁটি আছিল আৰু তেওঁ ইয়াক নতুন আৰম্ভণি হিচাপে দেখিছিল।
ইয়াছিনে বিশ্বাস কৰে যে জীৱনটো সদায় আগবাঢ়ি গৈ থাকে আৰু তেওঁ কেতিয়াও আত্মতুষ্টিক নিজৰ জীৱন পথৰ অংশ হিচাপে লোৱা নাই। তেওঁ কয়, “মই মোৰ চূড়ান্ত গন্তব্যস্থানত উপনীত হোৱা নাই বুলি ভাবো, কাৰণ জীৱনটো গতিশীল আৰু আমি সদায় নিজকে উন্নত কৰা উচিত।” তেওঁৰ বাবে এই সফলতা আছিল মাত্ৰ এটা খোজ আৰু তেওঁ ইয়াক নিজৰ আৰু সমাজৰ বাবে অধিক সাধনৰ দিশত এক মাইলৰ খুঁটি বুলি গণ্য কৰে।
ইয়াছিনৰ এই যাত্ৰা আমাৰ সকলোৰে বাবে এক প্ৰেৰণা। ইয়াৰ দ্বাৰা প্ৰমাণিত হয় যে যদি আপোনাৰ কঠোৰ পৰিশ্ৰম সৎ হয় আৰু আপোনাৰ উদ্দেশ্য সৱল হয়, তেন্তে কোনো সপোন অসম্ভৱ নহয়। তেওঁৰ সংগ্ৰাম আৰু সফলতাৰ কাহিনীয়ে আমাক শিকাইছে যে জীৱনত যিয়েই নহওক কিয়, আমি যদি আমাৰ কঠোৰ পৰিশ্ৰম অব্যাহত ৰাখোঁ আৰু সঠিক দিশত আগবাঢ়ো, তেন্তে আমি নিশ্চিতভাৱে সফলতা লাভ কৰিম।
