Story by Munni Begum | Posted by Munni Begum • 7 Months ago
হাফিজ তথা স্কেটাৰ আশ্বাদুল্লাহ ফাৰুকী
মুন্নী বেগম / গুৱাহাটী
আমাৰ সমাজত এক ধাৰণা আছে যে, এগৰাকী হাফিজ বা মৌলৱীয়ে কেৱল ধৰ্মীয় কাম কাজহে কৰে। কিন্তু এই ধাৰণাক সম্পূৰ্ণৰূপে ভূল বুলি প্ৰমাণিত কৰিছে এগৰাকী হাফিজে। তেওঁ ইছলাম ধৰ্মৰ হাফিজি ডিগ্ৰী লাভ কৰিও বিভিন্ন প্ৰকাৰৰ স্কেটিং খেলত অংশ লৈ সকলোৰে দৃষ্টি আকৰ্ষণ কৰিবলৈ সক্ষম হৈছে। তেওঁ হৈছে খাৰুপেটীয়াৰ নিবাসী হাফিজ তথা স্কেটাৰ আশ্বাদুল্লাহ ফাৰুকী।
'আৱাজ-দ্য ভইচ'ৰ সৈতে হোৱা এক কথোপকথনত হাফিজ তথা স্কেটাৰ আশ্বাদুল্লাহ ফাৰুকীয়ে কয়, "মই এগৰাকী হাফিজ হোৱাৰ লগতে শৰীৰ চৰ্চাৰ বাবে স্কেটিঙো কৰো। মই সৰুৰে পৰা কোনো ধৰনৰ আনুষ্ঠানিক প্ৰশিক্ষন গ্ৰহণ নকৰাকৈয়ে নিজে স্কেটিং কৰিব শিকিছিলো। কিন্তু প্ৰায় আঠ বছৰ পূৰ্বে মই হায়দৰাবাদৰ শ্বাহীন গ্ৰুপ অব ইনষ্টিটিউটৰ পৰা কলেজীয়া শিক্ষাৰ সমান্তৰালভাৱে স্কেটিঙৰো প্ৰশিক্ষণ লাভ কৰিছিলো।"
হাফিজ ফাৰুকীয়ে কয়, "ইছলামত দৈনিক পাচঁবাৰ নামাজ পঢ়াৰ নিৰ্দেশ দিয়া হৈছে। যিয়ে আমাৰ শৰীৰ চৰ্চাৰো কাম কৰে। কিন্তু বৰ্তমান আমাৰ জীৱনশৈলীৰ বাবে কেৱল নামাজ পঢ়িয়ে আমি নিজকে সুস্থ কৰি ৰাখিব নোৱাৰো। সেয়েহে আমি নিয়মীতভাৱে যোগ বা ব্যায়াম কৰিব লাগে। কিয়নো যোগ বা ব্যায়াম কৰিলে আমি আমাৰ শৰীৰক বহু ৰোগৰ পৰা ৰক্ষা কৰিব পাৰো। এতিয়া কথাটো হল যে বৰ্তমান আমি সকলোৱে খুবেই ব্যস্ত, সেয়েহে আমি সকলোৱে নিজৰ নিজৰ সুবিধা অনুসৰি যিমানখিনি সম্ভৱ সিমানখিনি যোগ বা ব্যয়াম তথা অন্যন্য অনুশীলন কৰিব লাগে। মই স্কেটিং কৰাৰ মূল কাৰণটোৱে হৈছে নিজকে সুস্থ্য কৰি ৰখা।"
ধৰ্মীয় শিক্ষা গ্ৰহণ কৰি হাফিজ ডিগ্ৰী লাভ কৰা হাফিজ আশ্বাদুল্লাহ ফাৰুকীয়ে জিলা ভিত্তিক কেইবাখনো স্কেটিং প্ৰতিযোগিতাত অংশগ্ৰহণ কৰিছে আৰু বিজয়ীও হৈছে। বৰ্তমান তেওঁ নিজৰ ঘৰখনক আৰ্থিকভাৱে সহায় কৰাৰ উদ্দেশ্যে হায়দাৰাবাদত মাৰ্কেটিংৰ শিক্ষা গ্ৰহণ কৰি আছে। তেওঁ ভৱিষ্যতে নিজৰ ধৰ্মীয় দিশৰ লগতে সুযোগ-সুবিধা লাভ কৰিলে ক্ৰীড়াৰ দিশতো আগবাঢ়ি যোৱাৰ কথা ভাবিছে।
