নতুন দিল্লী
চেম্পিয়নছ ট্ৰফীক কেন্দ্ৰ কৰি নাটক চলি আছে। অৱশেষত ২০২৫ চনত পাকিস্তানত অনুষ্ঠিত হ’বলগীয়া আইচিচি প্ৰতিযোগিতাখনৰ বাবে ভাৰতে পাকিস্তানলৈ নাযায় বুলি আনুষ্ঠানিকভাৱে প্ৰকাশ পাইছে। পাকিস্তান ক্ৰিকেট ব’ৰ্ডৰ (পিচিবি) মুখপাত্ৰই নিশ্চিত কৰিছে যে আইচিচিয়ে তেওঁলোকক এই সন্দৰ্ভত জনাইছে যে অহা বছৰৰ ১৯ ফেব্ৰুৱাৰীৰ পৰা ৯ মাৰ্চলৈ অনুষ্ঠিত হ’বলগীয়া এই প্ৰতিযোগিতাখনৰ বাবে ভাৰতে পাকিস্তানলৈ নাযায়।
পিচিবিৰ মুখপাত্ৰগৰাকীয়ে এইটোও নিশ্চিত কৰে যে পিচিবিয়ে আইচিচিৰ আনুষ্ঠানিক মেইল চৰকাৰলৈ প্ৰেৰণ কৰিছে, আৰু তেওঁলোকৰ পৰামৰ্শ অনুসৰি চূড়ান্ত সিদ্ধান্ত লোৱা হ’ব।
"পিচিবিয়ে আইচিচিৰ পৰা এটা ইমেইল লাভ কৰিছে, য'ত কোৱা হৈছে যে বিচিচিআইয়ে তেওঁলোকক জনাইছে যে তেওঁলোকৰ দলটোৱে আইচিচি চেম্পিয়নছ ট্ৰফী ২০২৫ৰ বাবে পাকিস্তানলৈ নাযায়। পিচিবিয়ে সেই ইমেইলটো পাকিস্তান চৰকাৰলৈ তেওঁলোকৰ পৰামৰ্শ আৰু নিৰ্দেশনাৰ বাবে প্ৰেৰণ কৰিছে," পিচিবিৰ এগৰাকী মুখপাত্ৰই জনায়।
চেম্পিয়নছ ট্ৰফী সন্দৰ্ভত হোৱা পৰিঘটনাৰ বিষয়ে অৱগত আন এক সূত্ৰই নিশ্চিত কৰিছে যে আয়োজক ৰাষ্ট্ৰ আৰু অংশগ্ৰহণকাৰী দেশসমূহৰ সৈতে আলোচনা অব্যাহত থকাৰ বাবে প্ৰতিযোগিতাখনৰ সময়সূচী এতিয়াও প্ৰকাশ কৰিবলৈ সাজু হোৱা নাই।
সূত্ৰটোৱে কয় যে, "সূচী নিশ্চিত কৰা হোৱা নাই, আমি এতিয়াও চেম্পিয়নছ ট্ৰফীৰ সূচী সম্পৰ্কে আয়োজক আৰু অংশগ্ৰহণকাৰী ৰাষ্ট্ৰৰ সৈতে আলোচনা কৰি আছো, নিশ্চিত হোৱাৰ পিছত আমি আমাৰ স্বাভাৱিক চেনেলৰ জৰিয়তে ঘোষণা কৰিম।"
ইয়াৰ পূৰ্বে নিশ্চিত কৰা হৈছিল যে বিচিচিআইয়ে ভাৰত চৰকাৰৰ পৰা পৰামৰ্শ লৈ নিজৰ দলটো চেম্পিয়নছ ট্ৰফীৰ বাবে প্ৰেৰণ নকৰাৰ সিদ্ধান্ত লৈছিল। নিৰাপত্তাৰ উদ্বেগ আছিল বিচিচিআইয়ে নিজৰ দল পাকিস্তানলৈ প্ৰেৰণ নকৰাৰ আঁৰৰ আটাইতকৈ ডাঙৰ সমস্যা।
বৰ্তমান ২০২৫ চনত লাহোৰ, কৰাচী আৰু ৰাৱালপিণ্ডীয়ে আয়োজন কৰা চেম্পিয়নছ ট্ৰফীত বিশ্বৰ শীৰ্ষ আঠটা দলে অংশগ্ৰহণ কৰাৰ সম্ভাৱনা আছে।
ইয়াৰ পূৰ্বে পাকিস্তানৰ প্ৰাক্তন উইকেটকীপাৰ-বেটছমেন ৰছিদ লতিফে কৈছিল যে যদি ভাৰতে চেম্পিয়নছ ট্ৰফীৰ বাবে পাকিস্তান ভ্ৰমণ নকৰে তেন্তে ঘৰুৱা দলটোৱেও প্ৰতিযোগিতাখনৰ পৰা প্ৰত্যাহাৰ কৰিব।
"আমি ক’ব পাৰো যে ভাৰতে দ্বিপাক্ষিক মেচ খেলিব নিবিচাৰে, কিন্তু তেওঁলোকে আইচিচিৰ ইভেণ্টসমূহ অস্বীকাৰ কৰিব নোৱাৰে কাৰণ তেওঁলোকে ইতিমধ্যে ইয়াৰ বাবে চুক্তিবদ্ধ হৈছে। ভাৰতে ইয়াৰ যুক্তিসঙ্গত কাৰণ দিব লাগিব। যদি এইবাৰ ভাৰত নাহে, তেন্তে পাকিস্তানে প্ৰতিযোগিতাখনত অংশগ্ৰহণ নকৰাৰ এক ডাঙৰ পদক্ষেপ ল’ব।" - পাকিস্তানৰ জিঅ’ নিউজৰ সৈতে হোৱা এক সাক্ষাৎকাৰত তেওঁ এইদৰে কয়।
যোৱা বছৰৰ এছিয়া কাপো পাকিস্তানত অনুষ্ঠিত হোৱাৰ কথা আছিল। কিন্তু অৱশেষত এই প্ৰতিযোগিতাখন হাইব্ৰিড মডেলত আগবাঢ়িল, আৰু ভাৰতৰ মেচসমূহ শ্ৰীলংকাত অনুষ্ঠিত হয়।
ভাৰতে শেষবাৰৰ বাবে ২০০৮ চনত এছিয়া কাপৰ বাবে পাকিস্তান ভ্ৰমণ কৰিছিল।
