আৱাজ দ্য ভইচ / নতুন দিল্লী/ কৰাচী
১৯ ফেব্ৰুৱাৰীৰ পৰা পাকিস্তানত আৰম্ভ হ’বলগীয়া আইচিচি চেম্পিয়নছ ট্ৰফী ২০২৫ৰ বাবে সাজু হৈ উঠিছে পাকিস্তান ক্ৰিকেট ব'ৰ্ড। মেগা ইভেণ্টখনৰ উদ্বোধনী অনুষ্ঠানত প্ৰথমবাৰৰ বাবে পাকিস্তান বায়ুসেনাৰ বিমানে ফ্লাইপাষ্ট (flypast) প্ৰদৰ্শন কৰিব। অসামৰিক বিমান পৰিবহণ কৰ্তৃপক্ষৰ মতে, এই ফ্লাইপাষ্টৰ সময়ত কৰাচীত উপস্থিত হোৱা বাণিজ্যিক বিমানসমূহক অতিৰিক্ত সাৱধানতা অৱলম্বন কৰাৰ লগতে অতিৰিক্ত ইন্ধন কঢ়িয়াই নিবলৈ নিৰ্দেশ দিয়া হৈছে।
চুইছ এভিয়েশনে জাৰি কৰা NOTAM (Notice to Airmen) অনুসৰি ফ্লাইপাষ্ট আৰু ইয়াৰ আখৰাৰ বাবে ১৭ ফেব্ৰুৱাৰীৰ পৰা ১৯ ফেব্ৰুৱাৰীৰ বিয়লি ২:৩০ বজাৰ পৰা ৩:০০ বজালৈ নিৰ্দিষ্ট এয়াৰ কৰিডৰ বন্ধ থাকিব। আই চি চি প্ৰতিযোগিতাৰ উদ্বোধনী অনুষ্ঠানত পাকিস্তান বায়ুসেনাই প্ৰথমবাৰৰ বাবে ফ্লাইপাষ্ট কৰিব।
উল্লেখ্য যে, নিৰাপত্তাজনিত চিন্তা আৰু ৰাজনৈতিক উত্তেজনাৰ বাবে পাকিস্তানলৈ যাবলৈ অসন্মত হোৱাত ভাৰতে আইচিচি চেম্পিয়নছ ট্ৰফীৰ মেচসমূহ ডুবাইত খেলিব। এনে পৰিস্থিতিত ভাৰতীয় ক্ৰিকেট দলৰ জাৰ্চিত আয়োজক দেশ পাকিস্তানৰ চিহ্ন থকাক লৈ একাংশই বিতৰ্কৰ সূচনা কৰিছিল। ভাৰতীয় অধিনায়ক ৰোহিত শৰ্মা, অলৰাউণ্ডাৰ ৰবীন্দ্ৰ জাডেজা, হাৰ্দিক পাণ্ডিয়া আৰু বেগী বলাৰ অৰ্শ্বদীপ সিঙে পাকিস্তানৰ চিহ্ন সন্নিবিষ্ট নতুন জাৰ্চি পৰিধান কৰি পোজ দিয়াৰ পিছতে ছ'চিয়েল মিডিয়াত বিতৰ্ক সৃষ্টি হৈছিল।
অৱশ্যে ভাৰতীয় ক্ৰিকেট নিয়ন্ত্ৰণ ব’ৰ্ডে স্পষ্ট কৰি দিয়ে যে আইচিচিৰ নিৰ্দেশনা অনুসৰি ই বাধ্যতামূলক আৰু ভাৰতীয় দলটোৱে আন্তঃৰাষ্ট্ৰীয় ক্ৰিকেট পৰিষদৰ নিয়ম মানি চলিব। আমোদজনক কথাটো হ’ল এছিয়া কাপ ২০২৩ৰ সময়ত কোনো দলৰ জাৰ্চিত আয়োজক দেশৰ নাম নাছিল যদিও এইবাৰ এই নিয়ম বাধ্যতামূলক কৰা হৈছে।
ইফালে, কৰাচীৰ নেশ্যনেল ষ্টেডিয়ামত আই চি চি চেম্পিয়নছ ট্ৰফীৰ প্ৰচাৰৰ সময়ত ভাৰতীয় পতাকা প্ৰদৰ্শন নকৰাত আন এক বিতৰ্কৰ সৃষ্টি হয়। এটা ভাইৰেল ভিডিঅ’ত ষ্টেডিয়ামৰ ভিতৰত বিভিন্ন দেশৰ পতাকা দেখা গৈছিল যদিও তাত ভাৰতৰ পতাকা নাছিল। ইয়াৰ বাবে ভাৰতীয় অনুৰাগীয়ে ছ’চিয়েল মিডিয়াত পাকিস্তান ক্ৰিকেট ব’ৰ্ডক সমালোচনা কৰে।
এই ঘটনাৰ পিছত পিচিবিৰ এগৰাকী মুখপাত্ৰই স্পষ্ট কৰি দিয়ে যে পাকিস্তানত কেৱল সেই দলসমূহৰ পতাকা উত্তোলন কৰা হৈছে যিয়ে ইয়াত মেচ খেলিব। ভাৰতে ডুবাইত নিজৰ সকলো খেল খেলিবলৈ গৈছে, সেয়েহে কৰাচী, লাহোৰ আৰু ৰাৱালপিণ্ডি ষ্টেডিয়ামত ভাৰতৰ পতাকা উত্তোলন কৰা হোৱা নাই।
উল্লেখ্য যে, এই প্ৰতিযোগিতাৰ আটাইতকৈ প্ৰত্যাশিত মেচখন অহা ২৩ ফেব্ৰুৱাৰীত চীৰবৈৰী ভাৰত আৰু পাকিস্তানৰ মাজত অনুষ্ঠিত হ’ব। ভাৰতৰ প্ৰথমখন খেল ২০ ফেব্ৰুৱাৰীত বাংলাদেশৰ বিৰুদ্ধে হ’ব। আনহাতে, চূড়ান্ত খেলখন ৯ মাৰ্চত অনুষ্ঠিত হ’ব। অনুৰাগীয়ে স্প’ৰ্টছ ষ্টাৰছ আৰু ডিজনী হটষ্টাৰত চেম্পিয়নছ ট্ৰফীৰ খেলসমূহ চাব পাৰিব।
