নতুন দিল্লী
ভাৰতত ক্ৰিকেট নিয়ন্ত্ৰণ ব’ৰ্ড বিচিচিআইয়ে ২০২৪ চনৰ পেৰিছ অলিম্পিকৰ বাবে ভাৰতীয় অলিম্পিক এছ’চিয়েশ্যনক ৮.৫ কোটি টকা আগবঢ়াব। গ্ৰীষ্মকালীন অলিম্পিক গেমছৰ বাবে পেৰিছলৈ যোৱা ভাৰতীয় দলটোৰ বাবে বিচিচিআইৰ সভাপতি জয় শ্বাহে আৰ্থিক সাহায্য ঘোষণা কৰে।
ভাৰতীয় দলটোৱে দেশখনলৈ অলিম্পিকৰ গৌৰৱ কঢ়িয়াই আনিবলৈ চেষ্টা কৰাৰ বাবে বিচিচিআইয়ে আইঅ'এক সমৰ্থন আগবঢ়ায়। ২০২৪ চনৰ অলিম্পিকত অংশগ্ৰহণৰ বাবে পেৰিছলৈ ৰাওনা হ’ব ১১৭ জনীয়া ভাৰতীয় দল।
এক্স'ত এক পোষ্টত জয় শ্বাহে কয়, "মই গৌৰৱ অনুভৱ কৰিছো যে ২০২৪ চনৰ পেৰিছ অলিম্পিকত ভাৰতক প্ৰতিনিধিত্ব কৰা আমাৰ খেলুৱৈসকলক বিচিচিআইয়ে সমৰ্থন কৰিব। আমি অভিযানটোৰ বাবে আইঅ'এক ₹৮.৫ কোটি টকা প্ৰদান কৰিছো। আমাৰ সমগ্ৰ দলটোক আমি শুভেচ্ছা জনাইছো। আপোনালোকে ভাৰতক গৌৰৱান্বিত কৰক! জয় হিন্দ!।"
এই গেমছত ভাৰতীয় দলটোত মুঠ ৪৭ গৰাকী মহিলা আৰু ৭০ গৰাকী পুৰুষ খেলুৱৈ থাকিব। ট্ৰেক এণ্ড ফিল্ড এথলীটসকলে ২৯ জন খেলুৱৈৰে সৰ্বাধিক প্ৰতিনিধিত্ব লাভ কৰাৰ বিপৰীতে শ্বুটাৰসকলে ২১ জন খেলুৱৈৰে দ্বিতীয় স্থান দখল কৰিব। ভাৰোত্তোলনত ভাৰতক প্ৰতিনিধিত্ব কৰিব ২০২১ চনৰ টকিঅ' গেমছত ৰূপৰ পদক লাভ কৰা মিৰাবাই চানুৱে। ইকুৱেষ্ট্ৰিয়ান, জুডো আৰু ৰ’ইঙতো থাকিব মাত্ৰ এজনকৈ খেলুৱৈ।
অলিম্পিকৰ ইতিহাসত প্ৰথমবাৰৰ বাবে খেলুৱৈ আৰু সহায়ক কৰ্মচাৰীৰ ক্ষেত্ৰত ভাৰতৰ অনুপাত প্ৰায় ১:১ হ’ব। মুঠ ৬৭ জন প্ৰশিক্ষক আৰু আন ৭২ জন সহায়ক কৰ্মচাৰীয়ে দলটোৰ সৈতে পেৰিছ অলিম্পিকলৈ যাত্ৰা কৰিব।
